Kawlpi leh Zogam lampi te ki paikik theita ~ Tedim Post

LAMPI KIPAI THEI TA | Tedim – October 31
A beisa 28-29 ni Taingen leh Hiangzing kikal Aicik mincim hang a lampi kipai thei lo pen CE PWD te in tendenin hanciam takin nisim kisem toto a, tuni nitak lam nai 5 hun pawl ciangin kipai suak thei ta hi, cih thu Minister Pu Pau Lun tungtawnin kiza hi.

Hih pen Union High Way hi a, Lampi Special No. 7 te vaipuak lakna hi-in Chin State government in ki-en hi, ci-in Pu Pau Lun in gen hi. Nidang bang loin tuhun ciangin setpite amunmunah om ahih manin hi bang dan mincim haksat dongtuah hun ciangin kei mahmah tungah hi ta leh vaisai nasemte tungah zasak thei pahpah leng tampi nuamtuam ding hi, ci-in gen lai hi.

Kawlpi leh Chin State kizopna nuntakna guipi khat ahih banah India tawh kikawmna lam lian pen khat zong ahi hih Union High Way pen suahtaakna ngah akipan tuni ciang dong kum 70 dektak bang puah loh zun lohin om a, abeisa kum pan lampi nakpi-in kikeekbeh ahih manin mun khempeuh ah buantui, mincim leh nisat ciangin leivui tawh kidim tadih laitak ahi hi.

Buantui leh leivui khu pen uliante in khangthak ngeina hong suahsak loh ding uh thupi ding hi, ci-in khangnote in gen uh hi. Taikua Khai Kam khuapi ah aletsuk lampi dang khat zong om ahih manin hoih tak puah ding hanciam huai hi, cih mipite sungah kinak gen mahmah hi. Vaisai mipi nasemte leh MP te in bang ciang hong tunpih uh diam, cih bel alunglut huai mahmah thu hi, cih kiza hi.
Photo Credit : Chin Chin´ Messenger

Tedim Post