Kikhending thu gengen huaihiam ~ Job Cinpi

Kikhending thu gengen huaihiam ~ Job Cinpi

Nupa pawlkhatte le lawmkingai pawlkhatte lakah hih bang thu om zel thei hi.

Kikhen ding cih kammal pen genge ding, zatzat ding ahoih lo kammal khat ahi hi. Ahih hangin nupa pawlkhat, lawm kingai pawlkhatte in, hih kammal pen zaangkhai ngaihsut thei uh hi. Lungkimlohna, hehna dahna khat a neih simin kikhen ding, kithuh nawn lo ding, ci pahpah uh hi. Amau lungsim sungah a kikhen nuam taktak hi khin pah lo uh hi.

A gualzo nuam, a tung nung nuam kituhna lel tawh a gen zong hi kha ding uh hi. Numei ahi a pasal ahi zongin hih kammal kizang thei hi. Hih kammal zang uh leh a lang khat lamte in maiet ding uh, khual ding uh, zaktak ding uh, cih ngaihsutna tawh hih kammal a zang hi zaw uh hi.

Bang hang hiam cih leh hih kammal zang den, gen den cih nung sangin khen nuam taktak lo, cihna ahi hi. Khen nuam taktak hi leh a nih vei na gen kul nawn lo kha ding hi.

Kikhen ding cih kammal pen a lang khat lamte lungsim nat nading a bawl kammal ahi hi. Pawlkhatte in hih kammal pen buaina haksatna a vengsak ding kammal sa kha uh hi.

Hih kammal a zat uh cingin a lang khat lamte in maiet uh a, lungkimsak ahih manin tua kammal pen buaina ven nadingin nei uh hi. Ahi zongin tua pen khat vei nih vei ading a hoih tawh a kibat hangin a tawpna ah siatna mah tun zaw veve hi.

Tua ahih manin na zi na pasal ahi a, na lawmnu na lawmpa ahi zong na it takpi lai leh kikhen ding cih kammal pen na mumang pau in zong gen kha kei in. Lungdam, Job Cinpi (Zomi Laisim Nuamte)