Kawlgam Khuahun leh ZNC mailam ~ CS Dal

Kawlgam Khuahun leh ZNC mailam ~ CS Dal

Kawlgam ahoih lamin hong kikhel takpi mahding a hih leh ZNC in maban koi ci in hong kalsuan ding hiam? 2011 kum December kha in US Secretary of State Hillary Clinton kawlgam hong paikhit zawh kawlgam khuahun pen hong kikhel hathat cih ding hi. Hillary Clinton kawlgam sung ah a om laisung teng in, kawl kumpi Thein Sein, Aung San Suu Kyi leh minam kipawl na pan ZNC chairman Pu Cin Sian Thang cih te tawh kimuh khopna leh kamkup khopna te hongnei hi. Kawl kumpi Thein Sein kiang ah “kawlgam ki-ukzia tawh kituak in phatna nabawl uh leh US kumpi in zong thaman kician in kong thuk ding uhhi,” ci in genhi.

Tua zom ah British Foreign Secretary William Hague leh French Foreign Minister Alain Juppe te zong 2012 kum January kha sungin kawlgam ah hongpai uhha, kumpi te, Aung San Suu Kyi leh minam makai te tawh zong kimuh khopna hongnei uhhi. Hiteng ziakmah in zong kawlgam kumpi te in, January kha 13ni in, gamvai hang tawh thungkia mimal 651 hong khahkhia uhhi. A lungkim huai phadiak na ah, Shan makaipi te, 88-sangnaupang makai te leh, ZNC khangno te hongkhah khia uhhi.

US gam a kipan UK, EU te in zong kawl kumpi asep nate tung ah kamciam a piaksa mah bangin thuhoih tawh dawntuah ciat uhhi. US president Barrack Obama in US-Burma kizopna (full diplomatic ties) bawlkik ding ci-in tangko khiapah hi. Tua mah bang in, Alain Juppe in zong EU te in zong kawlgam sanctions vai hoihtak in en kik ding hi ung ci in genpah hi. Kawlgam ulian pawlkhat zong EU te in visa pia theita ding ci-in gen uhhi. January 14 ni in, Norway kumpi in kawlgam tawh kizop kik ding gen uh a, Australia kumpi in zong kawlgam a khaktan nate uh ahi sum leh pai hi ta leh, khualzin na hi ta leh, khiamsuk ding ci in genhi.

US Senator Mitch McConnell zong kawlgam hong paisung in, Thein Sein tawh kamkup nate thangah mahmah hi ci hi. Mitch McConnell pen Republican senator khat hi in, kawl kumpi te apakta het lo leh amuang zo ngiat lo khat hi a, amah naleng in, thangah ahi man in, kawlgam pen ahoih lamah hong kikhel takpi ding mahhiam cihnop huai phial hi.

Azenzen in, kawlgam in ahoih lam hong manawh ding hi leh, Zomi minam party khat a hi, Zomi National Congress party te in zong mailam kalsuan zia ding etphat ding leh kigin ding hun hoihpen hi thei kha ding hi. ZNC pen 1988 kum in a ki register hi a, Zomi bulphuh in kipawl political party khat ahihi. Party kipat cil in Pu Pum Za Kap in chairman hong sem in, bulphuh ngimna (4) tawh kipan khia uhhi.

• a) Zomi cih pen minam min ci in hong kiciapteh nang
• b) Zogam in Federal gamkhat a ngah nang, kawl kumpi ukna sung ah ei leh ei ki-uk nang
• c) Suakta takin sum le pai zong/bawl theih nang
• d) Panglong thukimna zahtaknang leh democracy ngahnang ahihi.

Hih ngimna te tawh kizui in, 1990 kum kawlgam teelpi ah Tedim I, Tedim II, Tonzang, leh Kawlpi II teelpi khawkte ah kidem uhhi. ZNC chairman Pu Cin Sian Thang in Tedim II pan ngah in, General Secretary Pu Thang Lian Pau in Tonzang teelpi khawkpan in zohi. Ahizong in galkap kumpi in kawlgambup pen amau khutnuai ah honghencip uh a, 1992 kum in ZNC party zong hongphiat sak uhhi. Tuakum a kipan in, ZNC in anasep na te ah, kawlgam in democracy ngahnang, kawlgam sung aom minam tuamtuam te liangko kikim in nuntak theihnang leh ei leh ei thuvaihawm theihna ngah theih nang, galkap kumpi langpang in hong semto uhhi.

Tua ziak mah in, ZNC policy leh nasepna khempeuh ah galkap kumpi langpanna te bulphuh pen in hongsem to uhhi. 1998 kum in Shan National League for Democracy, Mon National Democratic Front leh Arakan Democracy League te tawh kipawl khawmin galkap kumpi tung ah 1) 1990 teelpicing ah angah makaite aciapteh nang, 2) galkap kumpi, NLD leh mualtung miteng kimu khawm in kamkup khopnang, 3) mipi parliament amanlang in neihzawh nang leh 4) kawlgam sungah suaktatak in thugenna/ kampau theihna, gam ki-ukzia suaktak na leh human rights te zahtaknang ngetna (4) te neikhawm uhhi.

Galkap uksung pan kawlgambup suahtak nang leh democracy ki-ukna ngahzawhnang, hanciam na te hangin, ZNC in Zomi mipi te tawh kizopna leh kithuahkhopna ding hunpia manlo hi. A nasepna, a ngimna khempeuh ah gamleh minam a ding hi mah tase leh galkap kumpi langpang in buai ahih man in mipi te kisapna leh deihna te sepsak na omman lo hi. Tu hun tatak a hih leh, galkap kumpi langdo ding hun hinawn lo a hih man in, ZNC in amau leh mau a ki-etphat ding, pawlsung kipuahphat ding leh 2015 teelpi ding a hoih pen in kigin kholh na ding hunhoih pen hi thei kha ding hi.

2015 teelpi ah ZNC in Zomi leh Zogam ading a kician party khat ahih zawhnang in, kipawlzia leh pawlmi mahmah zong etphat ding kisam theidinghi. Mipil misiam leh sumbawl mihau, khuanu, khuapa te ban ah biakna siate tawhzong kizopna ahoih zawknang etphat ding hun hi a, pawlsung mahmah ah zong munpiak huaite ngaihsut huai mahmah hi. Abeisa hun in nasepna leh policy te ah galkap kumpi langpang natam zaw a, tu hun in a hih leh, Zogam kumpi ngah leng, suaktatak in sumzon/ vansuak theihnang in bangteng semding, Zomi leh Zogam khantoh nang bangteng sepding, mipi te deihna leh kisapna te dotding leh kanding hun hi zaw ta ding a, mipi tawh kizopna khansak ding zong hanciam huai mahmah dinghi.

Democracy ngahbek tawh maban atangtung hi lo zaw a, nasep a kipan panding hi zaw hi. Kawlgam hita leh kawlgam sung aom minam tuamtuam te hita leh Zogam ading mahmah in zong athupi penpen hunkhat hi a, pilvangtak leh kidawmtak in kalsuan zo leng, Zomi te zong kawlmi te khutsung ah nenniam na pan suaktat ding hun hong sawtnawn lo ding hi. CS Dal