USA, Kansas ah thautawh akikaplum Karen khangno khat ii thu Update

USA, Kansas ah thautawh akikaplum Karen khangno khat ii thu Update

USA, Kansas State sung aom Kansas City sungah Myanmar gammi khat kikaplum cih thuthang pen zanni in ih suahsak khin a, athu tawmkhat Update ki theihbeh ahih manni, kong suaksakkik uhhi. VOA Burmese te genna ah tua akikaplum khangnopa pen Myanmar, Karen te cihi.

Amin pen banghang in December Htoo kicihiam cih akidot ciangin, December khasung in suak ahih manin, December Htoo ci’n akiphuak cihi. December 29 ni in asuak hi a, hongtungding December 29 ni hileh kum 16 acingding ahihi.

Amahpen Thailand – Myanmar gamgi kikal aom Umpiem Karen Refugee Camp ah asuak ahihi. Tuapanin khangkhia in, America gamsung gambel in atungkhat ahihi.

Karen kipawlna makai khatin agenkhiatna ah hihte innkuan pen 2009 kumin America gamsung atung uh cihi. December Htoo pen J.C. Harmon High School ah sangkah in, Tan 10 asin laitak ahihi. Tuaban ah biakinn ahzong Gospel lasakna ah akihelzel khat hi a, biakinn ah hitaleh sanginn ah hitaleh lawmlegual haumahmah in, midangte’n a it mahmah khangno khat ahihi.

J.C. Harmon High School pan sangsiama khat ii genkhiatna ah December Htoo pen laisin hanciam in, apilzong apil mahmahkhat ahihi. Lungsimhoih nei in, midangte zong ahuhden khat ahihi. Sangnaupang adangte sanginn panin aciah, Bus Station panin inn atundong atonpih, midangte ahuhnuam mahmahkhat ahihi ci’n genkhia hi.

Karen Community kipawlna sungah hitaleh Karen biakna sungah hitaleh akihelden, athumang naupangno khat hi ci’n Karen makai khatinzong genkhia hi.

December Htoo te innkuan pen apa in asihsanzawh sawtpi hikhinta hi. Amau unau pen ama tungah unumei 2 nei a, anuai ah naupasal khat nei in, unau 4 apha uh ahihi. A unau 4 tengun anu tawh 2009 kumin US gamsung atung uh ahihi.

Anu leh a sanggam te apanpih nading, innkuansung nekledawn hamsatna sumzat anoptuamding cih ngimna tawh nitaklam amanhunsung in Part-time asem hi a, tua anasepna ah thautawh akikaplum citciat ahihi.

Police te genkhiatna ah Kansas City sung aom Maple Hill Laundry akici sumnen tawh puansawpna “Coin Laundry” sungah Saturday zingsanglam in aluanghawm akimu cihi. Aki kaplup hunpen Friday nitaklam hiding in ki ummawh hi.

Ahi zongin hih anasepna Laundromat puansawpsai sungah CCTV kithuahlo citciat ahih manin, Police te’n thautawh akappen kankhiat nading omtheinailo hi. Ahi zongin khuasung mipi Public te’n hih December Htoo ii kithahlupna pen akankhiatpih theiding in ki lamen hi ci’n Police te’n genkhia hi.

Demcember Htoo ii aluanghawm kivui nading, Funeral Cost panpih nadingin American gammi alawmte khatin GoFundMe ah huhna donsak a, ki lainatpih mahmah ahih manin, mi tampitak in huhna piakhin uhhi. Goal $3000 ciang lamen in huna angetpen tuciangciang $10,555 bang ngahkhinta hi.

More: USA, North Carolina ah Karen pasal khat vanleng tungpan tuakkhia

December Htoo pen Myanmar gammi te bekthamlo, American gammi te mahmah inzong lainatpih mahmah uhhi. US gamsung ah nuntak anuamzawding leh lungmuanna bitna Security, Safety cihte aomzawding ci’n gallak salak panin hongtaikhia khatpen kua in anuntakna laksak sesehiam ci’n ki lainatpih mahmah hi.

Aluanghawm pen November 24 (Thursday) ni in kivui theikhading cih kiza hi. Sawltak #zomidaily