Kanu in hong ci ~ Peter Suumpi

Kanu in hong ci ~ Peter Suumpi

Kanu in hong ci hi … na hehsuah laitak mitawh kitawng ken. Na kiho loh uh hang phamawh kei, apuan nasawp sakloh hang phamawh kei, ahihang aw sangin kitawng kei in hong ci hi.

Kanu in hong ci hi … napasal tawh kitawng in apua lam ah paikhia ken. Nakiang ah kalkhat hong neh leh nang kalnih amalam neh in hong ci hi.

Kani in hong ci hi … inn cihpen numei khat ii ngak ding hi. Cik mah hun in inn pan paikhia kei in. Inn pan napai khiat leh nalut kik ding haksa khinta hi.

Kanu in hong ci hi … na lawmpa tawh inn ah na om khawp uh ciang amaipha ngah nading bek hanciam kei in. Nuntakna mainawtna ah maipha ngahna te thupi masa lo hi. Tau bang hi leh amah omloh ciang nang bang cih ding na hiam?

Kanu in hong ci hi … pasal khatpen bangzah ta in sum ahauh hang asiangtho nang mah in asiangtho na inn uh ah na nangak ding lam-en den uh hi.

Kanu in hong ci hi … pasal hoih tampi tak om hi. Numei dangte aman avakawi loh hang amah akoi nuam numei tampi zong om ve ve hi.

Kanu in hong ci hi … numei khatin na asep kul ding hi. Sum lut tam taleh tawm taleh nasep cih pen mihing te ii man (value) hi. Inn bek ah na om leh na pasal in ‘amah ka pum vaksa’ hong cih nop leh hong ci thei ding hi.

Kanu in hong ci hi … apua lam ah na nasep leh inn nasep te zong zo veve in. Tua ahihkei leh na sum tawh innteng nasem sam in. Inn nasep zong hoihtak sep kul hi. Naupangte zong hoihtak pattah ding kisam hi.

Kanu in hong ci hi … na lam-et ngam loh nakhat peuh aman hong sepsak ciang na lungdam mah bangin amah zong phat in. ‘ci dihdih mawk … anunglam pan ni hong suak ding ai hia?’ ci in ciamnuih bawl kha kei in. Tua bangin na ciamnuih khak leh nidang ciang hong sepsak nawnlo ding hi.

Kanu in hong ci hi … kua mah in kua mah ii phallang hi kei. Na lungsim sung aa na ngaihsutna te nagen khiat keileh aman bangci theih theih ding ahi hiam? Tu laitak bang ci ing, bang deih keng cihte nagen kei leh cihmah in aman hong tello ding hi.

Kanu in hong ci hi … ama nulepa te zong nang ii nulepa ahi hi. Anu le apa nang tung hong hoih kei zenzen leh nang amau tung nahoih kul veve hi. Bang hang hiam cihleh amau zong nang ii nulepa te ahihang ahi hi.

Kanu in hong ci hi … amah tawh nakhantawn nakilet pihding aa nateel ahihleh haksat hun ciangin thum kei in. Amah nateelsa ahihman in amah zong mawhsak kei in. Ama ii kicin lohna te zong phulak khia se kei in.

Kanu in hong ci hi … sum tampi a omhang amawkna hi. Sum tampi azon hang amah nagei ah hong omkei leh amawkna ahi hi.

Kanu in hong ci hi … na nuntak sungin sumbang zah zangzo ding nahiam? Aminthang vante zang zolo, lei zolo ci in lungneu kei in. Nuntakna sungah lungnop ding athupi pen hi. Aminthang vante zang aa alungnuam lo mitampi om hi.

Kanu in hong ci hi … nata te kiang ah ‘hong deih nawn keng. Kong man nading hong thei keng. Hong it nawn keng.’ Ci in nate tai kha kei in. Na heh asuah laitak nata te innpua lam ah koih kei in. Na kammal bang in hong tangtung takpi leh akhasia ding nang mah hiteh.

Kanu in hong ci hi … nata te satkei in … adiakdiak in mi mai ah saikei in, tai kei in.

Kanu in hong ci hi … nuntakna pen zingciang thu ding kigen khol theilo hi. Tua ahiman in tu ni na innkuan un ki it kilem in nungta in. na innkuan un Pasian tung nisim ki ap in thu ngen khawm den un.

Mintheih loh laisiam (PS : Pasal neikhin numei khat a nu ii thu hilhna ahi hi) Peter Suumpi 18.6.2014