Ka phawkkhak velval kanu kam (8)

Ka phawkkhak velval kanu kam (8)

College kaman ciangin khua ah Sangsia siau in kasem hi. Ka naupangte in ‘lai a hahkatnop na ding leh ngimna kician’ a neih theih zawk nading ci-in Kalay University ah excursion paipih dingin kagel hi. Ka naupangte kiang ah kagen ciangin amau zong lawp thei mahmah ahih manin Sang kikhak (Saturday) ni khat in pai dingin kagel uhi.

Naupang te kiang ah “ansai ( restaurant ) ah an ne zolo ding ih hih manin an pen innpan in pua ding hi hang” ci-in ka vaikhak hi. Ken zong ka nu kiang ah kavai teng kagen a,“Nu aw, an hong huanbaih sak in, ken zong an pua ding hing” ka ci hi.

Sani ni zingsang hong tun ciangin ka naupang teng tawh ka inn uh panin ka ki ngak uhi. Apai thei ding teng kakim uh ciangin kavan teng la-in, ka setbing tung ah ka koih phei hi. Ka an puak ding la dingin ka kileh kik ciangin ka nu in kameh puak ding aktui na kan sak laitak hi. Aman ciangin ka anbeel ah hong guan sak pah in, ka meh ding ka-et leh limtuak sa meel lo-in tawm la-in ka ciap leh hul phelphal hi. Ka lung hong kim meel lo hi.

Tua laitak in innmai panin ka naupang te’n,“Sia, na man nai hia leh? Ko man gai ta ung ei! Na man a leh pai ta ni” hong ci uhi. Ka meh puak ding ka etet ciangin kaangvom pian lailai ahih manin ka heh hong suak semsem in ka nu kiang ah “Nu, nang’ na aktui kan, sathau khah lo maw?

A koi cidan hi bang meh kan, ki ne thei ding maw!” ci-in vut lak ah ka bua suk hi. Ka nu hong kilat vat in,“ Nuh aw! Ken aliim ding ci-in zantak in na pa\’ kiang ah ih akpi tui tang nih nong na lak kholh sak in ci-a, tua kong kansak hiven! Ih sathau bei kuan ahih ciang a, tampi na khah kha lo mah kai ve, Tawng!” hong ci! By,
Pau Khan Kap March 25, 2013