Kawlgam ah Sumkum (Budget Year) kilaih ding

Kawlgam ah Sumkum (Budget Year) kilaih ding

Kawlgam sumkum (budget year) laih ding in September ni 7 ni in vuanzi pawl (cabinet) in khentat khin a October 17 ni in kawlgam innpi (Pyihtaungsu Hluttaw) ah kawl kumpi Htin Kyaw in puakta hi. Hih sumkum laihding tawh kisai in Planning department pan Director General U Maung Maung Tin in “Tulaitak a ihzat sumkum pen lem hetlo hi.

April kha ni 1 ni a kipan in akipat zawh asawt lo a tuibuah pawi zum khakpi in hong nawk pah ban ah tuk guahtui kiathunpi tawh kituakto mawk in na lianpi sepding hamsa mahmah hi. October ni 1 ni pan a kipan hi leh pen guah lah atheu lam hita in nasepna lem mahmah ding hi.

Kha 8 sung bang nawngkaina omlo in akizom in na kisem thei pah ding hi” ci hi. Ahi zong in MP pawlkhat in bel “Laih veve mi’ a tawh kibang ding in January ni 1 ni pan December 31 ni hivet leh” ci uh hi.

Kawlgam sumkum ngeina pen a kawlkum uh tawh kibang hi a April ni 1 ni pan March 31 ni kikal ahi hi. Tu a athak alaihsawm uh pen October ni 1 ni pan September 30 ni kikal ding ahi hi.

Related: Pope Francis Missa biakpiakna Yangon ah kihel theihnang kikupna leh khentatna

2015 kum a Pyihtaungsu Uhpadi nambat 42 ah budget suaih hun ding siangtak in kigensa hi a tutung sumkum thak tawh hong ki tukalh ahih man in tua thukhun laih phot kulding hih tuak hi. Bangbang ahi zong kumpi zong NLD te mah ahih man in laihzo lel ding un uphuai hi. Myanmar Ahlinn, Published date Oct 18, 2017 Pu Thangboi/ZIUSA