Ka phawkkik thukhat ~ Pau Do Lian

Ka phawkkik thukhat ~ Pau Do Lian

September 2012 Laisimkum in prof. Charles Hallisey (Harvard Divinity) class, “Introduction to Buddhist Narrative & Story Literature” kasin aa, class manciang sia aw na zumah konghawh pak theidiam kacih leh aw! ci in kava hawhleh tuani khuavot pian in coffee dawnkawmsa in ka paper gelhding topic kakuppih khitciang a tutna gei-ah suangbem azol kiuhkeuh (round stone) khat kamu hi. Gen kizomlo hih suang hoih si ee banga zat ding ahia kacih leh hongdawnna thu kaphawk kik hi.

“Tuma kumtampi lai in Sri Lanka ah Pali laitawh ka Ph.D. adingin research kabawla tuagam ah tawlpi khatmah ka om hi. Hih suangbem (round stone) bel luineu khatpan kalak hi-a, ahizongin hongphawksakdet khat omhi. Hihsuang ka etsimin lungmuanna (peaceful mind)leh kithutuakna (harmonious sign) lungsim hongpia den hi.

Banghanga lungmuanna leh kithutuakna hih suangbem in hongphawk sak hiam cihleh, hih suangpen abemsa apiang hilo a, sikli, sikguk aizong aphok liapluap khatpan in zolhil hial thei ahih na dingin leh abem kiukeu asuah theihna dingin tuakkhak tampi nei hi.

Hihbang suangte pen suangtom dangte in kum tampi gawigawi uh a, tuihual inzong kumtul tampibang ana nawknawkciangin kiutampi anei, aham mahmah, kiuli kiuguk bang anei hihsuang pen atawpna ah khoihkha lengzong nal (smooth) in bem (round) vivel in bektham lo in zolkilh kelh, siangtho mahmah hi.

Mihingte pen kideidan, ki elbawl kilangpan, kigawigawi in hamsat na kumtampi ihthuak khitciangin kilung kia in eileh ei nangawn kibawl siatding phamawh kisa nawnlo thei hi. Ahizongin hihbang hamsatna namtuamtuam te ihthuak takciangin, suangbem a zol hilhial zong kumtampi suangdangte’n ana gawina, kikhuksuk kikhukto ahihman in atawpna ah zolhilhial in etlawm ahihbang in tua leitung hamsatna (depression, frustration, stress, hardship etc) te thuak zo in hileng apua lampan mite’n hong etciangin etlawm in agim mite’n tawldam huai hongsa dinghi. Atom in cileng tua hanga ka zum ah hih suangbem akoih hi ing” hong cihi.

-behlap, Suangzong abem, azol hilhialsa a piang ahihloh mah bangin kiu tampi, aham tampi te kigawigawi aa azol hilhial mahbangin hamsatna namci’n te ihthuak takciangin atawpna ah eibanga hamsatna athuak kha mite’n hong enle uh tawldam huai, etlawm leh lungmuan huaisa ding hi. Pau Do Lian (Boston, Sept, 2012)