Haksatna Nungah Ih Bawlphat Ding Thu

Haksatna Nungah Ih Bawlphat Ding Thu

Kawlgam leh Zogam huam sungah tuiciin hong tun a khatveina hi kha ding hi. Nidangin hih bang haksatna om ngei nailo hi. Ih lungkhamin cihna ding ih thei pak kei uh hi. Ahi zongin a nungta Pasian khat om-a, tua a Nungta Pasian tungah lametna lianpi tawh thu ih ngengen uh hi. Ih sep pak theih tua bek hong om phot hi. A nungthuap dingin ih neih sunsun (neih man hilo, deihsakna, itna tawh) sum le pai kikhon liailiai-in ih kaikhawm uh hi. Tua zong bangmah zah pha khollo ding hi. A thuakte aa dingin a iik-ah zong nam zo taktak lo thei mai hi. Ih gennop bulpi tua hi dihdih lo ahih manin gennop bulpi lamah lut suk pah ni.

Hih bang haksatna koi pan kipan hiam cih a bulpi sut ding hi leng muhna kibang lo thu tampi om dinga, biakna lam panin Pasian kiang zuan kik ni, ih mawhna lianlua hi cih ahi zong, Jesu hong pai kik ding naita a genkholhsate tangtungta cih hi phot a, biakna tawh kituakin hih thu zong ngaihsut huai pah hi. A nihna-ah kuaman a gen ngei hetloh (Reforestation in Chin State-Pu Khup Khan Thang Taithul, Jan. 4, 2015, Zomi Daily, bekin gen ngei hi), zong ih ngaihsut ngei melloh thu khat kinak sap mahmah hi hang cih ih kiphawk sak kik nuam uh hi. Zomi sungah Pasian nasem, thugen kitam mahmah ta leh Zogam aading nasem nuam ki om nailo hi. Zogam lam kik ni, puahpha kik ni, sum kidong tek ni, etc… a ci kua mah ki om lo zen hi. LST sungah Ezra leh Nehemiah-te tawh kibang velvel Zogam it taktak om leng piang thei ding hi/ kipuah kik thei ding hi. A netum nuam hilo-in, a lampha kik nuam ih hih ding thupi zaw hi.

Bang hanga puah kik ding? Ih gam keu lua ahih manin, leitang kipsak ding singkung lopa zung cihte omlo, guah zu leh memcim pahpah, khangluiten tuita khan acih bangin guah zu peuh leh lui neute, hokguamte ngapzawh lo, palzawh loh phialin tuikhang mang gawp pahpah, lei hoih teng taimang khin, lamlianpiteng kisia khin, lampi tunga kidawh leiteng pai mang khin pahpah hi. Singkung le lopate in tua bang haksatna piang dingte hong kepsak den uh hi. Khualum lua, khuavot luate hong kepsak hi. Mihing tawh Carbon Dioxide/Oxygen kikhek den ahih manin kilem mahmah hi. Ka neulai-in nisa leh zong khua lumlua tuan selo hi. Guah zu le zong tuikhang gawp tuan selo hi, a khang zongin nin nianua lo, uih lela lo-a, sawtlo sungin kiamkik pah thei hi. A hang pen lamdang hetlo, singkung lopa a tam man ahi hi. Tun keugaw khin ta hiven. Singkung lopa bek hilo, zusa vasa, ganhingte itna tawh kemcing thei leng mihingte aading a sia bawl hetlo ahoih vive hong bawlsak uh hi (Environment- kiim le pam itna nei ciat ni).

Bang teng koi ci puah kik ding? Zogam keu lua ahih manin singkung tampi suan kik ding, singkung suan cih thadah ih paipaina-ah phuk, kuaitan, tem/hei tawh bantan, zungkalh khin ta hi hang. Phuk kei leng ih suan kei phial zongin amah thu in hong pokik lua hi (phawk ni, sem pah ni, tun kipan pah ni).

Kum sialin meikang/gamkang phelh cih thadah gam hal ding kinak lawp thei mahmah hi hang. Singkung lopateng haltum khinta hi hang. Gam hal kei leng ama thu-in singkung lopate hong pokik lua hi. Gam hal ding sangin gamkang phelh dingin tha tampi piazaw leng ih gam hong nimkik pah ding hi (khuasung mite’n sem pah ni). Gam halte kum bangzah thong/gilbemah koih ding, gamkang khat ih galmuh leh khuazang a delh pah ding, a mitsiang masiah phelh ding, giah a kul leh giak ding, nungakte, khua upate, hausate in a nungah nek le dawn tawh delhpah ding cihte ih khua ciatah thukhunin nei thei leng kuaman hong nial lo dinga, ih gam puah hi pah ding hi hang. Ih gam ih lei it kei leng kuan hong itsak ding, kuan hong kepsak ding hiam???

Singkung phuk kei leng bang tawh anhuan ding cih dotna om den hi. An huanna dingin sing phuklo khua tampi tak om-a, an huan veve uh hi. Huih muttuk singkungte, ama thu-a keu tawm singkungte an huanna dingin kicing thei lua ding hi (an bek huanin sing cilzat hileng). An huanna dingin ih Zogamah singkung tangin ih zat theih ding, Electric leh Gas a kicin theihna ding Gamuk, vaihawm pawl mawhpuak ahi hi. Tua dingin budget tampi a gel ding uh kisam masa penpen hi (tu a ih thuak haksatna pilna-in hong neih lawh le-uh ut hang ei). Kumpi lam pan mei a kicin loh hang, khuasung sumbukte beek in Gas a kicin theihna ding hong vaihawm zo leh uthuai penpen hi. Khuasung sumbukten vai a hawm zawh kei leh Zomi bup in kipawlna tuamtuam min tawh ih khua ciat pan (go-down, store, canteen, etc.) man olno takin lei theih ding vaihawm khop huai mahmah hi. Tedim, Tonzang, Cikha, Tamu, Kalaymyo sung tengah Gas kicing takin zat zawhna ding, India lampan vaihawm leng lampi om thei kha ding hi (mimal muhna). Kumpiten vai a hawm kei zongin Zomite (mimal/kipawlnate) hauhna in tua bang vaihawm zolo ding hiam? (Ngaihsun pha dih ve). Tu-a ih thuak haksatna hanga sum beiteng zong kicing mai thei ding hi veh aw!

Ih thuakma-in ngaihsun thei zel hi leng, ih gam nuamzaw deuh ding hi ven. Bangbang hi leh Zogam puahkik hun lua ta cih phawk kawmin, ei pan theihna kiu khat panin puah sawm ciat dih ni ei guai. Ei bek mi kisa, ei muhna bek thupi sa, ei bek kipil sak, ei thu bek thu sa, ei bek hampha nuam den nuntakna tawh ih omom leh taikhua valin ih nunna bei dinga, khang sawnte’n bangmah lawhtak lo ding uh hi. Khang sawnte’n tuu bang a cin ding Zogam, phuh bangin kho sak ni ei, Zomi takhek!

Zomi leh Zogam it,
Kap L Thang
Portland, OR
USA