K. Khuadopawi – Sian’suahpawi ~ Lengtong Pauno

K. Khuadopawi – Sian’suahpawi ~ Lengtong Pauno

Khanglui ipi ipu inu ipa te in, kumsial Khuadoni zingsang ta in, azingmai uh phiata, Khuadoni ta in ki pumsil uhi. Piteek nuteek te’n zong kumsial Khuadoni ta in asam uh sathaunilh, hiatin, pheek uhi.

Naupangte zong kumsial Khuadoni ta mahin, mai kiphiatsak,sam kimeetsak, khutcin khecin kitanhsak, khetaal kinawtsak, mitnaai kisiaksak, nap kiniitsak, bilkhem kilaaksak hi.

Kumsial Khuado kuanh ciangin, Khuasung kipuah kivaat, innkiim innpaam inntual innnuai guultawngh ki siangthosak, hanmual kihaha, Khuadoni taktak ciangin, mi khempeuhin, pumpi siangthosak, puansiangtho silhin, dawi le kau ki hawlkhia hi. Muhbattanh hi. Ka lungdam, Munkhai’pa

Itna taktak icih in

• Mumunuam lualiang in – en vetlo,
• Hopihpihnuam lualiang in – pau vetlo,
• Neekngaih lualiang in – ngolh,
• Deihsak lualiang in – pialo,
• Aa’naa lualiang in – kawmhlo,
• Cihkhawng na hizaw thei zaanzaanh 🙂

PASIANIN MIHINGKHAT HONGBAWL CIANGIN

Asia apha akhenteltheidingin ikhuakpen, asangpenmunah koiha, pumpi lungsim auk akeemdingin ilungtangpen, igilpitung iawmsungah koihhi. Ahizongin, khatveivei mihingte in, ilungtang iluzangah pua a, ikhuakpen, (igilpi nuailam) leilak ah ivaaksak khathei zel hi. A ihmu mu, alusu su khuakzong om hi. 🙂  Fb comment tampi kamuhna pan… Ka lungdam, Munkhai’pa

Khuabawl leh Khuado (kei’theihbat tanh tomkim)

Thumasa: Khua icihpen, ipu ipate in, thusia thupha hong piathei, vaangliatna anei Pute pen, ”Khua” aci uh nahi gige hi. Mizo te’n tunidong ”Khuanu” cilai uhi.

Khuabawl (Tualbawl)

Lo kivat kihal, mangkitom, khuapi guah hongzu, vaimim kituh, taang kivawh, singno anno kisuan…

Khua te’ tungah, guahtui hoih, nitaangpha ngetna in, khua upate leh dawisiampi’pa in khuasung Tual acihna munah,voksong khat phut, vokgo in tualbiakna (Khuabawl) vanei uhi.

Anek akhamval uh anlemehte zong innah kitawi kipua theilo a, leisungah phum uhi.(Jew mite’ Paisan pawi tawh kibang hi). Hihpen mikang kha in April kha tawh kituak pen hi.

Khuado

Khuabawl (Tualbawl) ni a, ibiak ithoih ipaai ilut inget ideihnate ipu “Khua” te’n hongpia a, tuukan khempeuh aki laakkhit siang siset khit, ineek hunding ciangin, Khua te’n hong neekpih leh neekliauding, tuuk tun’kik kikhomlo ding ahihcianga, zulim anlim salim tengtawh Do (Vaak) phitphet masa phota, aki Do (aki not, aki hawl) khia ahi hi.

Hihmun ah ”Do” pen namnihin kizang hi.

• Do (Vaak) zindo, leenglado cihna
• Do (Galdo) notkhia, hawlkhia cihna

Khuado pen tuuk anlakkhit ahihman khua khat le khat ki banglo hi. Sim, Zo, Mal lam kibanglo hi. Ko’ gundung simlam ah, September/October khasung hipen hi.

Buhciing Malgamlam te’n, Lungdambawl leh Kumthak kikal ah Khuado uhi. Keimuh kei’theih battanh hi. Ka lungdam, Munkhai’pa