Habakkuk 2:4 na ii gen Upna

Habakkuk 2:4 na ii gen Upna

Habakkuk in hih lai munah Babylonian mite a genna hi a, a diakdiakin Babylon kumpipa a kawk phadiak hi. A kiphasak, a kihisak, a gilo mi pen amah le amah kimasuanin Pasian’ tungah kinga lo hi. Ahi zongin diktang mi, thumaan mi ahih leh Pasian tungah kinga tawntung hi.

Hih LST mun in ‘A gilo mite suakta lo ding a…’ a cih ciangin Babylon tungah a genna hi a, tua khit ciangin Babylon mah bangin upna tawh hi lo-in ukzawhna tawh a kiphasak peuhpeuh tungah a genna zong hi pah hi. Upna pen utna hi lo hi. Utna pen upna hi lo a, tua mah bangin upna pen ukna hi lo hi. Upna pen upmawhna zong hi lo hi. Zomi Christians te upna thu sangin ukna (ukzawhna) thu le ut peuhpeuh thute tawh kibuai zelzel kha hi. Ih ut leh ki-it zel-in ih ut leh ki mudah zel hi.

Upna ih cih pen lungduai taka Pasian’ gelnate ngak tinten a kul upna hi a, diktang ngah thumaan mite in bel Pasian in a kammalte pel lo-in tangtung sak ding hi cih um pah lian uh hi. “Thumaan mi/ diktang mi a upna tawh nungta ding hi” cih hih Habakkuk 2: 4na pen Thuciam Thak sungah dapphah pi-in na kikoih a, mawhnei mite hehpihna hanga upna tawh kitankhia ding ahihna thu na bulphuh hi (Romans 1: 17). Tua ahih manin Christians te upna tawh a nuntak kul masa hi (Hebrews 10: 38-39).

Hih Habakkuk le Thuciam thak ii gen upna hang aa khuasak zia namte in zawhngeuno pen a pi in a tuah lengleng bangin Pasian’ ong tuahtuahna le ong maikaihna tungah muan tawntungna le Pasian’ kamciamte tungah hun hamsa pen hunte nangawn ah zong zawngno in a pi ang ah a kiluai lingleng bangdan-a upna muanna tawh kibawm lingleng aa khuasak zia ahi hi. Upna ih cih pen piansaknate nangawn Pasian kampauna tawh leitung le vantung piang a, tu-a ih muhtheih nate a om nailopi panin hong piang hi, ci-in ih upna bek mah tawh a thei ih hi hi (Heb. 11: 3).

Tatkhiatna thu ah zong note’ upna hangin Pasian’ ong hehpihna tawh hotkhiatna a ngah na hi uh hi. Note’ thalawhna hangin a ngah hilo-in Pasian’ ong piakkhong ahi hi. Note’ hanciamna (sepna/gamtatna) tawh a ngah hilo na hih manun na kisialhna ding uh a thu omlo hi (Eph. 2: 8,9). Piansaknate thu ah zong na up kei leh na hai zo ding hi. Tuamah bangin tatkhiatna thu ah zong na up ziauh kei a, nang le nangin a hoih a pha zo ding kisa-in zing ciang thai ciang na cihcih se leh bangmah hong kilamdang ngei lo ding-a na ziakai-in hun na lap kei lel kha ding hi. Hoih hun ngak ding hi lo-in ih hihna bangbang tawh Pasian’ hehpihna tokhom mai ih zuat pah ding hi zaw hi.

Evan. Suang Dal