India in Nuclear khuapi bawlhi ci’n Pakistan in ngawh

India in Nuclear khuapi bawlhi ci’n Pakistan in ngawh

Feb. 10, 2017: Pakistan in zan in India in nuclear galvan nakpi takin a neihsate (stockpiles) kikhawm in, a sim in nuclear khuapi ‘secret nuclear city’ kici bawl a, South Asia ah kuamah a hat tuam a om lohna ding (balance of power) thusim loin gamtang hi ci-in Pakistan Foreign Office spokesman Nafees Zakaria in ci a, tua bek hilo in continent khat panin continent dang khat kap khakna dinga kizang inter-continental missiles (ICBM) kici India in sitna neih behbeh lai hi ci hi.

“Pakistan in a gam kianga om (inn vengte/neighbours) tawh kilemna ding, India kihel in, hanciam den hi. Pakistan in kilemna ding a hanciam bangin India in zong a thuk kik ding kisam hi,” ci-in Nafees Zakaria in ci hi. Tua loin a zuau gen behlap lai a, India-Pakistan gamgi LoC ah India galkap ten ceasefire thukimna a palsat manin South Asia kiim-ah bitna ding (regional stability) nawngkaisak hi ci-in gen beh hi.

Zah hal in Pakistan galkap ten Corps Commanders meeting nei uh a, Pakistan-India gamgi vai thu kikupkhawmna nei uh hi. Hih meeting ah Pakistan in India in LoC (Line of Control) ah ceasefire thukimna palsat den uh a, tua hangin mawhna nei lo nautang tampi in sihna tuak in, South Asia kiim-ah kilemna omna ding dengdel sak den uh hi ci uh hi. A man takin ci leng tu kum sung bekin Pakistan galkap ten LoC ah ceasefire 110 vei a palsat ban uh-ah Pakistan pansan gamnuaimite India ah sawl lut den uh hi ci-in Indian Express in suaksak hi.

Nafees Zakaria in India in nuclear khuapi a sim in bawl hi ci-in press conference ah a genna ah ama nungzui DG Disarmament at the Foreign Office len Kamran Akhtar in zong India in nuclear bawlna dinga kizang thei plutonium kici India in nuclear bawlna dingin zang a, nuclear bawlna dinga van koih/khol sate (stockpiles) military programme a zat dingin kipan ta hi ci hi.

Nafees Zakaria in Pakistan in 2007 kum in Samjhauta Express meileeng a sihna tuakte vai kikan napi-in India in hih thukanna ah hong kipawlpih nuam lo hi ci hi.

Pakistante hai pauna pen kingakna ding a nei lo ngawhna (baseless allegations) hi a, Pakistan in India in nuclear khuapi a sim in bawl hi cih a ngaihsutna pen phuahtawm thu hi ci-in Indian Ministry of External Affairs Vikas Swarup in ci-a. India bangin leitung thukham zui leh zahtak om lo hi ci-in dawng hi. Source: Indian Express and The Hindu/ Thang Khan Lian