Khuado leh Khangthak Zomi ~ Sia Pauno

Khuado leh Khangthak Zomi ~ Sia Pauno

Tuhun ciangin Zomite I omna munmunah Khuado kibawl ciata i bawl ni i bawl hun, i bawlzia leh i nek i dawn a kibatloh hangin Khuado bawl ihih limlim pen minam kician ngeina leh zialetong anei Zomi ihihna kilangsak i ihih manin Zomi a hong bawl Pasian alungdam in namdanglak nangawn ah zong Zomite hong kilamsang semsem hita hi. Zomite i omna ciatah Khuado pawi nunnuam a zangkim ciat dingin Topa in thupha hong piata hen.

Khuado apianzia:

Tanglai i pu i pate hunlai in Khangno pasal peuhmah hausapa inn ah avekun giakkhawm uh a, tuapen Sawm ci uh hi. Tua Sawm ah agiaknuamlo khangno a om leh ” Sawm a giak ngamlo pasal zangpheikhai” ci in zahko uh a, vunkhai( avun a manin khaigawp) in Sawm ah giaksak teitei uh hi. Tuabang a abawl uh alungkimlo nulepa aom leh a sum(an sukna sum)uh khuk mangsak in a suk uh singlam in khangnote in suihsak uh hi.

Tuabanga giakkhawm Sawm khangnote in Sawmvok ci in Vok khawisak uha, tua vokkhawite khuazangbup khangno tha (nikhat khangno khempeuh in ana uh vasepsak)khatvei pia uh hi. Khuado hun hong tunciangin Sawm khangnote inntekna tawh a vokkhawisak uh tual sagawh(Hausapa innsung zangin) in go uha Sawm Upa maikai zuiin sahawm pawl nei in khuazangbup in gualnuamkhawm in zulesa ne uh a tua pen Khaudo pawi kici hi.

Khuado hun:

I pu i pate in khadet khat pan kha det khat bulphuh in kha nasim uh a tua pen Zokha naci uh hi. Khuado abawl kha uh pen Khuado kha nacihpah uh hi. Kumkhat sung kham dinga a cin uh anteng kaikhawm in ansal ah asen khit uh ciangin abawl uh Pawi ahi hi. Zomite in Japan gal masiah tangle vaimin adiakin anpi in nei uha Japan gal khitciangin buh cingin buhsih anpi in anei pawlzong na om uh ahih manin Khuado pawi bawl hun kibang nawnlo hi. Vaimin tungkhit a bawl pawl leh buhtun khit a bawl pawl na om uh hi.

Khuado pawi bawlzia:

Khuado pawi bawl ding nitak in khuasung siampi lianpenpa makai in siampite in Khuado bawlna ding inn huang lutna kelkong kiang innsunglam tualno sung khatah ganno khat go in sisantakna nei uh a, tua ganlu pen song dawnah suang uh hi. Tua hun sungah amakai ding siampi pen sit abanglo(gtn. Zawlta hilo ding, gamtat luhek etteh tham hiding)Siampi bek zang uha kamsiat muisiatna khempeuh hawlkhia in thupha kong hongin kumkik a ding thupha ngen uh hi.

Kaubel lup:

Khuado ni zingsang ciangin Khuado kibawlna inn huanglutna kelkong biangah zubel khat lupsa in koih uha, tua pen Kaubel ci uh hi. Tua Khuadona ah zulesate a duhgawh dawilekau aomleh tua Kauzu/sa nane in Khuado zulesa pen a siangtho a suahna ding deihna ahihi.

Khuai la:

Nitakciangin khangnote khuai la in khuasung hong lut uh a, nungakte in na dawn in zutulh uh a, akhuailak uh tawh Khaudo bawlna hausapa inntual zang ah zai awi in lamsai uhhi.
a. Khuai aw hong dehdehlo aw sumtual ah gialgiakbu khum ding hing ee. b.Gialgiakbu khum ding hing ee sumtual ah lamsai ding hing ee.

• a. Ngaltun ee ngalthen ee, simning ci-a, lal nang hi cia.
• b. Simning ci a lalna cia,ka mei sangah nadelh leh siangah hong pel aw.
• a. Gualin kumkhua Dona lingling ee do hanah nau bang kah tang.
• b.Naubang kap khaubang ciahta leng khuale ciantui tangna silsial ee.

Siansuahna bawl: Tuabang in zanthapai gualnuam in lasa in lamlam uh a, zinglam akmasa khuan hunpawl in lamkhawm lasakhawm in innsung lut in ciang tawh munci teng holh in sakkawikawi uh aa, dawilekaute hawlkhia uh hi. Tuabangin innsung khempeuh a pheklek khit uh ciangin pusuakkik uh a phikhalap a tun uh ciangin thaullawn uh hi.

• a. Kum kikhen ding solkha dang ee, Zin in sianglam zong hen aw.
• b. Zin inlah sianglam zong henla ciinthang siansung saumang tuibang siang hen aw.

Khuado kitello in azang khial tampi ki-om

Khangthak Zomite in Khuado cih i thei a, athu ala theinawnlo ihih manin;

1. Anlak pawi asa pawi asa pawl omin buh lakkhit aa bawl pawl, vaimin lakkhit a bawlpawl leh i ut hunhun a bawlpawl i om zelzul hi.

2. Sanek pawi, vokngawi thalh pawi cih bangin a ngaihsun i om a, i sagawhte genpi in nei in Net sung facebooks sung khawngah i sagawh leh i sangawite suah in i kisialhbawl laidep hi.

3. Zukham ankham pawi asa pawl zong i om a, Khuado ahihnak leh zulesa ne in zukham ankham ding bek in angaihsun pawl zong i om hi.

Khuado Pawi i cih;

• Khuado i cih pen khangno bulphuh khuathawng(khuazang bup)pawi hi.
• Khuado i cih pen Siampite makaih biakpiakna pawi hi.
• Khuado i cih pen khaninte hawlkhia a, kisiansuah in thupha ngetna pawi hi.
• Khuado i cihpen anlak pawi hilo a, anlakkhit lungdamkohna pawi hi.
• Khuado i cih pen khumkhen (New Year) pawi hi.
• Khuado i cih pen i pu ipate in hunnuam mahmah a aneih uh pawi hi.

Tuhun leh Khuado Pawi:

Tuhun khangthak Zomite leh Zomi Christian-te in i ngeina hoih mahmah Khuado pawi pen manphatak in i zatsiam ding thupi mahmah hi.

a. Aituam pawi (beh, khua, pawlpi khat) bangin bawllo in minambup ahuamzo. khangnote a bulphuh pawi in kibawlthei ding

b. Anlak pawi cih bangziau hilo in Zomite kumkhen (New Year) pawi ahih manin ani kibang in bawlkhop theih ding

c. Biakna makaite mah in makaih aa, i minambup mawhna sut in minam kisiansuah ni a zat ding

d. I pu i pate in hunnuam mahmah khat in zangin a sisamite bang a photkik nuam liang mah bangun ei Khangthak Zomite in zong Zomi peuhmah in Khuado pawi manpha sak a, hunnuam hun manpha suah in i lunggulh vanvan sakzawh ding. Lunghimawhna lianpi tawh; Sia Pauno