Ka sum thalawhcil a, ka pa hong tangthu gen

Ka sum thalawhcil a, ka pa hong tangthu gen

“Ngabengte naiah na ten leh nga nabeng dinga, sabengte naiah na omleh sa nabeng ding,” cih paunak om mah bangin, tangiat laivuampi khit ciangin sakol thum tawh Tonsim (Champhai) ah sum thalawh in ka zin hi.

Ka ki thuahpih ten zudawn uh a, sakol nungzuite ngeina ahih leh ci-in keizong ka dawnpah hi. Inn ka tun ciangin zukhamsa in inntung kahihman in ka pa in diksa hetlo hi. Hong tai dinglah zukham hita kahihman in, hong tailo in tangthu khat hong gen hi.

“Hunkhat lai in kawl papi khat leh kala papi khat in singat khawm uh hi. A sum ngahzah uh ki bangin, a zatdan uh ki banglo hi. Kawl papi pa’n voksa, bawngsa meh in bawlin zu zong dawnlai hi. Kala papi pa’n ngakeu leh mehteh mehgah ne in niangtui bek dawn hi. A sawtlo in a sum thalawhna uh pan innlam hong zuantuak uh hi.

A kikhenzawh uh kumthum khit ciangin kawl papi pa singattem zong dingin khuapi sungah hong pai hi. Singattem kizuakna sai liankhat ah hong lut leh tuma kumthum lai a, a singatpih kala papi pa na om in lamdangsa mahmah hi.

Lawm aw hih sai nanga hiam?ci in hong dot leh himah ei nidang ih singat khop lai a ,ka ngah sumte mah tawh kipan in hih sai na hong ing ei ci-in dawng hi. Kawl papi pa zong hong zum mahmah hi. Hihciang na tun nang na thusim hong gendih o lawm ci-in kala papi pa kiang a dot leh thusim cih bang om kei e, “Nang zu leh sa mehbaihlua hi veteh,” cihsan hi.”

Ka pa in hih tangthu hong genkhit ciangin ka lupna lam zuanding in ka nu in kaban ah hong len in ka ihmu ta hi. Hih tangthu ka pa in hong genlai in, ka pa gei ah ka ngai a, ka zukham beng tawh gamlapi a thu kigen ngaih bangin ka za hi. Ahizong in tu in ka pa gamlapi mun khat ah omin kiho thei nawnlo,kimu thei nawnlo himah leng hong genngei thute ka naizak semsem ta hi.

Thomas Khanno