Hatchhiai Hat….chhiai

Hatchhiai Hat….chhiai

Hatchhiai tawh kisai khanglui papite’n gen le uh hoih gen mahmah in khatveivei asuak lopi peuh mi zakna ih hatchhiai au-au nop hun om se hih veh aw. Ka lawmpa bang bel lim hatchhiai lua liang mawkin hehnop huai phial hi. Amah bel “E lawm na nungakten na min lo hinteh, nang thu kikum uh hinteh. Luck lua teh nang bel” cihden pian ding a lunggulh sim geuguau hise cihpen theihsa himah taleh ka kam mahmah inzong cin zo nawn lo ahihman in khatvei ” Lawm aw na ci ana hi, na kibawl pak kei leh TB zatang khaguk sung ne kha ding hiteh” cia Zato ka paipih leh dangka tang siuseu 70 pia kha in tua zawh kei zakna ah tuni dong a hatchhiai lam zakik nawn sam keng.

Hatchhiai au-au cihpen dam mellohna hang hizaw thei takpi hi. Zan khat pialkhang a akual ngiungeu ka lawmpa zan thapai dektak phial ong Hatchhiai niloh mawk hi. Aman bel amah a thei ngei lo Facebook sunga nungak melhoih asak sim piante’n ama min a lolo ding dan a lamen vial hidan aive. A lung bang nop tuak mahmah zawzen hi. Nai 2am hong sat petmah ciangin hinawn mahmah sam lo ahih cianga a luppih pa in Ceiling tunga Pangka kipei vauvau ava khak leh asawt lo in ong Hatchhiai nawn lo takpi hi. Bukkhuh a vei suak dektak na himawk hi.

Ka neulai a ka lawmte pawlkhat in bel Hatchhiai hong piankhiatna History hici bangin hong gen ngei uh hi. ” Mit tawh akimu thei lo, huihlak a lengleng Bacteria nam khat om hi. Tuate pen bem kiukeu uh a, ih nakvang sungah hong lut khak uciang in ih nakvang sunga mul pawlkhat a dawnzum ten na sun kham uh hi. Tualian leh mutpuak dawt khap hong bang pah lian uh hi. Ih nakvang sung khempeuh ah hong kizeel pah lian uh ahihman in tuapen a kithuak zo lo hi.” cise uh hi. A takpi ahi diam bel theihpih keng, ahizongin tuahun laiin bel tulai a Pasian thugen siamte thugen a lunglut lua pawlkhat te danin lukun in Amen ka cipah ngeungeu hi. Hatchhiai hong kipat khiatna kician taka a theite thei hileng, dot theih hileh dong nuam peuhmah ingh. Daktooor te dot huai phialsa ingh.

Khanglui papite pen papi ahihmah bangun thu saupi na ngaihsun uh hi. Bukvei te Hatchhiai uleh zatang piak ding om lo ahihman in ” Hong lolo kei aw ngaihno aw, ci lecin kam ding hi, ” peuh hong cisak ziau uh hi. Aksin aklung pen innkuan sunga upa pente bek in ne thei ding cih thukhun bawl mawk uh ahihman in cilvalh kangkang liang mah taleng kine ngam ngiat lo pah hi. Aknelphun ne kha leng ki phunphun nuam ci uh ahihman un ankuang um khopna ah ei angsungah tuate om kha leh buhteipi tawh suak kheh luauluau lel uh hi. An sawtvei ane luate mibang lo hi cih thu omsak leuleu uh ahihman un anne lai takpi kham man lo lianga ih khawl hun om thei hi. Tutphah kicin loh man in tuciil tinten a annek ding hong hanthawn uh hi. Khanglui laiin tuabang dan thukhun tampi tak om hi. A sia om kei, zui zo leng ahoih vive hi.

Sanggam lutuamten dai alen uh ciangin tawbo taklam sangto sak zaw den uh a, veilam ah awnsuk sa in daileng hamtang uh hileh kilawm hi. Mit lian tawh amau dailen laitak bel va mu het keng in,ahizong in tua thu pen amau ading in pello a zuih ding thukhun thupite laka khat ahihi. Bang hang hiam cia aki kankan ciangin hih thu mukhia uh hi. Thawldim sitset a tui om pen bung kheh nuam lehang tang takin lumlet lo hihang. Tang takin lumlet lehang asung a tui pai kheh thei lo hi, a sawi pian bekin bung lehang atui kibua kheh thei bek hi. Tua thupen amau na nak tel lua mahmah uh hi. Khangluite thu theih pen asia om kei, ahoih vive hi.

Hatchhiai! Hong lolo ken sen ngaihno aw!!

Francis Lamthang
…Zomi Quavadis….