Kawlgam aom Rohingya te huhna apuakding Malaysia tembaw kuankhiata

Kawlgam aom Rohingya te huhna apuakding Malaysia tembaw kuankhiata

Malaysia kumpi vaihawmna tawh Kawlgamsung aom Rohingya Muslim te adingin huhna apuakding tembaw khat Friday ni in Port Klang, Malaysia pan kuankhiata cih RFA pan kiza hi. Hih tembawpi sungah huhna van tuamtuam kihel ci a, Yangon ah khatvei khawlding a, tuakhit ciangin Bangladesh, Teknaf ahzong khatvei khawlding cih kiza hi.

Tua Tembaw pen “Nautical Aliya” cih min aneikhat hi a, asungah nektheih leh zatui tuamtuam “Food and Medical Supplies” bekbek akigawm in Ton 2200 val puakhia cihi.

Friday ni nitaklam 4pm hunin Port Klang ah hih tembaw adinkhiatma in kimuhkhopna Ceremony khat neimasa uh a, Malaysia Prime Minister Najib Razak ngiatzong kihel hi. PM Najib in hihbang in Malaysia pan Kawlgamsung aom abiakna kibatpihte uh huhna puakding in akisawlkhia Mission semding kuankhiatna pen Muslim biakna sungah ki pumkhatna lahna hi ci’n genkhia hi.

Hih Nautical Aliya kici tembaw pen Yangon Port ah Tuesday ni tungmasading a, tuakhit ciangin Bangladesh gamlam zuanin zinsuakding cihi. Hih tembaw sungah akipua huhna vante pen avekin akigawm US$745,000 bang manneiding cihi. Nisim nektheih taaktheih pen US$361,000 bang phading a, nikten puansilh pen US$113,000 manbang phading cihi.

Tuabek thamlo hih Nautical Aliya tembaw sungah Volunteers mi 230 bang akuankhia uh hi a, tuate lakah NGO tuamtuam leh Local panin siavuan tampitak kihel cihzong kiza hi. Tua International NGOs tepen Turkey, Indonesia, China, the United States, France, Thailand, Palestinian territories cihbang gamtuamtuam pan ahi uhhi.

Bangladesh inzong athuminsa uh Teknaf khua ah tembaw lutsakding cihpen thukawng heikik uh cih kiza a, akhuanung ah ki awnglo uhhiam, Dhaka khua ah lutkhuan piakik uh cihzong kizakbeh hi. Bangladesh te’nbel biakna kibatpih ahihzenzen hangin hih Rohingya te na hehpihlua khollo hileh kilawm hi. Zandiak inzong Rohingya te aomom sana mun Camp panin mihing atenlohna tuikulh kawmbulak khatah Rohingya Refugee te kituahsakding cih genkhia ahih manin, lamdang kisa mahmah hi.

More: Bangladesh gamsung aom Rohingya Refugee te aomna uh kituahsak

Hihbang in sumtampi US$745,000 beiliang in Kawlgam aom Rohingya te ahunsawm uhpen Malaysia gammi te’n diksalua khollo uh a, kisam asalo honkhat zong phunphun uhhi. Amau gamsung aom cimawh dongtuak tezong hoihtak huhloh, inngua hahlo in gamgua ahahpen dik akisalothei mah hizel hi. ZD Sawltak #zomidaily