Kachin, Hpakant suangkhuk ah mencim leitolh leuleu in mi 15 si, 46 liam

Kachin, Hpakant suangkhuk ah mencim leitolh leuleu in mi 15 si, 46 liam

Myanmar, Kachin State sung aom Hpakant Jade Mining kici suangkhuk ah mencim leitolhna hangin mi 15 takin sihlawh a, adangzong mi 46 bang liam cih Reuters pan kiza hi. Local Official te’n agenkhiatna ah zanni Saturday nitaklam 2pm hunpawl in thupiang ci uhhi.

Northern Kachin State, Hpakant Administrator asem laitak ahi Kyaw Swar Aung in agenkhiatna ah Jade suang akitawhna suangkhuk alui khatah Miners te’n suangmanpha azon laitak in mencim in lei atolhsukgawp cihi.

Pi 300 bang asangding lei kitawhna aphungteng ki cimsuk in, anuai ah suangmanpha zongin aomte adenglum, avulhnelh kha ahihi. Asi mi 15, aliam mi 45 banah adangzong aki muzonailo, amangcip pawlkhat omlai hi ci’n Rescue Team leh Firefighter te’n genkhia sawnsawn uhhi.

Tua suangkhuk akicipna munpen Lone Khin Area kici a, aki vulhnelhkha asi mi 15 leh aliam mi 46 te aki kaihkhiattheih khitciangin aliamte ageinai aom Hospital ah kipuaksak hi. Nitaklam 5:30pm hunpawl ciangin Rescue Operation pen ki khawlbawlphot a, tuni in ki zomkikding hi ci’n thunei te’n genkhia uhhi.

Asi aki mukhiate pen numei 1 leh pasal 14 hi uh a, aliam mi 46 tepen pasal vive hi ci’n Hpakant Myone Fire Department thunei te’n genkhia uhhi. Asi aliam tepen mawtaw tawh puakkhiat nading hamsa mahmah hi. Mawtaw kicinglo ahih manin, ki cimawh mahmah hi.

Hih asi aliam tepen akimu cihciangbek hiphotlai a, adang akimunailo, luitui sungah aki vulhnelhcip zong tampi omlaiding hi ci’n Lone Khin khuasung thunei te khatin genkhia hi.

Suangkhuk kitawhna leisai tepen aki cipbehding dinmun ah omkik in, lauhuaina tampi om ahih manin, adang amangcip te ki zonbeh theinawlo in nitaklam 5pm hunpawl in Rescue Operation pen aki khawlbawlphot cihi. Hihbangin suangmanpha azongtepen amin sazian kiciantak in aki ciamteh cih hilo ahih manin, mi bangzah taktak leisungah ki vulhnelhkha cihpen ki theicianlo hi.

Tua suangkhuk akicipna ah lei in avulhnelhkhak tepen suangkhuk anei Company te kiangah nasem te hilo uh a, amauleh amau in suangmanpha aki nusia aomkhahiam cih azong kawikawi “jade scavengers” te kici hi. Tuabangin suangmanpha azongin avak kawikawi tepen mencim leitolh in vulhnelhkha pahpah in, tuahsiatna lianpipi piangthei zelzel hi.

More: Sumlepaai sangin Pilna thupi zaw hi ~ Khoi Lam Thang

Abeisa May khasung inzong Lone Khin Area sungteng mahah mencim leitolhna hangin suangmanpha azong Miners mi 14 takin sihlawh uhhi. Tuaban ah abeisa 2015 kumsung inzong Hpakant ah mencim leitolh nasiatak in tuahsiatna piangngei a, tuahunlai in mi 100 val takin sihlawh uhhi. Sawltak #zomidaily