Hong kidenna suangte tawh kulh ciangin ~ Job Cinpi

Hong kidenna suangte tawh kulh ciangin ~ Job Cinpi

Hong kidenna suang tawh kulh ciang ding cih pen thubaih hi lo hi. Bang hang hiam cih leh suang tawh hong kideng leh suang sang a khauh zaw molh le hiamte tawh kithuk nuam zaw thei lai hi. Pasian kammal sungah hong samsiate samsia kik loin thupha tawh thuk inla hong bawlsiate adingin thungetsak in, ci hi. Hih bang lungsim a nei mi tampi om lo hi. Tua mah bangin hih bang lungsim a nei zote zong mi mawkmawk om lo uh a, mi thupi mi lian dinmun vive tung uh hi.

Na thu a hoih genlo on dinga, na thalawp mahmah laitakin na lungkiat nading hong gengen pawlkhat om ding hi. Na sep na bawl khempeuh a sia lam a hong muhsak hong gensiatsak om ding uh hi. Na gual zawh ding, na matut ding hong haza a ong langpan zong om ding uh hi. Hih bang mite tawh na khansungin khat le nih tawh na kituak kha ding hi.

Tua bang mite tawh na kituak ciangin na lunggimsakin lungkham dingin na ngaihsut khak leh lunggimna sim loh na ngah ding om lo ding hi. Tua bek tham loin amau lunggulhna a tangtungsak, a gelna uh a cingsak na hi zaw lai ding hi. Bang hang hiam cih leh amaute in na lunggim ding le na dah ding hong deih uh hi. Tua ahih manin amaute kammal thupisak kenla lunghimawhna in nei kha kei in.

Na lungsim pen na pumpi mah tawh kibang hi. An ginalo an hoih lo cihte kin loin a om bang bang ne le cin a sawtna ah na cidamna su kha ding hi. Tua hi leh na pumpi thahatna kiam dinga natna ngahin na ci na ding hi. Na ci a nat ciangin zatang na nek kei leh na natna suuk semsem ding hi. Natna pawlkhatte pen zatang bek tawh dam thei lo a, zatui kisun le’ng a dam pah om thei hi. Tua bang hi kei leh a sawtna ah natna nasia semsem dinga nuntakna beilawh thei lai hi.

Tua mah bangin lungsim sungah ngaihsutna hoih lo, lunggimna, buaina, dahna cihte ngaihsunsun le’ng a sawtna ah lungsim damna sukha thei hi. Awlmawh loin tua bangin om suak hi leh a sawtna ah lungkiat natna zong kingah thei lai hi. Tua ahih manin na lungsim kemcing in. (Mahatma Gandhi) Lungdam, Job Cinpi (Zomi Laisim Nuamte)