Hehpihna le Khuangaihna (Grace and Mercy) ~ Suangh Dal

Hehpihna le Khuangaihna (Grace and Mercy) ~ Suangh Dal

Hehpihna le Khuangaihna kammal pen a khiatna kibang lo hi. Hehpihna pen ih ngah dinga kilawm lo ngahna pen hehpihna ahi hi. Ahang (condition) tungah a kingalo piakna pen hehpihna ahi hi. Ih tun nadinga kilawm lo vantunggam tunna thuphpa pen hehpihna hang bek ahi hi. A langkhat leuleu ah khuangaihna cih ciangin ih kilawm ih tuakpih hell sung tun nading panin ih thuak ding hong cikzeetna pen khuangaihna (Mercy) kici hi.

Ih Topa’ Jesuh’ ong tatkhiatna Singlamteh le a thawhkikna in hell pan hong honkhia bek hi loin ih kilawmlohna mun nuntak tawntungna ah hong koih lai ding ahi hi. Hell ah a thuak ding ih hih laitak in hong khuangaih bek hi loin ih ngah ding ih san dinga kilawm lo nuntak tawntungna zong tawh ahong hehpih ahi hi. Ama’ hong hehpihna le Khuangaihna in a bucing hotkhiatna ahi hi. Grace pen hehpihna hi a, Mercy pen khuangaihna hi.

Pasian ong khuangaihte bek ih hi kei a, Pasian ong hehpihte zong ih hi hi. Pasian ong hehpihte bek ih hih kei a, Pasian ong khuangaihte zong ih hi. Hehpihna bek tawh kicing lo a, khuangaihna bek tawh zong kicing lo hi. Khuangaihna maan taktak tungah kinga lo hehpihna pen picing thei lo hi. Topa in ong khuangaihna hangin ong suakta sak ciang bek hi loin a hehpihna thupha ahong piakbek lai ahi hi. Suakta sak ciang bek hi loin inn le lo guan lai hi.

Ahong hehpih theih nadingin ahong khuangaih thei taktak pen ih Topa Jesuh Khrih bek om hi. Hehpihna (Grace) le Khuangaihna (Mercy) kizom tawntung hi. Ih khuangaih huai lam kithei lo pi a, hehpihna bek konlawhna in lampi maan ah hong kha zo lo ding hi. Hell lam pan hotkhiatna kisam a, Tunglam pan nuntakna bucing ih kisam hi. Hih lam le hualam pan, nuai lam le tunglam pan Topa’ hotkhiatna bucing ih cih in ahong hehpihna le ahong khuangaihna ahi hi. Evan. Suang Dal