USA, Kentucky sanginn khatah thaukikap, sangnaupang 2 si, adang 18 liam

USA, Kentucky sanginn khatah thaukikap, sangnaupang 2 si, adang 18 liam

USA, Kentucky State sung aom Benton City sanginn khatah Tuesday ni in thau kikapna piang cih Fox News pan kiza hi. Tua thau kikap apianna sanginn pen Marshall County High School kici a, sangnaupang khatin thautawi in adang sangnaupang te aphialkapgawp ahihi.

Hih sanginn thaukikapna hangin sangnaupang mi 2 in sihlawh uh a, adangzong mi 18 bang liam hi ci’n Officials te’n genkhia uhhi. Hih thau kikapna hangin sanginn huangsung aom sangnaupang te leh Local Community te patau in lauthawng mahmah uhhi.

Kentucky State Police Commissioner Richard Sanders in nitaklam in News Conference ah agenkhiatna ah thautawipa pen kum 15 aphapan sangnaupang pasalno khat cihi. Tua thautawipa pen kiman in mithahna leh mi thahding in ngimna tawh thu kibawlding cihi.

Tua thautawipa pen akhut kol kibulhsa in palik te’n apaikhiatpih laitakzong Photo ki khahkhia hi.

Kentucky State Police Lt. Michael Webb in sunlam in Press Conference ah agenkhiatna ah tua thautawi pasalno pen Sheriff’s Department te’n sanginn huangsung ah mankhia theipah uhhi. Midangte nuntakna asuplawh, abeibehma in kimanpahthei ahih manin lungdamhang ci’n genkhia hi.

Hih sangnaupangpa pen kum 15 bek phapan ahih manin, naupang “Juvenile” bangin thu kibawlding maw, ulian “Adult” bangin thu kibawlding maw cihpen Officials te’n khentat nailo uh cihi.

Thunei Authorities te’n agenkhiatna ah hih sangnaupangpa pen sanginn sungah Handgun thautawisa in alut hi a, zingsanglam 8am hunpawl in thautawh sangnaupang te kap akipan cihi.

Video: Kentucky school shooting leaves 2 students dead, 18 others injured, officials say

Asi mi 2 tepen sangnaupang hi a, aliam mi 18 tezong sangnaupang vivemah hiding hi ci’n Kentucky Gov. Matt Bevin in genkhia hi.

Asi sangnaupang mi 2 tepen kum 15 aphakhin Bailey Nicole Holt kici numeino khatleh kum 15 mah aphakhin ahi Preston Ryan Cope kici pasalno khat ahihi. Numeino pen sanginn huangsung aphual mahah sipah a, pasalno pen zato kipuak himahleh zato ah asi veve ahihi.

More: USA, Maryland ah thau kikapna piang, mi 5 kikapkha in 3 sikhin

Aliam mi 18 te lakah mi 15 pen thautawh akikapkha in aliam hi a, adang tepen thaukikapna panin ataikhiatna panin aliam uh ahihi. Sawltak #zomidaily