Ka muhpak US Gamthu pawlkhat – 56

Ka muhpak US Gamthu pawlkhat – 56

911 Sam Ngei
Nitak khat ka na sepna ah kei anbuk sabuai tung a, lai gelhgelh a ka om lai takin, ka mite khatpa in pau lo phun lo in a lawmpa na tum vat mawk a, a nak hong si pah neiinaii hi. Tua naksii pa in zong 911 na sam ziau hi. Palikte minute 5 zong cing man lo in hong tung pah uhhi. Cina puakna mawtaw leh palik mawtaw nih hong tung pah lian hi. Amau mawtawte khempeuh in siren gingsakin meisan mei eng mei dum phiasak pah zangzang kawmsa in inn maitengah khawl pah hetthatt uhhi.

Palikte hong tun uh ciangin ka mi tumpa pum mat in lehhen pah a, thungsung mah puakpah vingveng hi. A tup thuakpa pen mi nih in a nak teng veelsak phitphet a, a nak si bek hi in nasia liam lo a hih manin a sawtlo in hong nusia kik pah uh hi. Kei pen FIR (First Information Report) hong gelhsak pah a, ahi bangbangin gelh in ka pia pah hi.

Nidang in 911 tawh kisai a thu a thei bek ka hi a, kei mahmah in ka tuah khak ciangin US te pen thupi kasa mahmah kankan hi. Patau meikang hi leh meiphelh mawtaw kibehlap lai ding hi. Kawlgam ah movie sung khawng a ih muh bek hi a, amau datshin/biscope kizaih ding ciang a, ahoih theithei ding aa kithawi akibawltawm bek na hi het lo in, a mau a zat tangtang mah na hi takpi mawk uhhi.

Ka mite hong matsakpa bang a tha gol iim-eem native Americante hi a, amat ding ciangin ut lo in palik khat pa na tum vat sawnsawn hi. Leh hen ding a cih ciangin hong kitom bualbual lai mawk ahih manin, palik nih in bawhhuan in sialpaai a kolbulh pah uhhi. Hih lam a palikte zong a tha muanhuai pian vive mah hi kei leh, a baih ding bang hi zeeng lo hi. Amau bel tua bang a mi a man ding aa, a pai uh ciangin, a bu pa uh tawh a tawm pen 4 bang kithuah den uhhi. Palik omna zum khempeuh ah 24hr kigingsa vive a om sinsen na hi mawk uhhi.

(azom omlai hi…)

Agelh: Awn Za Pau