Ka muhpak US Gamthu pawlkhat – 52

Ka muhpak US Gamthu pawlkhat – 52

Teek Zawhnua Guaii Zawhnua In
Amun a mual mah zui in na sem lo a innsung bek lawmlawm a om ngitnget zong hong nuam khin sam lo hi. Mangpau kisinna ding zattheihna ding mahmah zong America gam a om buang kisam sa mahmah ka hih manin, ka tuntung lam car driving license zong ngah nailopi, Bios Corp kici mi tangpillote leh mi cidam thahat lote kepna ah na sep ka siau hi. Ka siauh zawh a sawt lo in nasep hongpiak zawh nailohna thu kamkhum tak tawh ong zasak kik pah uhhi.

Tua zawh sawtpi khittak ciangin VOA (Volunteers of America) ah nasep ka siau leuleu a, a mun awng thei nai kei ci in hong pia lo leuleu a, papite pau leh nehzawhthu a zong nupi papi akiteng na om kiukiu sam buang ahih teh cia, nipi thum sung bang nipi khat hal sim in kimat in ka va dawp thithe leh a sawtteh amau zong hong kisuangtaak mahmah ta uh ahi tam, kha thum kha li lo in bangmah kilamdang lo ding hi.. hong cih ciangin, ka mai na leng hong zum maita in ka dawp kik ngamnawn loh bek thamloh in, koimah peuhmah ah ka siau ngam nawn kei hi.

Ka kum lah pensen lak hun hita bek tham lo in US gam sungah na sem ngei lo ka hih manin, a beisa a nasep ngeiteng hong kidot ciangin (past work story) gen ding bangmah om lo hi. Kawlgam a nasepnate leh nasep siauhna zong kisai khollo ahih ziakin ka gelh kei zaw hi. Tuate va gelh zenzen leng nasepna ding tawh kisai khollo ahih ban ah deihloh zawkna teng a hong neih bungleh ding zong ki-ut lo hi.

Tua ahih manin bangmah amau gam a nasem ngeilo uham khat pen hong laak ding haksa sa mahmah uhhi. Tua bek hi lo in ko tun kum akipan USA te a zawn mahmah laitak uh, nasep ngah lo a tam mahmah hun laitak hi sawnsawn a, amau gammite na-ngawn nasep ngah ding haksa sa mahmah uhhi. Setzung nasep leh ansai nasep khawng lah khanghamte sep zawh ding zong hi het lo banah sep ding mahmah zong ka sawm vet kei hi.

Engineer nasep lah bangzahta a ih pil ih siam zongin amau gam degree ahih kei ngal leh hong pia ding bang hi naiisaii lo hi. Kum hamta a amau gammi a sem sate zong pension la tek khinta ahih manin amau degree ih ngah phial mah zong in, ei deih khasum tawh hong sepsak hun ding zong hi nawn lo hi. Tua teng huhau in Public Works tawh kisai company khat peuhmah ah siauh ka sawm vet kei hi. Hong pia ta mah leh zong computer vive tawh na kisem hi mawk ahih manin, hong buai huai lua mahmah ding hi lai hi.

(azom omlai hi…)

Agelh: Awn Za Pau