Independent MP vai ~ Pu Thangboi

Independent MP vai ~ Pu Thangboi

Kalay, Tedim, Tonzang pan independent (khat kia tangdin) in MP dem ding ih om phenghphangh ciang in pawlkhat lung himawh in sakpan khangpan dotna om zeelzuul ahih man in atom in gencian leng:

Independent Abaihna

Independent a din pen Party tawh kibang lo in baih mahmah hi. Committee zong kul selo in a form teng fill up khit teh Falam district zum ah vapuak ziau ahi hi. Ih puak ni leh interview ni ni 2 bek ki thapaih pih hi. Party dan mah in Logo leh Manifesto neih kul ahih man in tua munte ah ih khauhsak luat leh sawt thei hi.

Abaihlohna

Party tawh ki level phial mah a nasep kul ahih man in sum tambei mahmah hi. Party pen a party min tawh paiziau hi a ei’ mimal hoihna/hoihlohna sang in a party liim leh vang ki enzaw hi. Independent ah tuadan hilo in ei mahmah direct a hong ki en ahih man in asia apha avek in ih khuk kul hi.

Party te’n khualian teng ah member neikhin uh a independent in tua tan tunna ding hamsa mahmah hi.

Kitelna ah gualzawhna ding in (Tonzang level ah) atawmpen sum teng 100 bang zatzawh kul ding hi. Tua zah a kipiakkhiat akul hang mipi in min le za deih lel ngel a hong muthei lai hi. Guallelhna khat nei leng uiko ngeuko a hong kiko ding hilai hi. Party pawlkhat bang in tua dan a mikoko ding sumguai in khawi ngiat lai uh hi.

Ahoihna

Gualzawhna khat aneih zenzen leh bel party pan a MP te sang asepnop nak leh na semthei zawding hi. Party thukhun khawng tawh kihen nawnlo ahih man in suakta tak in kipeii thei ding hi. Party tawh kisem theilo/kisem ngamlo thu pawlkhat Independet te’n semthei ding hi.

A thuneihna (power) pen Party pan a MP kahte mah tawh akikim linlian ahi hi. Amah atung ah kuamah omlo ahih man in ama’n semzo zawlai ding hi.

Akibatna

Independent a dingte atamzaw in Party pan in dinsawm masa uh a alem theih mahmah loh ciang a independent a ding uh hizaw hi. Kuamah ut masalo hi. Ih gensa mah bang in tambei in kigim zaw pek hi.

Thukhat ah bel Independent tawh ading te’n ih gam ih lei hong khualna uh lianzaw ding in uphuai mahmah hi.

Alawphuaina

Independent a dingte party a ututna vuah lutthei lel uh hi. Gtn. in Bob Tuang @ Pu Kham Lam Tuang bang in gualzawhna angah khit teh ZCD ah alut nop leh akingah lua hilel hi. Pu Vum Nang te Pu Kapnote zong tua bangmah hi. Autna peuh vuah luttheih hi.

More: ZCD Party in tulaitak Challenging Moment pen Great Opportunity in ihsang zodinghiam

Bangbang aizong Independent a din pen baih hetlo ding, thuakna leh supna baina tam mahmah ding ahih man in ading peuhpeuh thupisa in ka zahtak mahmah hi. Genkhialh a om leh ngaidam, Mung Laan Thang (Tonzang, Zogam)