It zawhna maw, up ziauna?

It zawhna maw, up ziauna?

Mihingte in Pasian heh hi cih thu awlmawh lo uh hi. Pasian’ hehna lau ngaihsut nuam nawn lo uh hi. Banghang hiam cihleh thuhilh Sya khempeuh phial in Pasian in itna hi cih bekbek tawh kalsuan pih uh a, Pasian in bang thu bang hang cih om sak loin amaute it limlim (love them unconditionally) hi cih ciang bek suah mawk uh ahih man hi.

Christian gim nam pawlkhat te bang in Pasian pen itna ahih manin heh tha pai cih bang om ken teh. Hell cih zong bawl ken teh. Mawhna pen Jesuh Khrih in Singlamteh tung ah leitung mi khempeuh it mahmah ahih manin a Tapa neih sun a hong piak dongin hong tatsa hi lel hi ci-uh a, mi khempeuh a tawptawpna ah gupna ngah mangkhin ding suah lel uh hi (Universalism). A tawptawpna ah mi khempeuh in gupna ngah mang khin ding cih (Universalusm) upna nei teng mah in gupna kitaan thei ci kik kawikawi leuleu uh hi.

Mi khempeuh in gupna ngah lo. Jesuh a um takpi mite bek in ngah. A ngah takpi khit teh thu-um mite in gupna tan kik nawn lo hi. Pasian pen itna ahih manin tua itna tawh thukhen ding pa hi. Itna Pasian hi keileh heh thei lo ding, thu khen ngei lo ding hi zaw hi. “Topa hoih hi kei’ tung ah” cih thu maan taka i cih theih nadingin “Topa heh hi kei tungah” cih thu i ki ciat mahmah phot kul hi. Pa Pasian tungah kisikna lim pen Jesuh Khrih sungah upna tawh lah kul hi.

2. Upna le kisikna pen maitang nih nei sumtang tawh kibang hi. Kisik cih ciangin mawhna taisan cihna hi a, um cih ciangin Khrih kiang zuan cihna hi. Hih thu nih pen a kikhenkhia thei lo maitang nih nei sumtang khat a bang ahi hi. Kisik bek-a dingcip cih tawh kingah khin loin Jesuh zuat kul lai-a, um cih phil phel bek tawh kingah lo leuleu-in Pa Pasian tungah a kisik nuntakna nuntakpih kul hi.

Sya pawlkhat te in zong Thukham zuih zawhna tawh gupna kingah lo ci tei napi uh it zawhna tawh gupna a kingah ding sa leuleu uh hi. Thukham le Itna in a kalh uh thu a kikim linlian ahihna a thei kha lo mi tam mahmah hi. Thukham khempeuh thu khat-in a kilak ciangin Itna kici hi (Gal. 5:14). Thukham=Itna. Thukham zui zo pa na hihna tawh gupna na ngah loh ding mah bangin, a it zo pa na hihna tawh zong gupna ngah tuan lo ding hiteh. Thukham zui kei ni, it kei ni cihna hi loin, it zo lo, zui zo lo ihihna pan Pa Pasian tungah kisik ding le Jesuh Khrih sungah upna kisam ihihna a kigen ahi hi.

Hotkhiatna ngah nadingin Biakna dang khempeuh in zong itna bulphuh uh-a, Christian Biakna bek in Upna bulphuh hi. Biakna dang khempeuh ii bulphuh pi pen itzawhna tawh hotkhiatna thu hi a, Christian Biakna pen upna hang bek tawh hotkhiatna ahi hi. Tua upna hang bek tawh hotkhiatna sungah zuihna maan le Itna maan om thei pan hi zaw hi. Evan. Suangh Dal