Human Trafficking vai Malaysia, Thai, Myanmar gamthum ki muhsawm

Human Trafficking vai Malaysia, Thai, Myanmar gamthum ki muhsawm

Thai gamsung ah Human Trafficking panin misi honkhat akivuina hankhuk te aki muhkhiatzaw Thai kumpi thuneite buaimahmah uhhi. Hihvai tawh kisai in Thai Prime Minister Prayuth Chan-ocha in amauguak ii septheih omlo ahih manin, Myanmar leh Malaysia kumpi thuneite tawh kaki mukhawmnuam uhhi ci’n Friday ni in genkhia hi.

Thai gamsung Malaysia gamgineh aom ahi Songkhla Province sungah misi kivuina hankhuk tampi ki mukhia a, tuamun te ah akivui tepen Kawlgammi leh Bangladesh gammi vive dingin ki ummawh hi. Tuabek thamlo hih Songkhla Province sungmah ah Human Trafficking Camp 3 tak ki mukhia hi.

Tua ahih manin Thai Prime Minister Prayuth Chan-ocha in Ministry of Foreign Affairs te kiangah amanlang in Malaysia leh Myanmar tawh kimu in hihvai siangsakding hihang cih genkhia hi. Hih Human Trafficking vaitawh Thai, Malaysia, Myanmar gamthum ki muhkhopding pen tukha beikuankhawng hiding in ki lamen hi.

Thai, Malaysia, Myanmar gamgi kuamsungteng ah agamta leilam tawh mi apuakkawikawi Human Trafficking Networks makai zong mi 8 ki mankhinta ci a, tualak ah mi 7 pen Thai te hi a, adangkhat pen Kawlgammi ahihi.

Royal Thai Police zumpan agenkhiatna ah amakaipi zong kimankhin ci a, ahi zongin athu akician in pulak khianailo uhhi. ZD Sawltak