Ka Pa In Hongtelsiam ~ Pau Khan Kap

Tan (6) kasim laitak in ka khanpihte tuition kah ngeingai ahih manin ka pa kiang ah hong kahsak na dingin ka ngen hi.‘Na lawmte teng zong kahgai ahih leh nang zong kah le ci naïve le,’ ci-in hong kahsak hi. Nitak sangtuah khit leh zingsang sangpai ta-in ka kah den uh hi.

Kum hong cingto hanhan in bangmah kal lo-in sang hong kikhak ding hong hita hi. Sangkhak hun ding hong nai ciangin ka tuition siapa Siamung (Thang Khan Mung) in tuition kahteng picnic pai ding honggel in ‘Kalay Degree College (tu in Kalay University) en kawmin tua mun ah pai ding cih hong gen hi. Tua hun lai in picnic pai ciangin gamsung lam ah kipai zaw den-a, siapa in college ah pai ding cih hong gen ciangin lawplua in apai dingbang hipah liang leh ka ut hi.

Inn katun ciangin ka pa kiang ah kagen pah a,“Pa, ko ka siapa’n maw sani ni ciang taikua college ah picnic pai ding ci, kei zong pai nuam,” ci-in kangen hi. Ka pa in hong phal lo hi.‘Neu lai lua teh. Tungzo nai kei ni teh’ hong ci hi. Ka pa hong cih bangmah in tan (6) hipan in taikua gen loh khuaveng ciang zong sebeng (sik sakol) tawh ka pai nai kei hi. Ahi zongin pai nuam lua mahmah ka hih manin nitak sim in ka pa kiang ah ka ngen niloh hi. Ka pa in a lungsim khel tuan lo hi. Ka pa in hong totsim in ka nu pen ka pa lam ah pang den hi. Ka nu in zong, “ maikum lam ah apai kik ciangin pai pan in. Ma khawng ah sebing sik zolo, tung zolo khawngin na lawmte-in nang guak khawng mun khat khawng ah hong nusia in teh. Na pai hun ding tam mahmah lai,” ci-in hong kho hi.

Ka siate inn pen ka innmai uh ahih manin sani ni zingsang hong tun ciangin ka lawm apai thei dingteng siate innmai ah kingak ngeingai in gamlum henhan hi. Ka lawmte en in tuangdung tungah tu in ka om laitak ka pa in anhuan buk panin hong sam hi. Na hongsawl ding sa-in ka pai phei leh,“Ut mahmah in, mangngilh mawh ding na hih leh kithawi in pai ve leh,” hong ci hi. Ka lungsim van-aa khai bangin ka nuam dan genzawh ding hilo hi.

Ka kumtawh kituak nailo, ka lawmte sangin neu zawh phial in atung zonai lo takpi ding ka hih phial zongin ka pa in ka lunggulhna, ka utna te hong telsiam in, hong muan lohna sangin hong khualna liansak zaw in, hong phal pen ka khansung in ka mangngilh mawh ding leh ka pom ding thu in hong om ta!

Pau Kap

Columbus, OH
August 11, 2016