Kapteel khua ki khumcipna pan ki khahkol tading

Kapteel khua ki khumcipna pan ki khahkol tading

Chin State kumpi in Kapteel khua sung mite lokhawh singpuakna leh nuntak sum zonna a haksat luat lohna ding deihna tawh gambup huam Covid-19 Vaipua Committee te tungah hong puaksakna om bangin gambup thunei vaisaite in May 15, 2020 ni pan kipan kikhumcipna pan suakta thei ta, cih thu zum lai tawh suaksak uh hi.

Kikhumcipna pan kikhah kol ta, cih ciangin kidop ding gambup mipi zuih ding a kibawl thute leh Kaoteel khua adingin lamlahna thukhun kibawlte zuih kul ding hi, ci uh hi. Gambup mipite zuih ding thute pen:

Mipi kikhopna bawl thei lo ding, khut sil ding leh muktuam zang ding cih thupiakte pen zuih ding hi, ci uh hi. Mipi kikhopnate pen May kha bei dong kiphal nai lo ahih manin biakinn ah tukha bei dong kuamah a kikhawm theinai lo ding suak hi.

Hih khumcipna pan khahkolna tawh kisai-in Kapteel hausapa Pa Do Tuang in Tedim Post tawh kihona ah, “Gambup pan thupiakna ahih manin lungdam mahmah ung. Ahih hangin Tedim AD zum panin thupiak a om ma teng gambup thu galzak tawh bangmah kitangkhia ngam nai lo ding hi, lawp mahmah ung. Buai sung hong kem hong van siavuan siamahte akipan annek tuidawn ding hong huh a thu hong ngetpih khempeuh tungah lungdam mahmah ung,” ci-in gen hi.

Sang honkik dingvai

Sang kihon kik hun ding pen State Counselor Daw Aung San Suh Kyi makaihna ahi Covid-19 National level Central Committee te thukhensatna bang hiding a, sang kihon ding hun zekai kha thei ding hi, cih thu Ministry of Education Deputy Director U Zaw Htun Aung in gen hi.

Gambup Covid-19 Central Committee te thugen siksanin Myanmar Harp Media te genna ah July kha sungin sang hon kik zawh hamtang ding leh sang hon kik ma in Covid-19 tawh kisai a Quarantine lutna dingin a kizang sang inn te pen zatui hoih tak kap masa ding, ci uh hi.

Tulaitak Ministry of Education in sang Sia/Siamahte online tungtawn in laihilh zia ding training akipiak san laitak hi a, sang kihong kik leh sang naupangte hun kikhen in alang kahsak ding cihte gelna nei uh ci hi.

State Counselor in zong “Covid-19 dalna zatui akimuh mateng sangkhak ding hitheilo ahihmanin sang hon kik kul ding hi” ci-in May 12, 2020 ni akibawl Online kamkupna ah gen khia hi. Abeisa kumte ah sang hon hun pen May 20 ni sang ki-ap sak in June 1 ni-in akihong kik ahi hi. Tedim Post