Ka muhpak US Gamthu pawlkhat (2) ~ Awn Za Pau

Ka muhpak US Gamthu pawlkhat (2) ~ Awn Za Pau

Khua Lum Ciangin Singkungte Sel Kik

Mikang pau in Spring kici March kha pan May kha sungah Phalbi hun hong bei hi. June – July – August sung pen khua khal hun hi leuleu hi. Spring hun pan kipan in khua hong lum ciangin, atehpulh singkung khempeuh hongsel din kithawi leuleu hi. Singkung pawl khatte a masa in akungbup in hong paak ziaizuai hi. Akung bup in paak zeizai ahih manin paak meel a tuamtuam, a san a kang, a naai eng cih bang bangin meel tamtuam tawh kihelh dimdiam a et lawm pha mahmah leuleu hi.

Tua zawh teh ateh leh agah kitonin hong selkhawm hong gah khawm hi. Pawl khatte leuleu teh ateh bekmah a selpah pawl khat om leuleu hi. Spring hun pat sawng teng akipan Summer bei kuan dong singkung lopa khempeuh dum sitset leh nim dildial ki-thuah khawm aa, etlawm silsial mahmah hun ahihi.

US gam pen khua hun kikheel baih mahmah hi. Kum khat leh kum khat zong kibang peuhmah lo hi. Atung a singkung te bang pen March kha bei kuan ciang a, paak ding a kithawi a om patpat hangin, khua hong lum baih peuh leh March kha laizang khawng in paak dingin hong kipan khin mawk hi.

Hih hun sungah singkung lopa nim dildial dum sitset aa etlawm mahmah hun hi tase leh, April pan September kha ciang kha 6 hun sung pen pingpei/sumpei kipei hun, huihsia guahsia nun hun leh zuk hunin kiciamteh hi. Tua hun sung tengah “tornado prone areas” kici a tam vei pha deuh pingpeipi/sumpeipi kipei theihna munte ah a nuai aa khuapi leh gamte kihel hi.

Cities:

• 01. Oklahoma City, OK
• 02. Huntsville, AL
• 03. Topeka, KS
• 04. Tulsa, OK
• 05. Shreveport, LA
• 06. Nashville, TN
• 07. Wichita Falls, TX
• 08. Wichita, KS
• 09. Birmingham, AL
• 10. Lincoln, NE

States:

• 01. Kansas
• 02. Oklahoma
• 03. Texas
• 04. Alabama
• 05. Nebraska
• 06. Arkansas
• 07. Iowa
• 08. Louisiana
• 09. Missouri
• 10. Indiana

Ahih hangin a taktak ciangin khuahun zong kum khat leh kum khat kibang kilkel lo in kikheelkheel niloh aa, gen kholh theih taktakna om nawn lo mai hi. 2013 kum November 17 ni in Illinois, Indiana leh Michigan state kim teng ah huihpi nak nun mahmahin, Washington, Illinois sungteng bangah nasia nun mahmah in inn tampi a suksiat banah mihing zong 8 tak si hi.

Ei Kawlgam tawh kileh bulh linlian pen, ei lamah Summer pen ih gam a keu mahmah san laitak ahihi. Hi lamah Summer kici June, July, August pen singkung lopa khem peuh hing sitset dum sitset a om hun laitak leh guah lah a utlai peuh in zu hi.

A khua hun pen eilam mah bangin a sat mahmah hun ahih hangin agam uh keu gemgam cih omlo a, singkung lopa khempeuh ahing sitset hun adum dildial hun laitak hi zaw kik bilbel hi. Khuasung mun khempeuhah tui buakna ding a baihsa in kikoih khin hi. Tua ahih ziakin innmai teng khempeuh leh lamdung khempeuh lopa hoihtakin kimeet mai dikdek in eng dildial a lungnop huai mahmah hi. (azom omlai hi…) Agelh: Awn Za Pau