Hosanna ~ T. Sawmlian

Hosanna ~ T. Sawmlian

Jerusalem a Jesu, thupi taka a lutna, a paina lampi, a tun dek kuan leh mipite in a pahtawina leh ngetna uh pan phawk thak dinga hoih ka sak pawlkhat (Palm Sunday ni a thugen).

1. Bethfage khua pan, a maia khua, a tot veve ding uh (Bethany) khua ah mapai dingin Jesu in a nungzuite mi nih sawl hi. “Thu” tawh sawlin, hangsan takin paisak hi.

I Khristian nuntakna zong, om maimai ding hi loin, sem ding, bawl ding a hong deih leh hong lamen Pasian hi a, na dang tampi tawi ding, nei ding, zang dingin hong lamen loin, galvan thupipen ‘ama thu’ ahihna hong lak ka sa hi.

2. A kisin nai lo laano tung ah tuang hi. Sianthona a deih Pasian in, a siangtho, kisinnai lo laano teel a, kamsangte genkholh tangtung hi. Kiniamkhiatin, kilemna Kumpi ahihna lak a, a laano mahmah in zong a tot ngeilohna, a muh ngeiloh leh, a siik ngeiloh nate siik hi.

I nuntakna ah a nin dingin Pasian in hong sam lo a, ei leh ei kisiangsak dingin Pasian in hong deih hi. Jesu hang a sianthona banah, nisim nuntakna ah i khantoh, i cidamna dingin sianthona a deih Pasian ahi hi. Kiniamkhiatna tawh nuntak a kisapna leh Jesu hong tuan nak leh i tot ngeilohna, i muh ngeiloh, i lamet batloh nate zong Jesu tungtawnin kingah thei hi.

3. Ot zal bek hi loin, cihtakna lungsim Pasian in deih hi. Jerusalem a tun kuan uh ciangin Jesu in tua khuapi kah hi. Amah a pahtawi mite khuapi kah mawk hi.

Khatvei phat ziau, tawmvei kikhop ziau, thunget ziau, Lai Siangtho sim ziau tawh nungzui picing suah a kilamen, thupha a lamente hi hang. Ahi zongin, picinna, kha lam sa lama thupha a kip a kho ngah theihna ding pen tuate hih zal, hih ziau hi loin, citak taka kalsuanna ah om hi. Pasian in a puatham en loin, lungsim tawng en a, Jerusalem mite banga hih zal, awng zal, phat zal lo a, citak taka kalsuan kisam hi.

4. Hosanna ciin kiko uh hi. Israel minam tangthu i et ciangin kumpi gam tampi khut nuaiah, genthei takin haksatna tampi na thuak uh hi. Tamveipi Pasian in honkhia a, Messiah a lametna uh zong amau a ukcipte tung pana suahtakna a pia thei ding ahi hi. Amau lamet bangin Jesu hong kilang lo a, tua hangin tampi in haih uh hi. Jesu pahtawia a om ni in, mite in ‘hosanna’ a cih uh pen a lamdang hi lo a, ahih ding tak uh ahih uh ahi hi.

I nuntakna ah, haksatna tampi kituak hi. Covid hanga buainate, i mimal, innkuan, nupa, khua, pawlpi sungah zong bang hiam ukcipna, bang hiam sila kihi thei a, tuate panin ‘tu-in hong honkhia in’ i cih kisam hi. Jesu lo hong zawhpih thei om lo a, Jesu lo ah gualzawhna taktak om lo hi. I pumpi, i mihing mihinna sunga a om hoihlohna sala tang a, tuate sila i hihna pan suahtakna ding pen Jesu bek hi a, ama tungah ‘hosanna’ i cih ding pen a poimawh pen ahi hi.

Om maimai ding hi lo, gah khia ding a hong Sampa in ama nungah sep ding tampi hong pia a, tua dingin kiniamkhiatna tawh ama thutak dinkip pih a, ama thu galvan a zang a, haksatnate leh pahtawinate i tan hun ciang zong thanem leh lungkia mai lo a, citak tak, muanhuai taka kalsuan dingin hong deih a, tawmvei sung a lawp pakna, ot zalna, cihte hi loin, lungsim kip taka dinpih ding leh, leitung a hong ukcip, hong suakta sak lo, haksatna leh buaina tuamtuamte tu gah gualzo a, mainawt zel dingin hong deih a, tua dingin amah i muan a, nisimin, hong buaisak, hong ukcip a hoih lo nate hang a, lungsim takpi tawh ‘hosanna’ i cih ding kisam hi. T. Sawm Lian