Iraq ah IS migilo te nutsiat nupi 1400 leh naupang honkhat kiman

Iraq ah IS migilo te nutsiat nupi 1400 leh naupang honkhat kiman

Iraq gamsung ah IS migilo te ii azi hiding in aki ummawh nupi 1400 leh atate kimankhia cih Reuters pan kiza hi. Iraq gamsung panin kumpi thunei te’n IS migilo te aki hawlkhiatkhit ciangin anungsang ah azi leh atate uh akimankhia hi ci’n Security & Aid Officials te’n genkhia uhhi.

Tua amatkhiat te lakah atamzaw pen Turkey gampan ahihi. Tuaban ah nidang in Soviet States Tajikistan, Azerbaijan, Russia cihbang gamtuamtuam paninzong kihel uhhi ci’n Iraqi Army & Intelligence Officers te’n genkhia hi.

France leh Germany gampan inzong pawlkhat kihel uh a, tuaban ah Asia gammi zong kihel cihi.

Hih nupihon leh naupang tepen Iraq, South Mosul aom Iraqi Camp panin aki mankhia ahihi. Pawlkhatpen hihphual ah August 30 ni pawlin atunguh hihtuak a, Iraqi Troops kici kumpi galkap te’n Mosul khuasung panin IS migilo te ahawlkhiat ciangin azi atate uh nusia in ataikhiamang uh cimawk hi.

IS migilo te ii azi in aom nupi pawlkhatte pen akhutsung ah bangmah Original Documents tawi neinawnlo, ID neilo uh ahih manin, koipan panin hihphual ah hongpai uhhiam cihpen Intelligence Officer te’n hoihtak kankhiatsan uh cihi.

Iraq gamsung panin abeisa kumpan kipan hih IS migilo te kumpi thunei te’n ahawlkhiatzawh akiman lakah matkhatin mi atampenpen hiding kici hi. Iraq kumpi galkap te’n nungkum akipan agamsung panin IS migilo te hawlkhiat kilimpat mahmah uh a, adiakdiak in IS te phualsatna Mosul paninzong IS galkap honpikhat hawlkhiakhin uhhi.

Hih amatkhiat uh nupi leh naupang tetawh kisai in hoihtak in thusitna kinei, Tight Security Measures kibawl in, kumpi lampan in bangcihding cih Government Orders aki ngaklaitak hi ci’n Army Colonel Ahmed al-Taie in genkhia hi.

Hih nupi leh naupang tepen mawhna aneilo khuasung mipi te akaplum, athat giapgiap te ii azi atate hi. Ahi zongin amautawh hoihtak kiho in, athu aki dotcian ciangin apaikhial, aki makaihkhial uh hi a, ahehpihhuai mahmahte uh ahihi. Tua ahih manin, amau tepen gawtbawllo in, hoihtak in kikem hi ci’n thunei te’n genkhia hi.

Hih akiman IS galkap te zite lakah Turkish, French, Russian kampau azang tampi om cihi. Tualak ah France kampau azang nupi khatin agenkhiatna ah kagam uh France ah kaciah kiknuam mahmah hi. Hihteng kong paikhiatma in Paris ah ka om uh a, kalawmpa in Iraq gamsung ah IS tetawh kipawlding, IS galkap tumding in hongpaipih hi. Tu’n kalawmpa bangtuak, koi ah om, simaw hing cihpen kathei nawnkei hi ci’n genkhia hi.

Iraq Interior Ministry Official te’n agenkhiatna ah hihzahzah mihonpi pen sauvei kikemzolo dinghi. Amau gamtawh akisai Embassy te ah ki thuzading a, tuatungtawn in hongpaikhiatna gamtek ah aciahkiktheih nadingin ki vaihawmding hi ci’n genkhia hi.

Related: Malaysia Shopping Mall maikhat ah Awle khat ahing in kiman

Army Lieutenant Colonel Salah Kareem in agenkhiatna ah tuciangciang gam 13 panin hongpaikhia uh cih kimukhia hi ci’n genkhia hi. IS migilo tepen Iraq leh Syria gamsung ah hong daizawdeuh uh, omthei nawnlo uh a, ahi zongin Asia gamsunglam hong manawh uh kici hi. Sawltak #zomidaily