Ka khangno pihte thapiakna ~ Lia Niangboih

Ka khangno pihte thapiakna ~ Lia Niangboih

I ngaihsutzia hei leng na khat peuhpeuh i muhzia hong kilamdanga, i sanzia leh i etzia hong kilaih mawk hi. Tua mah bangin mi-in ei tunga a lungsim puakzia uh zong i upmawh na banglo thei a, i upmawhna sang na hoihzaw-in zong na siazaw thei veve hi. Tua ahih manin tutung bel i lungsim mit limlangte bulh pakin, na a hoihzaw i muh theihna ding leh mite hoihna leh hong deihsakna thute khaubang suut dih ve ni e, a ci ihi hi.

1) Mite in na lawhcinding hong deihsak uhhi

Na sep na bawlna bangbangah gual tung vabang tuangin na mavan, na daupai ding mite’n hong deihsak uh hi. Ngaihsun mah dih ve, hua lai-a mi thanuam, citak taka lawhcing nuama a sem tangtang khat pen kua-in khaktan nuam laizang ding ahi hiam?

Khaktan buang lo e. A hangin, nang na lawhcin leh nang bek a lawhcing na hi kei a, na innkuanpih, nu-le-pa, sanggam u-le-nau, beh-le-phung, lawm-le-gual leh minam bup zong a lawhcing suak dinga. A taangzai zaw-in ci leng leitungah mi khat a lawhcing hong suak mawk ding hi ven e! Nak lungdamhuai lua lo ding maw tua pen? Lungdamhuai khong e. Hi thei hi leh zam leh khuang tawh, lamna leh dianna tawh lop ziahziah taak liang hi.

Tua ahih manin lungneu khakunin ah, “Kua mahin hong thusim beek kei, hong deihsak beek kei, zong hong phawk kha beek kei uh, ka hanciam ciam hang bangmah a metna om kei” ci ke’n la, tua sangin na omna peuhpeuhah, na tunna ciangciang pan, bangci bang dinmunah na ding zong, hehpihna tawh lungkia lo-in hong hanciam teta lai mai ve. Leitungin mi lawhsam khat hi lo-in mi lawhcing khat hong kineih behlap ding hi mawk ahih cianga.

2) Mite in na laipilding hong deihsak uhhi

Na laitaan a hong san ding, na leitung pilna nisima a kibehlap tohtoh ding pen mite’n na zadah tuan sam hetlo uh hi. Zadah cih thadah, nang’ laipilna leh siamna hangin na angtang mahmah uh a, hong suang bek hilo-in, hong lungdampihin, nuam na sa tuam mahmah uh hi cih phawk in.

Nang hong ciim hong pil lecin u-le-nau, beh-le-phung, pawlpi leh minam sungah bek thamlo-in leitung bupah mipil misiam khat hong om beh zen ding cih pen bang zahta-in thangahhuai-in lungdamhuai lo ding ahi hiam?

Khatvei tha hong sankik in la, lungkiatna nusia-in, Vai Mang siamsil na sinna ah deihtak ma hong pangthak dih ve, lawm. Na pil na siam ding kua ma’n hong khaam lah hi zenzen lo a, na nu na pa, na sangsiate leh sanga na pawlpihte’n (classmates) lah “Nang bel na pil na siam ding kong phal kei uh hi, pilna zong dah mai in” hong ci lah hi peuhmah lo ding a. Hong khaam lo hong lanpang lo bek tham lo-in, leitungin nang bang mipil, misiam a kisap mahmah laitak hi zaw hi.

3) Mite in mihoih khat na suahding hong deihsak uhhi

“Hih leitung siatna sunga kibual mi tampitak sung pan nang beek mi hoih khat hong suak tapeuh in” cih pen mite’ thuumna hi.

Nang pen Pasian a zahtak, mite adinga na hoih a sem, taangpi-taangta, gam-le-nam adingin thupha hong hi peuhmah leteh bel a lungnophuai ding dan ka kamin cin kei liang ei, gen vet dah hi. Nang bang mi hoih leitungah nong pianna hangin Pasian tungah lungdamthu bang a kikoh lawh phial ding hi.

Hih thute na sinlai ah vaibang na thaamsak den in la, “Kei na hoih sep, kei cihtak leh thuman khawng kua-in hong theihpih ding lah hilo a, a phattuamna om kei” ci zaw lo-in, lungkia lo-in na hoih sep ding na hanciam toto lai in.

Galati 6:9 – Tua ahih manin na hoih sep ding cimtak kei ni. Lungkia lo-in i sep nakleh a hun ciangin thaman i ngah ding hi.

Mi sia/ mi hoihlo khat suaka, a kisia zo leitung a bawlphakik ding mi hoih na suah loh ding kidah peuhmah hi.

4) Mite in na hauhding hong deihsak uhhi

Simlei mi zatam liangvai, lungmawl, simzawng daipam, nek ding taak ding kicing nei zolote’n :

• “Ka sung gilkial,
• Ka laidiip nem,
• Ka silhpuan sia,
• Ka saulim sia,
• Cikciang lametna khuavak hong tang dinga,
• Cikciang lainatna tongdam nem hong luang dinga,
• Cikciang huibang ka mauna theng dinga,
• Kua siang panin huhna hong pai ding hiam Sian aw?”

Ci-in nuntakna zing nino thak hong suah ding kal haibang na ngak uh hi. Hih mite a huh, a panpih ding, gentheihna sal pana a suaktasak ding pen nang longal Pasianin mi neilo a, nang khut leh khe longal Pasianin khut leh khe a zat ding nei tuanlo hi.

Tua ahih manin lungkia kei in. Kua ma’n na hauh ding hong phallo cih thadah mi zatamte lai lungmuanna leh lametna khuavak na hi hi. *Mikimin hong deihsak lo uh hi ven, hong hazate khawng bang lawh ding?*

Leitungah a sia om a, a pha zong om hi. Tua mah bangin mite’n hong deihsak thu i sutsut laitakin, hong haza, hong sikcip sawm, mi tunga i len ding mahmah hong deihsak ngiatlo, bangmah i suak kei zonga phamawh a salo mi na om veve ding hi. Tua lamte bel thutuamin koih ni, geelin zong nei dah ni.

Ahi zong lam khatah bel, tua bang ngaihsutna hoihlo leh mi hazatna lungsim a neite mi sia lua zong hi pah samlo uh hi. Mihing pen a mawh thei a khial thei tek mah i hi a, i mihing lungsim pen Pasian i puahphatsak mengmeng loh ciang a kihici thei mah hi. Tua ahih manin eite pen amau kammal nih-le-khat tawh a puk pahte hi zaw lo-in, thusia pen thu hoih tawh zo a, maisakna leh itna lungsim tawh thu i ngetsak ding hi zaw hi.

I deih bulpi ahih leh tua bang thusia lasiate tungah lengto a, mi a tamzaw in hong deihsak lam phawk kawm a mai i nawt ding ahi hi. Nang lama pang mi tawm na sa lua lai hiam? Thusim khat hong hilh ning aw. Mite bek hilo Pasian nangawn ei lamah hong pang ai ve. Tua bek thamlo la in zong hong hilh lailai :

• “Ei lamah Pasian, ei lamah Pasian
• Ei lam hong pang leh
• Kua i lanpang zo ding? Kua? Kua? Kua?
• Kua i langpang zo, kua pang zo ding?

Rom 8:31 – Tua bang ahih leh hih thu hangin bang gen ding ihi hiam? Pasian in eite lamsangah a om leh, kua in eite lang khatah a pang zo ding hiam?

Thukhupna

Lungkia ke’n. Kua mahin nang hong dal lo hi. Kua mahin nang hong khaam lo hi. Kua mahin nang hong khaktan lo hi. Mite nang’ lamah pang uh a, Pasian zong nang lamah hong pang hi. Lia Niang Lun Kim