Keima teci na hi uhi (Luka 24:48) ~ Jam Daniel

Keima teci na hi uhi (Luka 24:48) ~ Jam Daniel

Pentecost Pawi: Thu-um mi khempeuh in kizang kimlo hi. Ahizongin adiakin Roman Catholic, Anglican, Lutheran, Eastern Orthodox, Pentecostal pawlpite leh adang Charismatic pawl tuamtuamte in na limzat diak uhi. Adang Protestant pawlpi tuamtuamte azang zong om veve uhi. Pentecostal nipi pen Lungdambawl, Thawhkik Nipi cihte zah in kilim zat lua lo hi. Ataktak in bel Pentecost I cih pen Pawlpi Pian Ni in kiciamteh hi. (Pentecost is the birthday of the church.)

Pentecost Icih?

Thu-um mite a’dingin Pentecost cih pen Jesu nungzuite’ tung ah Kha Siangtho hong kibuak ni phawkna ahihi. Pentecost nipi hong tunma kal 7 ma in Jesu’ sihna le thawhkikna cihte na piang masa hi. Jesu’ nungzui mi zong na omkhin zo hi. Ahizongin Pentecost ni matan pawlpi ci a min vawh taktakna na om nailo hi. Tua ahih manin a tangthu zui in Pentecost ni pen pawlpi pian ni kici thei hi. Kha thu tawh kisai in zong Kha Siangtho hong tung in pawlpi in hong kilang ahih manin pawlpi pian ni (Church’s birthday) kici thei hi.

Pentecost Kammal

Mang laimal “Pentecost” kici pen Greek kammal in pentekostos kici a, akhiatna pen “sawmnga” cihna ahihi. Hih kammal pen tanglai Khristian biakna kam pan hong kizangto hi a, pentekoste hemera “ni sawmnga cin” cihna ahihi.

Ataktak in Khristian biakna sung ah “ni sawmnga cin” cih bang kammal kineilo hi. Tanglai in Judah mi Greek kam zangte a’ akawm uh hi a, Judah te tawlngak ni (holiday) khat ahihi. Hih tawlngak ni pen nipi kal pawi (Festival of Weeks, Hebrew in Shavuot) ahihi. A min hong kipatkhiatna mun pen Siampi Laibu 23:16 na ahihi. Mipite tungah nipi kal sagih ahih keileh ni sawmnga pawi bei ni dong sim to dingin thu kipia a, a tawp ni pen tawlngak ni (pentekonta hemeras) ahihi.

Shavuot kici pawi pen kum sim in akizang den Israel mite lakah pawi lian mahmah a nihna ahihi. Hih pawi pen anlak pawi zong kici hi (Paikhiatna 23:16). A nungsang ciangin Sinai Mual tungpan a thukham piakna thu phawkna ni in kizang hi. (but, in time, turned into a day to commemorate the giving of the law on Mt. Sinai). Hih ni pen thu-um mite a dingin thupi diak hi. Banghang hiam cihleh Jesu sihna pan a thawhkik zawh nipi kal sagih-Judah mite pawi Shavuot pawi/Pentecost ni-in nungzui masate’ tungah Kha Siangtho hong kibua in nasep (mission) nading vangliatna pia in mun khat ah pawlpi khat in hong omkhawm uhi.

Pentecost Ni Thu Piang

Tua ni a thupiangte Sawltak laibu sung ah kigelh hi. Alian 2 na sungah, “Pentecos ni hong tun ciangin Jesuh a um mi khempeuh mun khatah kikhawm uhi hi.” ci hi. (2:1). Tualaitak in huihpi nung bangin hu ging khat hong tung vat a, amaute kikhopna inn sung khempeuh hong dim hi. Tua ciangin leii tawh a kibang meikuang bangpian amaute lakah hong kithehthang a, tuate in mi khempeuh sukha kim hi. Amaute khempeuh Kha Siangtho tawh kidim uh a, tua Kha in mi namdangte’ pau tawh amaute a pau theisak hi.

Tua ni a thu-um mite pau pen a kithei kampau ahihi. Jerusalem khua ah Judah pawi (Shavuot) sim a om mihon tul tampite in za uhi. Tua thu amau pau ciat in a za Judah mi tampite in ‘Pasian sep na lamdang liante…’ (2:11) ci uh a, pawl khatte in zu kham in ngaihsun uhi. (2:13).

Tua bang a mite kampauna Peter in a zak ciangin ding to in thugen kipan hi. Kamsang Joel in a genkholhsa thute a tunna thu tawh kipan hi. Tua thu sungah, Pasian in mi khempeuh tungah a Kha Siangtho hong bua in, khangmoi khanghamte tungah tua vangliatna tawh tha alak na ding uhleh Topa Ni hong tun na ding lim (sign) ahihna gen hi. (Acts 2:16-21; Joel 2:28-32).

Peter in a thugen zom a, sihna pan in Jesu a thawhkik khit ciangin Pasian in Joel tungah a kamciam omsa mah bangin a Kha Siangtho hong bua hi ci hi. (2:32-33). Mite in tua ahihleh bangci om ding ci in a dot uh ciangin Peter in na nuntakna uh kikhel in Jesu’ min tawh tui kiphum un ci hi. Tua hileh na mawhna uh hong kimaisak ding a Kha Siangtho letsong na ngah ding uhi ci hi. (2:37-39). Tua ni a Peter sermon na tungtawn in mi 3000 tui kiphum in ki-ap uhi.

Pentecost A Thupitna Pentecost A Thupitna

I. Kha Siangtho Vangliatna Le Ompihna

Jesu thawhkik zawh nipi kal sagih khit ciangin Jerusalem khua ah a na omkhawm Jesu nungzuite’ tungah Kha Siangtho na kibua hi. Vantung pan in huihpi hu ging le meikuang abang kamtuam pauna cihte I muh nawnloh hangin Pentecost ni masa pen a’ thupiangte mah in tuni dong leitung mun tuamtuam ah piang lai hi. Jesu um in ama tungah muanna aneite Jesu’ nungzui suak uh a Pasian in tua mite tungah a kha hong bualai hi. (Romans 8:1-11).

Khristian ihihna pen Kha Siangtho vangliatna le ompihna tawh nuntakna ahihi.

• Kha Siangtho in Jesu pen Topa hong ci theisak hi. (1Kor 12:3)
• Alamdang vangliatna tawh Pasian na’ hong sem sak hi. (1Kor 12:4-11)
• Jesu’ pumpi hihna sungah hong gawmkhawm hi. (1Kor 12:12-13)
• Eite a’ ding hong thuum sak hi. (Rom 8:26)
• Pa Pasian kiangah hong thuum sak hi. (Rom 8:27)
• Hong makaih hi. (Gal 5:25)
• Jesu bangin nuntak ding hong huh hi. (Gal 5:22-23)

Pentecost thupha in I nisim nuntakna eile ei kisit zel ding hong musak hi.

• Pasian’ hong piak vangliatna tungah ka kinga hiam?
• Kha Siangtho hong piak theih letsong sang dingin ka kihong hiam?
• Kha Siangtho makaihna ka zui takpi hiam?
• Kha Siangtho gah te ka sung ah a gah takpi hiam?

Pentecost hun in hunlapin kisik a kha makaihna tawh nuntakna leh Topa’ Kha Siangtho tawh hong dim ding ngen a kithaksuahsak kikna hun ahihi. Pentecost hun in hunlapin kisik a kha makaihna tawh nuntakna leh Topa’ Kha Siangtho tawh hong dim ding ngen a kithaksuahsak kikna hun ahihi.

II. Pasian’ Nasepna Sungah Pawlpi Sung Kimakaihna Pentecost ni-in Jesu’ nung a zui thu-um mite Jerusalem khua mun khat ah a omkhawm sungun mimal khempeuhte tungah Kha Siangtho hong kibua hi. Hih omkhopna mun pen Pawlpi masa pen hong suak hi. Thu-um thakte kituiphum in pawlpi ah ki-ap pah uhi. Amaute in nungzui masate tawh kipawl in aneih bang uh hawm in thuhilhna, kipawlkhopna, an nekkhopna le thungetnate zangkhawm zel uhi. Amaute lak ah gilkial dangtak a omloh nadingin aneihsate uh hawm uhi. Tua ahih manin Pasian in nisim in hotkhiatna a ngah mi behlap ci hi. (2:47).

Kha Siangtho pen Jesu’ nungzuite mun khat ah a omkhawmloh uh hangin kibua thei hi. Mimal in thu ngen in biakpiakna lui in Topa tawh kizopna pan in zong Kha Siangtho kibua thei hi. Mimal le kipawlkhopna sungah Pasian maizonna in Kha Siangtho kibuakna ahihi.

Ahizongin thu-um pawlkhatte in mimal nuntakna tuam om bikbek ding ci-in a zangkhial zong om thei hi. ‘Mimal in Pasian zong zo peuh leng biakinn paikul kei e, kuamah tawh zong kipawl kul kei’ a ci om thei hi. Ahizongin Pentecost ni a thupiang in mimal sung a KHA nasepna hangin kipawl khawm a biakpiakna le nasep khopna cihte hong musak hi.

Tua manin Pentecost in mimal in i biakna tau pan kipawlkhopna tau I zuat theih nading, mimal biakpiak thungetna pan kipawlkhopna biakinn le thungetna mun I zuat theih nading lamlahna zong ahihi. Pentecost in Topa kiang I ki-apna te thaksuak sak kik in, pawlpi tawh kizom in, na hih theih siamna-talent khat peuhpeuh tawh a pawlpi lam in Pasian hihna thu pulaak khawm ding ahihi.

III. Note Pen Hih Thu A Thei Teci Na Hi Uh Hi. (Luka 24:48)

Johan 20 sungah nungzuite tungah Jesu  na kilang aa, akhut le akhe a liammate lak in Jesu ahihna ki pulaak hi. Nungzuite sung pan Thomas lobuang a vek un Jesu ahihna um uhi. Luka 24 sungah Jesu a kilatna thu na gen hi. Nungzuiten a muh uh ciangin sikha sa uh ahih manin lau mahmah uhi. Jesu in banghangin lau na hi uh hiam? Sikha hiloin Keimah (Jesu) ka hihi na ci hi. Neek theih ding ngen a maute in zong ngasa hankeu khat pia uhi. Tua ciangin Jesu in ne a ahihna lak hi.

Nungzuite in Jesu ahihna a up uh ciangin nidang a a gen ngei thute mah na gen hi. Anuntakna in Lai Siangtho’ gen thute a tangtunna thu na gen hi. Amah pen a thokik Messiah ahihna le mi khempeuh tungah mawh maisakna thu a kipulaak nadingin gen hi. Tua khit ciangin a thupi mahmah thu khat na pulaak a tua in, “Note pen hih thu khempeuh a thei teci na hi uh hi” cih a hihi.

A. Jesu a’ding bangci bangin teci hiding?

1. Kampauna tawh (Matt. 10:32-33; Matthai 28:19-20)Kampauna pen thupi mahmah hi. Banghang hiam cihleh kammal sung ah sih theihna le nuntakna kihel hi. (Paunak 18:21). Na kampau a za mite in, Jesu a um teci himahei hong ci thei uh diam?

2. Kalsuanna tawh (Paunak 14:5; I Peter 2:9 I Thessolonians 2:10)Gamtat luheekna pen I sung a I neih bangbang kha-nin ahihkeileh kha siangtho ii gah khiatna hihi. Niiklepuan silh dan a kipan heksuk hektohnate ahihi. Na puan silhdan, na kiheek zia Jesu’ teci ding mah in a kilawm diam?

3. Nasepna tawh (Matt. 5:14-15; Sawltak 4:33)Sepkhiatna pen I sung pan a gah khia mah hi a, na sepkhiatna in mite ading damna, lungnopna, mite kisapna khat huh theihna ahih ding thupi mahmah hi. Mi kisapna khat ah na huh theihna in Pasian’ min thanna kilang khiasak hi.

4. Na biakpiakna tawh (Late 34:1; Sawltak 2:4-6, 16:25)Biakpiakna sungah na kipiakzia, na kizat zia in kua teci nahiam cih kilatna khat ahihi. Na biakpiakna limci sak in. Na biakpiakna namtui sak in. Lungkham haksat pen hun mah in Pasian tungah ahing biakpiakna nalui theih pen teci hing ahihi. Paul le Sailas in kolbulh khau khih kawmsa mah in bia uhi. Job in a neihsa khempeuh a bei hangin Pasian a biakpiakna thanemsak lo hi. Tua in Jesu a’ding teci taktak hihna ahihi.

5. Gimle tawlna tawh (Sawltak 5:40-42; 2Korin 11:23-25; I Peter 4:12-16)Pasian a’ding teci hihna sungah tawldam hithiat cih bang omkhollo hi. Banghang hiam cihleh Jesu in nasem ding a hongsawl khiatte ihihi. Gim taleng paikul hi, tawl taleng sep kul hi. Pai nuamkei taleng pai kul hi. A tawldam nuam hithiat na pumpi deihna nialzo a na kalsuan teiteina pen Jesu a’ding teci apang na hihi. Bek thamloin gensiatna, bawlsiatna in hong zui theilai hi. Sawltak masate in simmawh bawlsiatna ka thuak uh ciangin ka lungdam zaw uhi ci hi.

Hihte a thei teci na hi uh hi. You are witnesses of these things. Jam Daniel