Haleluijah Topa minthang tahen ~ Evan. Suangh Dal

Haleluijah Topa minthang tahen ~ Evan. Suangh Dal

Singapore pai khat in thuhilh, “Singapore nungakte’ puansilh nikte’nte nasia lua” heleluijah, a cihleh mipi in “Amen” ci-in siam sa mahmah hi. Khatvei khua khat ah mi khat in thuhilh in, ei khua pen nahtang lei ding cih thadah nahtang um nangawn guk ding om nawn lo, guk ding mahmah om nawn lo, guta zong om nawn lo, nasia lua “haleluijah” ci-in mipi “Amen” ci-in siamsa mahmah uh hi. Zomi te in thuhilh siam ih cihte hi bangdante hi. Zomi te in zaknop ih sak thuhilhna hih bangdaante hi.

Hih banga thuhilh siam ih cih mite in LST sunglam thu hong hilh sunsun uh ciangin khial pahpah lai hi. Pasian nasem a kici mi khat in Khuado pawi ah thucin thutang hilh in siam kisa mahmah mi nui ziahziah a, ahi zongin Jesuh tawh kisai thu hong hilh sunsun khial pah hi. A thuhilhna “Zomi te kipumkhatna thupi pen hi. Ih biaknate thupi lo hi. Laipian, AG, Tuiphum, RC te thupi lo a, ih minam thupi hi.

A taktak in LST theology khawng ka kankan teh Topa Jesuh zong Israel mite ading beka hong pai hi a, Zomi te adingin ahong pai hi lo hi. Tua ih kibatlohna thute pen gen ding hi lo a, hih ih kibatna Zomi ih hihna hong khenkham thei peuhma nusiat ding hizaw hi “haleluijah” a cihleh mipi in “amen” ci-in siam sa mahmah hi. Haleluijah pen ‘Pasian minthang tahen’ a cihna hi in, ke’n bel ka lungsim ah hih bang tawh haleluijah-Pasian minthang khol kenteh maw, ka ci hi.

Nidang in Haleluijah a cicite piang sualin kimu a, tuhun teh Haleluijah a ci lote a pianglui in kimu hi. Tua ahih manin a thu in “haleluijah” bek tawh piciang ih kitehteh laiteng tua cici ding hi hang ka cihnopna hi. Haleluijah te, praise and worship te a kinial hi lo zawa, a haleluijah ding taktakte, praise and worhip taktakte a nial gamtatnate a gen ih hi hi. Pawlkhatte leuleu in a thu bekin haleluijah te praise and worship te nialnial pongin ahi zongin amau up le muan pen Pawlpi’ paizia (by law) le Pawlpi’ ngeina ciin le zui (tradition and culture) teng peuh na hi lel ngel zel a, Lai Siangtho thuhilhna in a leek zawh het loh, a thu bekin a om gemgam pong mawk mite mah na hi veve uh hi.

Hih bang mite in Upna le Gamtatna kileekkim sak ding bulphuh hi. A tawptawpna ah amau adingin a leekzaw thu in gamtatna om lo upna in a si hi, cih tawh a thu uh khup veve hi. Tua gamtatna ii a langah thu khat bek om a, tua pen upna “bek” cih thu ahi hi. A kileekkim a cih uh hangin a tawptawpna ah a khat zawzaw ii leek sitset dinmun tung pel mawh hi. Hotkhiatna thu tawh kisai-ah Gamtatna tawh Gupna a ci pawl le Upna bek tawh gupna a ci pawl cih bangin lampi nih bek om hi.

Ahi zongin Christian te sung mah panin lampi thumna kibawl tawma, tua lampi thumna pen a kaai-ngawi (neutral position) kici hotkhiatna pen upna le gamtatna (faith + work) ahi hi, ci uh hi. Ahi zongin hih a kaai-ngawite zong a tawptawpna ah “upna bek maw?” “gamtatna bek?” cih khat zawzaw ah tung uh hi. Gamtatna bek tawh um pan ding maw? cih leh upna bek tawh gamta ding cih, lampi nih bek om hi. A khat zawzaw ah na “bek” mah kul veve a, ahi zongin gamtatna in upna guan zo lo a, upna bek in gamtatna guanguan hi zaw hi.

Christian te’n ih theih ding ah Upna le gamtatna pen a kileekkim thei ding thu namte hi lo zawa, a kihualkim ding thu nam hi zaw hi cih ih phawk ding kisam hi. Kileekkim cih ciangin a kibang lo thu nih kikal ah a kizang kammal nam hi a, kihual kim cih ciangin a kibang thu khat sunga a kung le a gah a kizopna khen khiat gen lozaw a, longkhat gen zia tawh kihualkim sak cih hi zaw hi. Gamtatna a tuam upna a tuam cih bang om lo hi. Gamtatna pen upna ii a gah ahi hi. Upna ih cih in gah nei pawlmawh hi.

Upna bek ih cih ciangin gamtatna a nolh thei, a behlap thei cih daan a ngaihsut ding hi lo hi. Penglam zong a ginat het loh pi mah in mimal khat “bek” mah hi a, ahi zongin a lungsim, a pumpi, a kha thum pha hi. Tua daan zia in upna bek ih cih ciangin Khrih ong tatkhiatna thu ah eite’ behlap theih hawmthawh theih om nawn lo a, up ding bek hi cihna hi. Khrih gamtatna a konlawh kha lo nahoihsepna, thupha bawlna le gamtat hoihnate tawh kidim biakna in a si taktak ding hizaw hi.

Paul le James gen pen a kibanglo thu nih gawmtuahna tawh a kileekkim gupna thu a gen hi lo a, a kikhenkhia thei lo tua upna le gamtatna thu pen longkhat a hihna thu ah kihualkim-a ih theih ding deihna tawh a gen uh hizaw hi. Paul in Pasian mai-ah upna bek tawh thu na gen a, James in mihingte’ mai-ah gamtatna a kal na hi bek hi. Jesuh um ing ci napi-in a gamtat a tuam, a luhek a tuam, a thu zak a tuam, a thuhilhna a tuampi Christian minpua tam mahmah hi.

Tuate James in a kawk hi. Pasian’ mai ah upna bek in dikna ngah sak ahihna Paul in gen a, mihingte’ mai ah ih upna ih lah theih ding a kisapna James in a gen ahi hi. James in Pasian’ mai-ah ci lo-a, Paul in mihingte’ mai ah ci lo hi. Mihingte’ muhna ah gamtatna kisam sak a, ahi zongin Pasian’ muhna ah upna bek a kisapna James in a nial hi lo hi. Paul in zong Pasian’ mai-ah upna bek a gen hi a, mihingte’ mai-ah gamtatna a nial hi lo hi.

Pawl khatte in upna ih cih hangin ih zuih zawh kei leh gupna kitan ding ci hi. Tua bang mite in bang zuih sawm lai uh hiam? Zuih zawh ding thu Pasian in ong kal lai hi leh Jesuh Khrih ong sihna a mawkna hi ding hi. A taktak in cilehang mihingte in ih zuih zawh pen mawhna bek hi a, ih zuih zawh loh pen hotkhiatna ih kisapna thute hizaw hi. Gamtatna om lo upna in a si hi, upna om lo gamtatna zong a si hi ci-in kidawngdawng lehang thumaan kimu zo lo ding ahih manin longkhat ah pai vetin tua lawngkhat Upna bek sung panin upna le a gah kihualkim (consistent) taka ih kihilh ding thupi penpen hi.

Leitung mite hih banga a gamtat lialua-na uh pen Jesuh Khrih sungah up ding “bek” thu a nial man uh ahi hi. A gamta tawh a gamta lo tawh ih vekpi in Pasian’ muhna ah a kibang ih hi hi. Tua ih gamtatna ciat panin pusuah theihna lampi khat bek om a, tua pen Khrih “bek” ah upna ahi hi.

Eimau ut bang ciata upna hi loin Jesuh “bek” ah upna hi. Upna kicing sa lo-a, gamtatna a suangte in amau gamtatkhialhna lo buang bangmah dang gamtat siangtho nei zo tuan lo ding uh hi. Tua ahih manin Sanggam aw, Jesuh Khrih “bek” ah lametna om lai hi. Jesuh in “Keimah in Lampi ka hi a, Thumaan, le Nuntakna zong ka hi hi. Kei hong suang loin Pa kiangah kuamah tung thei lo ding hi” na ci hi (John 14: 6). Jesuh “bek” ah cih kammal pen “upna” bek tawh kihualkim thei hi. Tua upna in eite’ zawhna hi. Lai Siangtho sungah kuate in leitung nate zo ding ahi hiam ih cih leh, Jesuh pen Pasian’ Tapa hi, ci-in a umte bek in zo ding uh hi, na ci hi (John 5: 5). Haleluijah Topa minthang tahen! Amen. Evan. Suangh Dal