Jesu Khephung ah a thu ngai ni

Jesu Khephung ah a thu ngai ni

“Martha in Mary kici nau numei khat nei a, Topa’ thugente ngai-in Mary a om hi.”(Luke 10:39) : Mihingte khat leh khat I leitung nuntakna sungah, I nuntakzia kibang hetlo ciat hi. Pawlkhat thuman in citak mahmah. Pawlkhat thuman hetlo in gilo mahmah zawlai. Pawlkhat biakna hahkat mahmah, pawlkhat leuleu in ngaihsak vetlo. Ni khat ni ciangin hong bawlpa Pasian mai ah thukhenna tuak tek ding. I nuntakna zia tawh kituakin thu hong kikhen ding cih thei ciat khin zo hi hang.

Hih leitung I nuntak sungin, kum bangzah nungta cih sangin koici nuntak cih thupizaw hi. Lai Siangtho sunga mi thupi tampite’ lakah Mary zong khat in kisim tel hi. Amah Mary pen kum bangzah nungta cih I Lai Siangtho sungah a kigelh lian loh hangin koici nuntak cih Lai Siangtho tungtawn in I thei ding hi.

Lai Siangtho sungah Mary min nei numei 6 om uh hi. Hih teng lakah Bethani khuami Mary pen Lai Siangtho sungah thum vei bek kimu hi (Lk 10:39, Jn 11:39, Jn 12:3). Thumvei bek a kimuh hangin tua thumvei a kimuhna panin Jesu khephung vive ah om citciat hi. Eite zong I nuntakna kisuut kik leh bang phung vive ah ahi diam? Mary’ nuntakna Lai Siangtho in thumvei bek a gelh hangin a nuntak sunga a thupi mahmah thu thum hong lak hi. (i) Mary in Jesu khephung ah A thu ngai hi. (ii) A dahna Jesu khephungah tun hi. (iii) A manpha pen Jesu khephungah pia hi.

Leitung thu I theih nadingin TV ki-en hi. Radio kingai hi. Newspaper kisim hi. Pasian’ thu I theih nading in bang I en a, bang I ngai a, bang I sim hiam? Mary in Jesu khephung ah tu in “Jesu’ thugente ngai hi,” ci hi. Sun leh zanin Topa’ thu lung ngaingai mite pen Lai Siangtho in thupha ngah ci hi (Late 1:2). Jesu mitsuan gige ni (Heb 12:2) ci hi. Na khete kalsuan thei nawn loin, na pai nading lampi a mial hiam? Pasian’ thu in lam hong lak meivak ahi hi (Late 119:105).

Jesu mun khempeuh ah om ahih manin kiniamkhiatna tawh Lai Siangtho sima Pasian’ thu I lungngaihna pen tuni in eite’ adingin Mary bangin Jesu khephunga tu a, Jesu’ thugente I ngaihna ahi hi. Amen.
Source: Fellowship News