Gualzawh nading le matutding utmanlel in na nawlkhin khaklohding athupi pawlkhat ~ Job Cinpi

Gualzawh nading le matutding utmanlel in na nawlkhin khaklohding athupi pawlkhat ~ Job Cinpi

Gualzawh matut nadingin nawlkhun ding a kisam pawlkhat om ding hi. Nawlkhin cih ciangin awlmawh pha lo, masasak lo cihna ahi hi. Ahi zongin bang thute nawlkhin ding hoih lo hiam cih pen theih ding kisam hi. Tua manin nawlkhin ding a hoih lo, a thupi pawlkhat om hi.

1. Cidamna

Na gualzawh nadingin cidamna thupisak loin nawnkhin kha peuhmah kei in. Na gualzawh ciangin na ci dam kei leh a mawkna suak lel ding hi. Gualzawh ding ut luat manin annek pong man lo, a lem bangbang ne ziauziau, ihmut hun pong man lo, ihmut cim ngei lo cihte pen pelh ding thupi hi. Nasep bekbek tawh buai den, cidam nading kimawl man lo, cihte hoih lo hi.

2. Na innkuanpihte

Sepna nabawlna ah madawk nuam gualzo nuam lua kisa-in innkuanpihte hun pia man lo, nasep bek mah thupisak cihte zong a kisam masa lo khat ahi hi. Innkuanpihte ading mah a nasem hi napi, ahi zongin innkuanpihte tawh hun nuam zang khawm man lo-a, nasep bek tawh buai ding pen lunggim huai mahmah hi. Tua ahih manin nasepna pan na ciah ciangin na nasepna sungah buaina lunggimna khempeuh nusia inla inn na tun ciangin na innkuanpihte tawh hun nuam zangkhawm den in. Lasa khawm, Video en khawm, kimawl khawm, cihte zong thupi mahmah hi.

3. Na lunggulhte

Nasepna ah gualzo nuam lua, matun nuam lua kisa-in na lunggulh na sepnop thu neuneute nawlkhin kha kei in. Bang hang hiam cih leh tu laitaka na sep pen na lunggulh hi lo thei hi. Na sepnop zong hi lo thei hi. Gentehna, Limsuai, kimawl, khualzin, Laam, lasa, tumging tuamtaumte sin, cihte pen na gualzawh ding ut luatna hangin nawlkhin kha kei in.

4. Mi tawh kizopna

Gualzawh ding matut ding ut luat manin veng le pam lawm le gual, meltheih ulenaute tawh kizopna na awlkhin khak loh ding thupi hi. Nasepna ah zong khutnuai mite tawh kizopsiamna thupi mahmah hi. Mi pawlkhat in a nasepna ah za nei pian uh leh ama nuai lamte tawh kizom nuam pha nawn lo thei uh hi. Tua bang ding ahi kei hi. Mi tawh kizopna cih pen khantawn kimang ding ahi hi.

5. Thumanna le cihtakna

Gualzawh nading matut nading hi peuh leh ci-in thumanna le cihtakna a khasuah thei mi pawlkhat om uh hi. Hauh nading thuman loin sum zong, min le za neih nading cihtakna tawh hanciam lo, guktatna tawh min le za ngah sawm, cih zong om thei hi. Thuman lo a hauh nading, cihtakna om lo a min le za ngah nading cihte pen pelh ding kisam hi. Thumanna le cihtakna nawlkhin dinga hong sawl hong zol a om kha zongin tua bang mite tawh bang zahtakin na ki-it a na kinai zongin tua bang mite nawlkhin zaw inla thumanna le cihtakna nawlkhin kha kei in. Job Cinpi (Zomi Laisim Nuamte)