IS thu akhahkhia Facebook Account 1000 val ki encik

Malaysia gamsung ah IS te thu mipi theihding in a tangko khiazel Facebook Account 1000 valbang om in, tuate kumpi thunei te’n etcik in nei uhhi ci’n Dewan Rakyat in genkhia hi. IS Ideology ci’n tua Facebook tungpan in IS te nasepzia mipi lunglut theihtheih dingin khahkhiazel uhhi.

Social Media tuamtuam zangin IS te nasepna a tangkoko te ki encik hi ci’n Deputy Home Minister Masir Kujat inzong genkhia hi. Hih IS te nasepna pen ataktak in Islamic te upna leh ki thuhilhna aman taktaktawh kituaklo ahih manin, tuabang in IS thu a tangko khia te pen Malaysia kumpi te’nzong zadah mahmah uhhi.

IT hun ihcihcih mahbang in migilo te’n Social Media tungtawn in mipi te lungsim ala theitheiding a nasep te uh pulak khiakhia uhhi. Malaysia kumpi te genkhiatna ah April 06 ni ciangciang Police te ii etcik Facebook Account 1000 val omta a, Twitter Account zong 100 val om cihi. Tuabang ah Website zong 50 bang etcikdet in nei uhhi.

Tua Facebook, Twitter, Website Blog tuamtuam te panin hih migilo te thuthang tuamtuam ki suaksakzel a, khangno pawlkhat thalawpgawp in paikhial uh cihi.

Tua hi a, mipi te’nzong na innkuanpih na tate un Social Media bangcizat hiam cihzong na etcik dinguh kisam hi. Lungsim hoihlo alut khakloh nading in kidawm un ci’n Deputy Home Minister Masir Kujat in genbeh hi.

Tuaban ah Malaysia gamsung ah 2013 kumpan tukum March khadong Terrorism Activities akici gitloh ngongtatna ah akihel mi 177 kimankhia cihzong kumpi te’n genkhia hi.

Hihbang in IS migilo te gamtatna leh mizolna te pen mipi theihding in Awareness Program tuamtuamzong kumpi lampan Police & Prisons Department tuamtuam pan neihpih uhhi. Tuaban ah NGO kici Non-governmental organisations te’nzong thuhilhna neipihzel uh a, tuabek thamlo gammi te Friday nisim akikhopsim unzong Sermon thugenna ah hih migilo te gamtatzia ahoihlohlam thuhilhna in kineizel cihi.

Malay gammi te biakna khempeuhzong ahoihlo in agamta uh hisamlo a, tua biakna sungpan pawlkhat agitloh gamtat uh hizaw hi. Tuaban ah Facebook leh Social Media tuamtuam ah IS te thu gelhciang inzong kidopding thupi khading hi. ZD Sawltak #zomidaily