Kepcing huai kammalciik pawlkhat (Zolai gelhzia azom)

Kepcing huai kammalciik pawlkhat (Zolai gelhzia azom)

Nungin Zolai gelhzia ‒ adiak in laimal gawmzia ‒ themcik ikikum khin hi. Muhna tuamtuam om in sandan, pomdan atuamtek inei hi. Zolai zuunding, akisapna munte ah puahding icih ciangin pawlkhat lunghimawh in, pawlkhat leuleu in hoihsa hi. Pawlkhat te in Zolai Tan 4 val asin omkhang cihtawh hongmelh sukziau zong om hi. Tuapen dikkhin lohi, banghang hiam cihleh Zolai hongpian cillai-in laitan Tan 4 ciang atungzo kikhaat mahmah hang a, tun ahih leh Ph.D. honkhat bang ineita hi. Lai lamah cileng Zolai Degree piaktheih ciangding azuun theiding mipil zong Pasian in hong piata hi. Zolai Tan 4 ciangtawh thaamcipsak, khawlsak tani icih leh thukhat hi-in cin. Khangham pawlkhat bangin teeknung guainung ah Zolai sinkik kulding hiam ci-in lunghimawh zel uh hi. Ataktak in tuapen buaihuai nailo hi, banghang hiam cihleh Degree dong sintheih dingin Zolai puahding hileng kaltampi, sepding tampi omlai a, huntampi lakkul ding hi. Puahding cihciang a-om sateng susiamang gawpding cihna hilo-in, a-om nailo, akisamte behlap phungvuh ding deihna hizaw hi. Khangham upate in amau zahngeina bangin zatsuak lel photding himai hi. Ilungtup taktak ahihleh khangthak monote hoihtak pantah zoleng cih hizaw hi. Degree dong ahipah zokei zongin migam milei ah tualsuak Zomi khangnote in Zolai pai hoihtak hongsim thei bek le-uh zong tampi phatuam khin hi.

Tampi igelh ciang hoihtak kisimlo-in pawlkhat bangin athulu enziau a, hong kuppih thei hi. Pawlkhat bang gelhsa kammalte tawh hongleh hilhkik khabang omphial hi. Ahi zongin ikikup theih lingling lungdamhuai sa-ing. Tutungin tampi gelh sangin Zopau/lai ah lakam lah ahilian lo, kammal hoih, kammalciik tampi tuhun khangnote in zangthei nawnlo in, pawlkhat bangin akhiatna nangawn thei nawnlo ahihna uh ikikum nuam hi. Hoihtak kaikhawm in laibu in bawlzo lehang lunggulh huai hi. Alunglutte in nong kuppih theihding uh leh khangnote in khantohna angahlawh nadingin deihna tawh honkhat hong gelhsuk ing, akhiatna leh laigual bawlzia mimal khatciat in muhna kipia thei hi:

1) Aab/aabkai, ai, ai-awh, am (deihgawh), angkawm, awi,
2) Bah, bangsam, bawmta, beidong, bel (zulhtat lo),
3) Ciik, ciilgil, ciil, cingg (itsit lo), cinggkam, ciip, ciing,
4) Daaithah, daplan, deep, deidan, dinkhawl, dual, duhhop,
5) Eel, Eng, eeu (eeusim),
6) Gawt, gualneek, gualnuam, gulluk/guulluk,
7) Hem, heu, hiamgamh, homthaw, hua, holhtuah,
8) Im/imcip, ik (sa-ik),
9) Khakhamvei, khamuang/lau, khal/khalna, khangma, khinkhai, khem (khangtheilo), kiallaplo, kuhkal,
10) Lal, lalthang, laang, lawhsam, lawhtak, leiiko, liau (beibaih), lunghiang, lungneu,
11) Maltu, maimang, maimial, mawhlawh tawi, mawhpua/mawhsak, muibun,
12) Naainawng, nahvawh, navaak, ngalhat, nem (beihak), ngoltol, ngontat,
13) Ol (haksa lo), ob (ak ob),
14) Palang, pampaih, pangpa, pel/pelh, pem/pemta, phengphi, phincil, phukhongvei, piau (gunpiau), polhteh, pung,
15) Sansat, satsuah, sel, selkhah, selpho, semp (sehsat), sial (kisial), sual, suam,
16) Taksan/taksang, tapkual han, thuciin, to, tuantual, tulmawh,
17) Uang, uap, uitui,
18) Vau, vang (kizing/kivang), veng/veeng (bei),
19) Zehtan, zulhtat, zulhzau, zuun, etc.

Tampi omlai hi. Laigual zui-in akhiatna leh awsuah zong atuampi suak thei hi. Igennop bulpi ah hiteng bangzong lakam hikhin peuhmah lo a, kammal hoih, kammalciik vive hi. Khangnote sungah thugen/laigelh ciang azang tawm mahmah ta a, khanghamte sung nangawn ah azang zeuhzeuh tamlo lai hi. Thugen ciang thugen pa/nu i gamtat luheek, awsuah zui-in lunglutna, thangahna tampi piangthei napi, laigelh ciang kammal zat, laigual bek ki enthei ahih manin kammalciik leh laigualh siamkul hi. Kammalciik te akisapna munte ah hoihtak zangthei leng muibun leh maltu mahmah hi. Ahih theihleh zang tangtang leng Zolai/pau azuunzuun hipah hang.

Lungdam,

Zam Sian Sum