Guitarist Kimpu7 phamna tungtanga leitungbup Zomite’ tunga lungdam kohna

Guitarist Kimpu7 phamna tungtanga leitungbup Zomite’ tunga lungdam kohna

Anlangh khawmi, Pu Pastor Do Za Thang Naulak leh Pi Pau Za Cing Naulakte’ tapa, kanau-uh Tg.THANG KAP KIM NAULAK @Kimpu7, kum 32 (04-09-1989—27-07-2021) in hong mualliam san mana leitung bup Zomite’n nahong dahpihna-uh, nahong thuakpihna uh, hehnepna kammal manpha tampite tawh nahong thapiaknate-uh, Zola-oih leh lakammal hoih pipite tawh amah paammaih nasaknate-uh nahong phokhiat saknate-uh, sumtang tawh vai ahong dinpihte’ tung leh anat ciila kipan kitaangsapna kheempeuh luangkhama vaite nahong din saknate-u’ tungah khitui luang kawm kawm mah a kakammal mawl tak uh tawh kong lungdam kohnate-uh nahong saan sakna dingun iitna leh zahtaakna lianpi tawh kahong thuum uh hi.

Note’ khempeuh in nahong khamuan sak manun Nu’ aang-Pa’- aang atang kha bangin aangtang kakisa phamah-mah uh hi.

1, Amah Kimpu hong bei’ pheta kipan tatsat lo-a suun thapaai-zaan-khawvaaka Zoom hong tutpih a ahong makaih ZOOMPU Pu Suan Tuang @Suantuang Siamnu leh Naa Liante-in hun kipat pan atawp dong hong tutpih gige, ahong thuakpih phamah-mah siatvat ngah khalote’ ahi-uh hi.

Amaute’ tungah.

2, Zoom sungah hong luut tan-tana amah naphawknate-uh leh pammaih nasaknate-uh, nahong thuakpihna kammalte-uh, thapiakna kammal manpha tampitak tawh haanthotna nahong piakte-uh, Kimpu’ tung pana pilna tampitak i laak theihna ding lampite hong lamlakteng kheempeuhte leh hunsiangtho hong makaih a ahong khamuanteng khempeuhte’ tungah.

3, Facebook pana group tuam-tuam tampi-takah hong hopsawn saka tua munte pana Zolaimal tawh gelh tangh-tangh a nahong dahpihnate-uh, nahong thuak pihnate-uh leh hong hehneema nahong khamuanna kammal manpha tampite-uh tawh tha ahong pia khempeuhte’ tungah.

4, Kimpu’ cinat akipat tuunga kipan hong dam kik theihna dinga suun-lehzaan tatsat lo-a, khitui-naptui tawh thungeena Pasian’ kianga hong thuumpih hong taupih leh hong kuth pih khempeuhte’ tungah.

5, Nahun manphatakte-uh leh nnsep-silbawlna mabaan tampite nusia-a, Zoom tutpihna ding vaipite ahong vaihawm khia,
Zomi Music Ministry (ZMM). G FORCE. Zomi Music Uplift Society (ZOMUS). USA Atlanta Zomi SDA Church. Leitungbup Anlangh Innkuan, Hihteng leh hih sunga akihel kheempeuhte’ tungah.

6, Oxygen aneih bang bang uh deihsak taka hong pemasa-a, inntualphuala ahong puak ngiat Ever Bright Zomi khangnote.

7, Kimpu’ luanghawm haan atan theihna dinga amun hong vaihawm sak Ko Kyaw Soe Hlaing ahong vui sak Along SDA Yangon pawlpi Elder Kyaw San Win leh akithuah pihteng’ tungah.

8, Kimpu’ cinat sungtenga hong khoi sak leh hong vaan sak, kabehpih uh lasiam, U Khuppu (Doron) Dr.TL Zamnu, leh Sir Saangpi.

9, Pawlpi mi sung pana Kimpute aneu’ tung ua kipana apianpih naute banga a-en leh avaan tangh-tangh, Nurse leh oxygente ngah theihna ding ahaksaat mah mah laitaka ahong vaihawm sak Sayamah Ciin Lam Maan @Mamaan’ tungah.

10, Kimpu’ kianga guitar sina om Mr.Gabriel @ gaga.Kimpu ahong nat tak ciangin lauhuaina tampi om mah tase leh nuse mawk lo-in akhoi, hong bei khit cianga zongh hong ciahsan tuan lo-a, aPu Kimpu-in haan atan dong a-ompih gige, Gabriel tungah zongh ka-iitna-uh kazahtaakna-uh leh ama tunga kalungdamna-uh puang khelo-in ka-om thei kei-uh hi.

11, Oxygen leh akitaangsam vai khempeuh asuun-azaan, azu-ahaam thuaka alauhuai phamah-mah tualgaal palik-tualkapte leh gualgeen-minthang alipkhap huai phamah-mah Covid huihse laka luangkhama vaiteng khempeuh kote’ taanga ahong din sak, Anlangh Innkuan Yangon (AIY) in Oxygen 40Lte bungnih, (bungkhat= teng 6 man, teng 12 in vai hong dinpih uh a vaidangteng khempeuh zongh hih AIY in hong hawm sakin hong sep sak khin uh hi.
AIY member teng.

Dr. Thang Pian Thawn @ Dr.Thawnpute-innkuan (Kimpu7 i alawm).

Innteek baangkua, vaihawmpi leh akisapna kheempeuh a luangkhama sep khiat leh makaih athuah khepi.

Kimpu’ luanghawm inn dawl 5 na pana motor tunga akoih, akivui theihna dinga akisam kumpi phalna zumh lai, sihna lai (Death Cert) te mah mah in alaak baanah apaw ding motorte leh ahuh ding mite ciala haan avatan khit dong kaluang uh a-hong phaam leh ahong pom, a-aang hong tang saka ahong vui ngiat kazahtaak mah mah uh leh ka-iit mah mah uh, Dr. Thawnpu ahi hi.

Dr.Thang Khawm Cinh. @ Dr.Thang Khawmte-innkuan (Pute).

Kitaangsapnate leh vai khempeuh avaihawm pih kaPu-uh ahi hi.. Natna leh sihna katuah khak hun sung uh leh ama vaihawmna hun hong kituah khak, Pute’ aang katan khakna-uh hi-a, aangtang zongh kakisa mah mah uh hi.

Sir Khup Khen Thang @Sir Thangneu (Pute). Ama innsung leh mabaan vai kitaangsam tampite seem man lo-a kitaangsapnate avaan pih leh ma apang kaPu-uh ahi hi. KaPu Thangneu-in Zo-aakpi nih tawh zongh hong veh lai lai hi. Pu Capt. Pau Suut Mung @Bo Mungtawngte-innkuan (Sanggamte).

Kitaangsap oxygen 40L te bungkhat teng 6 aman bungnih ( Teng 12) tawh vai hong ding leh vai dangte zongh ahong hawm pih kasanggamte-innkuan ahi-uh hi.

Nu Teen Lam Maan/ Manno @San San leh a-innkuan pihteng (Nunote).

Kitaangsap vante akisap hun-huna a-Taxi uh tawh ahong puak leh ahong nawn sak den kaNuno-uh ahi hi.

Tg.Nang Za Tung @TuTung (Alawm) leh Tg.Thang Kim Tel Telpi (Alawm). Kitaangsapnate alauhuai likpu tualkapte leh Covid huih sete’ laka apuak luut sak leh anawn khiat sak Salpha Galhaang Ngalliamte ahi-uh hi.

Oxygen bung 40L khat mi 4 in inndawl 5 na dong hong puak toh sak leh hong nawn suk sak amautegeel, PuThangneu leh lawm Sawm Liante ahi-uh hi.

Niing Nuam Lun @Lunneu (U Tuangpi zi ding).

Lunneu pen amah guaka cikmah a cina akhoi khangei nai lopipi hih banga ko a-innkuanpihte-u taanga innsung vaite leh Kimpu akhoina hangin ka-iitna-uh leh kazahtaakna-uh lian phamah-mah hi.

Amah hih natna sia avei Kimpu akhoi dinga aphal ngam apianna aNu, Pi Niang Lian Dim leh aPa, Pu Gin Khan Sing, amaute nupa’ tungah zongh kalungdamna-uh kakammawl takpi bek mah uh tawh hitaleh kako-uh a, ka-iitna-uh leh kazahtaaknate-uh lian phamah-mah hi.

12, Leitung mun tuam-tuam leh gam tuam-tuama om ka-Zomi pihte-in kanau Kimpu7 nahong theihpih theihna ding ua a-omna innlum pana ahong kaaikhe masa, amaute’ sumtang tawh Malaysia gamah 2017 Seente kumthak huna guitar tum dinga ahong sap sak masa kaPu-uh, Dal Za Mung @Aye Mung Naulak leh New Zealand a-om kasanggam uh, Thang Hau Sut @Hau Sut Gualnamte’ tungah.

SIANVON ZOTAWI album bawlna-ah amah leh atumtheih gingte ahong zat sak masa SDA Anlangh khawmi, Dal Thawn Lian @ Twin Tawngpite unau’, amaute’ tungah ka-iitna-uh, kazahtaakna-uh leh kalungdamnate-uh zongh ako khawm pah kahi-uh hi.

13, Mangngilh khak leh min gelh khak loh zongh om ngeel-ngeel lai ding ahihna–ah akihel khalote kakicin lahnate-uh nong theih siam ding uh leh ahuamkim thei peen dinga “Zomite’ tunga Lungdam kohna” cih kammalin hong huam khave-ve ahi, cih nahong pom sakna dingun kahong thuum pha-pha uh hi.

14, No1 na-a kipan atawpna dong noteng khempeuh tungah khitui luang kawm kawm mah a kong lungdam kohnate-uh nahong saan sakna dingun kahong thuum pha-pha-uh hi.

I Topa Pasianin noteng khempeuhte’ tungah Cidam-ludamna, daupai mazanna, lungnop-khamuanna leh gualzawhna thuphate hong pekim ciat ta heen!.

15, Zomite atawntunga aki-iit leh akihuai seem seem minam asuak thei dingin mimal kim Pa Pasianin hong ompih den ta heen! Kalungdam hi. Kimpu’ U, N.Kap Lun Mung Zomi. Nimit 30-07-2021.