I Gam I Minam mailam ding Inn-ngak Zosuan te khutsung ah omta

I Gam I Minam mailam ding Inn-ngak Zosuan te khutsung ah omta

(Appeal to our nation at home – Ours and generations to come’s future is in your hand)
Inn-ngak Zosuan te aw,
2015 Kiteelna ah, tuipi galkai, khualgam aa om, na u, na nau, na sanggam , na tu leh ta te uh hong khual hong lungngaih kawm in, I gam Makai ding hong teel un ci-in kong thuum nuam ngeungau uh hi. Biak Pasian in Zomite mailam ding, I khutsung ah hong koihnuam luata a hih man-in, hehpihnakong hong honsak leuleu aa, ei teelding bek hi ta hi.

Gam ki-ukna hoih hi leh, Zosuan te hibang in a honhon a lomlom in ki lalkhia lo ding aa, migam milei ah, vakvai in, mikonglai ah gulsih thaamsih, mite simmawh cilphih in, ki om samlo ding hi. A lal I ommah lehzong neihsa leh pilna tawh bucing in eiteel a hizaw ding hi.

Leitung gamnuamsa te, Zosuan te bang-in, lal samlo uh hi.

Gamnihna (India, Thai leh Malaysia..) a tungsa, lamkaal aa’ a awklai Zosuan te gen vetloh Gamthumna(USA, Australia, New Zealand, Europe..) tungkhin te’ nangawn kinuamsa kimlo aa, a lungleng, a tavai tampi mah ki-om veve hi. I gam hoih leh maw a cici kitam mahmah hi. A hizong Kawlgam 2015 kiteel na-ah, tuipi galkaaisa Zosuan te’n thunget ding lo-ngal bangmah septheih omtuan nawnlo hi.

Tua hi aa, tuipi galkaaisa na sanggam, na tu na ta, lawm leh gawl te hong lunglen unla, gamsung gampua mipih te mailam ding saupi khualna tawh gam Makai minam Makai ding hong teel ta un.

I mailam ding Inn-ngak Zosuan te khutsung ah om hi. Hong manghilh kei un, ci-in itna tawh kong thuum kong ko uh hi. Kozong I gam I lei hong ciah nuamta ungh. Pupa leh khangsawn Zosuan laukha te lung hong taisak ta un.

Hong makaih in Lau Khasiangtho
Ngilh ngeiloh pianna Tuunnu Zogam aw,
Cikciang nong paallun ding aa, na sanggah vontawi te’n zuu leh va bang in na nunkhum bawk in lambang paak kawm Inn hong zuan ding hiam?

Tuun aw lobang na tullo aw, ningzu aisa tawh tonkhuang tum in, I laamsai kal ding ngahlah hang e.
Na vontawi te Kawlgam Vaigam leitung mong ah kitheh thaang, singdang liim beel in zata lai-ah giahphual sat mah leh selung hawm in hong lung ngaingai ungh e.
Kawlmang pa aw, na ciang nasiat lai aw, lungmawl Zovon tawi te vabang pil-in maciang suanding kisa lah lai ungh e.

Tung Sian Mang aw hong sung lai aw, lau Khasiangtho hongsawl inla, Zosuan te dawnbang tuah in, pheiphung suankhawm lo-in ma ka tunglo ding uh.

Nantal’suan
(Kawlgam 2015 kiteelna- muak kawm in)