Hongnusia Peter Lianpi dahpihna ~ Zomi Catholic Community

Pa Peter Lianpi in lamet hetlohpi leh lametloh kawmkal in hong nusiatna hangin Zomi Catholic Community Portland, Oregon panin dahpihna lianpi kong pulaak masa uhhi.

Pa Peter Lianpi hong nusiatna pen hihdan ahihi. Portland, Orgon panin Picnic paiding in naseppih lawm leh gual tawh motor 3 kuankhia uh in, a pailam un lampi pan motor khattawh ki maituah in ki phulkha, ki taihkha ahih manin motor tungah atuangkhawm Zomi Lasiam Pa Tua Tuang leh Pa Peter Lianpi tegel in a phual ah nuntakna hong beipah hi. Motor sungah atuangkhawm Pa Tua Tuang zi ahi Nu Huaipi leh a tanu Lia Zem Zem pen zato ah omlai uhhi. Tulaitak Zomi upa pawl in zato ah ava veh laitak uh hi a, bangci ciangin damlohna nei cih athu akicing in ki thei nailo hi.

Pa Tua Tuang pen Zomi Bethel Church (ZBC) ah member khat ahi a, tua kawmin Youth Pastor zong a seplaitak hi. Thu le vai tengpen ZBC in van kawikawi in aki samteng panpih dinghi.

Pa Peter Lianpi pen Zomi Catholic Community Portland ah pawlpi kician mahmahkhat anei ahihi. ZCCP in vai khempeuh ah mawhpuakna leh innteekna panmun lading uhhi. Pa Peter Lianpi asanggam laizom, aluang phawmding in Pa Gin Tawng pen Nashville pan hongpai laitak ahihi. Tuni 29 July 2016 3pm in hongtung dinghi. ZCCP in Pa Peter Lianpi vaiteng pen Ga Gin Tawng ii phalna tawh mabaan zopna te ah mapang khawmding in Pa Peter Lianpi ii hun nunung vaiteng khempeuh panla dinghi.

Pa Peter Lianpi ii nuntakzia pen Thai gampan in USA leitang atunzawh pen kum 5 val deuh hikhin hi. Azi in a taneu asuah zawh asawtlo in hong nusia pah ahih manin atate teng 3 pen UN/IOM te huhna tawh a Pa Peter Lianpi kiangah hongtungthei suak ahihi.

Pa Peter pen tulaitak in a awngkai Nu Mang Seen pumkhat suak in azi USA hongpai theihnang in asap laitakzong ahihi. Pa Peter Lianpi in ta thumnei in anuai abang ahihi.

Lia Elizabeth Don Tawi Nuam (Grade 8) kum 14
Tg. Simon Thang Muan Khup (Grade 6) kum 12
Tg. Thomas Thang Sian MUan (Grade 4) kum 9

Pa Peter Lianpi pen Catholic thuzui mi citak mahmahkhat leh mi thunuam mahmahkhat ahih manin ZCCP in kidah mahmah hi. Ama hong nusiatna hangin ZCCP bupbek hilo in leitungbup ah Zomi khempeuh in ki dah mahmah in ki khuangai mahmah hi. A nusiat a tate ading mailam ki khuasakzia te ah zong ZCCP in alemthei pending in sanggam ulenau, kumpi thuneite kop in mabaan vaiteng ah panla dinghi.

Hong nusia Pa Tua Tuang leh Pa Peter Lianpi itna leh ngaihna takpi tawh aphalnai hetlo,

Zomi Catholic Community Portland
Executive Committee