Ka muhpak US Gamthu pawlkhat – 38

Ka muhpak US Gamthu pawlkhat – 38

USA Khanghamte’ Om Dan
Aphual ih tunma ih galzakna ah a khangto gam ahi Americante in a zi a papi tawh kikhen ziauziau a, avekpi a kigawm zi li zi nga nei, pasal thum leh li nei om acih pen a maan zong a maan mah ahihi. A tamzaw mihau mi lian mipil misiam mi minthangte leh movie star kici mi kineihsiamte sungah tam pen hi. A diakdiak in numei lampan kimakna tamzaw hi. Pasalte maak tam lo zaw hi.

Pasal lam pan maa’ hi leh a neihsa a bang tampitak mah piakkul ahih manin pasalte maak tam khollo zaw hi. Numeite lungkim zolo a pasal laihlaih bel om thei peuhmah uhhi. Maizum ngaihsut lo uhhi. A pasal/zi thak leh a pasal/zi lui bang hangtakin zum ngaihsut lo in mi lakah zong a maan bangbang mahin kihil (introduce) kitheisak tangtang thei lai uhhi. A kinupa ngeilo bangkhat in om thei pakpak lel uhhi.

Hih nupa vaii tawh kisai ah a zawng mahmah innkuan sungah zawn luat manin bangkua sungah nupa kilemlo in kikhenna a om theih mah bangin, a hau mahmahte leh a minthang mahmahte nupa sungah zong kihihsakna kiphatsakna kidemna tungnun nopna hangin nupa kilemlo in kikhenna tam hi cin ka mu hi.

Numei pawl khatte leuleu ciangin mihau hi peuh leh akhangham theithei papi zong deih mai lel uhhi. Si mengmeng in a gamh luah leng la a dang khat nei kik leuleu leng cia, sum zonna dan a, anei zong tampitak om tuak mai lel uhhi.

Tua kawmkal mahah ami bupin en leuleu leng, a tamzaw mah teek leh guaikutt in kitulpih uh a, a-eenhuai aki-it a kingaih tuak mahmah uham khinsa a hi zongin, piiteek puteek ahi zongin tampi takmah kimu thei leuleu hi. Sumbuk ah van lei dingin a nupa in pai in kizui helhel uhhi. Ei lam ah ih kongzing lampite lah kawcik in ih lokuanna zawite lah maikim a pai theihna ding zong a om meelloh si tawh, amau zah mah in ki-it kingai mahmah napi hang, nupa maikim a khut kilen kikawisa a nupa tonkhawm cih ih om kei hi. Tua bang a kikawi kipom helhel ding ih ut ih zang nuam ta teu zongin, ih nuntak zia, ih khuasak zia leh ih gam ih lei kiat zia in hong dal hi.

Tu dong mah in ih Zogamah a khangno lai nupate akipan piteek puteek nupa dong azi in apasal nungbek a zuih bek tawh kibanglo in mikang nupate maikim mah in khut kilenin vakhu nupa mah bangin kizui helhel in ki-it tuak thei phadiak mahmah uhhi. Khangno pawl khat bang anu apate mai leh a sungnu a sungpa mai khawng naleng ah a zite a pasalte khawng kawi bikbekin tawp dakdak thei lai mawk uhhi.

A taktak nupa cih buang ahi mah ding hi a, atawpna ah aki-itdan akizopdan uh zong siam se zaw hamtang mah uh ahihi. Ennhuai lua mahmah uhhi. Piteek puteekte bang ahat zawzaw a cidam zawzaw in a zi a hi zongin a pasal a hi zongin thudon in ki-makaih tangtang uhhi.Tua bang aa gamtat luheek dante akimuh ciangin Zomi zi neisa pasal neisa papi nupite in zong eeng mahmah napi, a taktakin amau dan kizui thei naii mahmah lo phot hi.

Ei lam ah nupi pawl khat in niin a neih nawn loh ciangin, nu leh pa vaii ah bangmah ukna nei nawn lo ahih manin, ganhing a nute in a huk ciang bek a, a pate a it bawl a ngaih bawl bek bangmah in, a naii mahmah zong ah kinehsak nawn lo in, a pasalte a limbawl nawn het lo pawlkhat ki-om thei mawk hi. Tua bangte pen mihing lungsim ki-itna kingaihna bulphuh lo tawh kibangin, ganhing ngeiingeii tawh a kibang kisuak kik zaw gige hi. Hih lam ah nupa kiteeng a kho ngialte itna ngaihna takpi tawh teekkuut guai kutt mahin kikhoi kipomin, sacia nupa bangin kithuah helhel uh aa thupi kasa mahmah hi.

Ih khua lam a nupi papite piteek puteekte mah bangin a gamtat zawh liaii nak uh leh om khong thei lo in a innsung a innpua ahuangteng uh hah tangtang uhhi. A neu limtak a mawtaw tawh khangkhia ahih mah bangin, bang zahta in teek in u-ham mahmah tase leh, mawtaw tung a kah zawh lai liai nak leh mawtaw hawlin a utna peuh pai thei ziauziau uhhi. Kum 80 valte ci vet kei ni kum 90 gual vive na-ngawn in hawllai tautau mawk uhhi.

Khat khatte a pasal bang si hi leh a teek a guai dong amah kia mah a innah om zaw uhhi. Pasalte leuleu ciangin a kem a khoi ding a omloh a phamawh zawdeuh se a hi tam.. piiteek puteek khoina kepna innpi ah kikoih thei zaw hamtang hi. A tangpil a navaak lote zong a innah om lo zaw in uham kepna innpi ah kikoih hi.

Amau leh amau kisikh zolo ta dingin kumpi in a vaihawm sak mah bangin, mihau mahmahte leuleu ciangin a nuam theithei an a lim theithei pia in kha khat bang mikhat ai dingin $6000 akipiakna phualpi zong om hi. Tuate pen company khat peuh in tavuan la a, atu atate nasem manlah vive ahih manin a nupakop ahi zongin, meigong piteek puteek ahi zong in tua munphual khatah ki-om sak hi.

Mikangte thupit dan pen khangto lua kisa in ganhing vaii dan mahmah kik bilbel hi. Akpi in a tate khua hun a sak ciangin a kha nuai ah koih nawn lo in akha nuai beel ding a pai masasa a tuk gawp mah bangin, a tate uh a diakdiakin a tapasalte bang kum 18 a cin zawh uh High School a man zawh uh ciangin a innah omsak nawn lo in a mah leh amah nuntakna ding zongsak uh hi.

Ahi zongin a mihaute in a college sangkahna ding khawng bel sikh mahmah leuleu uhhi. Tua lo a lailawm pianteng in a sangsap ding leh a neektawm ding amau leh amau in tha lawh tawm uhhi. Ei lam bang lo in a sum thalawhna ding zong na om hamtang hi.

Ganhing tawh ka teh ka cih ciangin ih tel theihna ding ka cihna hi a, amau lungsim leh kipattah dan pen a niam muh ka hi kei a, thupi ka sak luat man hi zaw hi. Kumpi na ka sep lai in ka khutnuai a Kawlte EE khat in, (U Kyaw Lin, tun 2010 kumin MD kici Managing Director, Public Works ah a lian pen za na leng ngah khin), Sia aw na om dan lah bo style mahmah ve cin, a hiang na tate na pattahna dan leuleu teh Asian style mahmah zel ve teh aw hong ci ngei hi. Bo style aa om buangin mikang danin uk thei leng a hoih zaw tham ding ahihi.

Nidangin mikangte in a nu apa zahtak lo ka sak leh ka bul kan leh ka bul theih ciangin, a nu a pa a zahtak dan pen thupi mahmah hi. Amau sang a upa zaw zalian zawte zong a zahtakna na nei mahmah uhhi. Ei lam ah piteek puteek zong ci lo in teeksianu teeksiapa kici in numei uham khin piante bang ‘nupi sangsia’ peuh ih kicih liang lawmlawm bang lo in, piteek puteekte bang zahtak bawl in lim bawl mahmah lim kep mahmah uhhi.

Movie sung khawngah tua bang kilim zat lo ahih manin, e’n (eite in) a taktak tua bang dan mah ding a kisa kha mawkmawk ahihi. Omdan khawldan nu leh pa zahtak dan, upa zaw ulian za nei zawte zahtak dan cih khawng pen, a mau aa’ vive mah ei sang’ a khangto masa zaw ih Kawlten a na la na hi gige hi. Tua hi a, Kawlte omdan a hoih nonote ih laak ih ciinh pahpah ding na hi gige hi.

Mikang gamah khangto mahmah lua liang ahih manin TV, computer, Internet te sungah naupang nono leh a kum cing naii lo (Kum 18 nuaisiah) muh ding a kilawm lo tampi tak om a, kum 18 a phak mateng a inn sungah, a mau ut bangbang a et dingin kiphal lo uhhi. Laisim hun, kimawl hun, TV, computer et hun cih bangin a hun hoih tak in gel in ki-uk uhhi. Kum 18-21 khitteh bel a mau leh amau in ding ta uhhi.

Gentehna in hi lam aa mikangte a ki-ukdan leh a kipattah dan hoih ka sak mahmah tampite lak ah, a tate khat leh khat kitawng kina in kam kinial in hi leh ahun lap in phelh pahpah uh a, amau kitotna tawh kisai kua maan aa kua khial zaw cih sittel kantel pah villvell in athu khen pah uhhi. A mawh zawzaw in a maan zaw pa/nu kiangah khial ing mawh ing ci in kithumsak pah hi. A tang a maan zaw pa in zong na mawhna hong maisak ing ci in khut kilen in ki-angkawi sak pah uh aa, tua tawh a lungsim sungah vomsak suak nawn lo in a lungsim uh siangtho sak pah uh hi. Tua ahih manin a tam zaw khat leh khat kinuak kiho lo cih bang om lo pah uhhi.

Tua banah a tate a neu aa kipan a zuih ding uh, laisim hun, TV et hun, Computer sawk hun, laisim hun kimawl hun, lup hun thawh hun cih bangin thukhun bawl uh aa, a thukhunte a palsat leh danpiakna (punishment) nei tangtang uhhi. Sat dan cih bang zang lo uhhi. Tua cih thadah a lu a gil a nungzang cih khawng kibetsak ding phal lo uhhi. A tawbo meek sak sik sak cih dan bek phal uh aa, naupang pangbet vava cih lam zang lo uhhi. A thupi lua lote ah adaan piakna in tawm vei sung dingsak cih khawng zang hi. A thu mang lo mahmahte a innkhan sungah a nai ciangtan in kalhcip cih khawng, an neek khat ngawl sak cih khawng a tuamtuam zang uhhi. Tua mah bangin thukhun maanmaan aa a zuih leh zong pahtawina (reward) kipia tangtang aa thalawp sak semsem uhhi.

Naupang pen ulian mah bang aa ih thusim ding ih pi bawl ding thupi mahmah leuleu hi. A zenzen in thu khat peuhah amah a khiallopi a khial bangin na mawk suat khialh khak leh, ulian mah bangin; “Ka ta aw kong theih cian lohpi kong mawk suat, khial kha ing, hong thum ing “ ci in thum kik tangtang in. Tua pen thupi mahmah hi. Na ta pen a lungkim mahmah pah ding aa tua na thumna tung pan amahmah in kilam thakna ngah beh pah ding hi. Pasian deihna Pasian thu mah bulphuh in itna tawh ih pattah tangtang theih ding kisam mahmah hi.

Hih thu tawh kisai pen hih ka laigelh a simkha u leh naute in ih tu ih tate tua bang dan aa ih pattah tek ding kong deihsak mahmah hi. Adiakdiak in ih tano ih tunote ciimna pilna ngah nading a kem a cing nute tungah tampi kinga hi. Napoleon in; “Leitungah Numei (Nupi) Pil/Ciim Vive Nei Leng Ih Tu Ih Tate Hong Pil Ciat Pah Ding aa, Ih Gam Hong Khangto Mahmah Pah Ding Hi” na ci hi.

Ei Kawlgam ah pen Sente lobuang a dang Kawl leh Zote akipan tate pattah dan kisiam lo in, leitung nuntakna sungah a thupi penpen ahi, ih nuntak sungah gilvah tak a ih neek khop ding an leh tui, silh leh ten, inn leh lo, ei leh ei in zon tawm dingin kipantah lo zaw in, a nu apa nuntak laiteng nu leh pa tungah a kinga den uh hi zaw mawk uhhi. Nute pate neihsa amau a’dingin ngaihsun in maanh nek ding lam vive lungsim ih guan hi. Tua pen ih pattah dan ih siamlohna hang na hi zaw gige hi.

A taktak ih tu ih tate ama khe ama khut tawh ding zo sem zo ding aa ih pattah zawh leh tua pen tate pattahna lakah a hoih penpen ahihi. Ih tu ih tate pattah siamna dingin ih zi ih tanute’ a pil a siam masak ding kisam a, tua ih zi ih tanu ih tapate a pattah siam dingin pasal pil, pasal ciim, pasal picing ih hih zawh tek masak ding kisam penpen hi.

(azom omlai hi…)

Agelh: Awn Za Pau