Hong makaihding makai i teelciang ~ Sia Mungno

Hong makaihding makai i teelciang ~ Sia Mungno

“Nungzuih siam ni” cih kammal za nawh mahmah ing. Mipi a mawhsak den makai zong za mun mahmah ing. Gen taktak ni cile’ng makai hoih i kisam hi. Ngaihtsutna tuam ciat anei mipi a kipumkhat sak zo leh ngimna khat tawh a kalsuan pih zo pa/nu pen makai hoih ahi hi.

Mipi lungsim khempeuh makaipa tungah kinga ahih manin hong makaih ding mi i teel ciangin limtak in ngaihsun ni. Mipi deihna bangin a ta hawihawi makai sangin ama ngimna mipi a lawh sak zo makai thupi zaw hi. Ngimna kician mahmah tawh mipi makaih ahih manin ama nung zuih ding kilawp mahmah hi.

A ciim mi hiding

Ki makaihna sungah degree kizangh theilo ahih manin ciimna kisam hi. Abraham Lincoln pen degree neilo napi’n ciim mahmah hi. Leitung ah makai hoih penpen khat in kiciamteh hi. Ciim mahmah ahih manin degree a neih zenzen loh hangin mipi in makai dingin na teel a, US Kumpi a 16 na hong suak hi. American te’n kumpi ding qualification a guanna sungah degree kihel lo citciat hi. Degree pen thupi mahmah a, ahi zongin a kisam pen hi lo leuleu hi. Makai i teel ciangin a degree bek en in i teel khak loh ding thupi ding hi. Degree thuap tampi ngahin a ciim lo tam mahmah hi.

Makaih a siam mi hiding

Hong makaih ding mi i teel ciangin makaih a siam mi zongin tuate teel ding ahi hi. Laihilh siam mahmah khat makai dingin na teel hang a mawkna ahi hi. Ama siamna kizangh theilo hi. Laihilh siamna pen laihilhna munah zat ding hi a, makaihna ding hilo hi. Siavuan khat in vanleng hawl henla vanleng hawl khat in cina vel leh lem hetlo ding hi. Tua ahih ciangin makai dingin makaih a siam mi i zong ding hi.

Mipi phattuam nasep nuam a sa ngiat mi hiding

Angsung khualna pen a sia hilo hi. Ahi zongin angsung bek a khualte’n mipi phattuamna ding sem thei ngiatlo ahih manin makai in teel loh ding ahi hi. Angsung bek a khual mi na hih leh makai sep ding ngaihsun kenla na innkuan sung limtak in puah pah in. Topa lungdam zaw ding a, na min zong pha zaw ding hi.

Sum leh paai a lunggulh lo mi hiding

Makai sepna tawh a hau om ngeilo hi. Makai a sep sungin a hau a om leh golhguk ne hi ding hi. Na hauh nop leh sum zong in. Sum leh paai a deih lo mi ki om lo hi. Makai i teel ciangin a neih bangbang leh a ngah zahzah tawh a lungkim mite i teel ding hi. Sum leh paai bulphuh loin mipi a bulphuh mite makai in teel ding hihang.

Lungduaina a nei mi hiding

Makai sepna ah a kisam penpen khat in lungduaina ahih manin a lung tom bakbak mite teel loh ding hoih pen hi. Mi lungtom te’n thu hong neih uh ciangin zangh khial in lauhuai thei hi.

Deidanna a neilo mi hiding

Amah a langpang mite itna tawh a huaisiam makai teel ding ahi hi. Keilam ah hong panglo na hih manin hong huh zo kei ning ci loin a kisapna munah a huh zo mi makai in teel huai mahmah hi. Hong langpangte huhlohna pen thuman hi a, telsiamna tawh huhna pen gualtung tuanna ahi hi.

A paubang lo mi hiding

Ginatlohna nengno hangin i sep nahoihte kuamah in hong thusimsak lo thei ahih manin a paubang lo mi makai in teel ding hihang. Tua hi kei leh lawhsapna om thei ding hi.

Tua ahih ciangin nungzui siam sangin makai siam i kisam zaw hi. Makai hoih khat in nungzui hoih loh teng puahpha thei a, nungzui hoih khat in makai hoih lo khat pen puahpha theilo hi. By (Sia Mungno) Nashville,TN, USA) – Zomi Daily