Gualheu ten misipte theihsiam ding

Gualheu ten misipte theihsiam ding

Mihing gamtatdan zia leh tong nam nih pha hi. Mi pawlkhat in khan leh gual ngai phadiak uh hi. Midang tawh kikhawlh nuamsa in amau kia in saw tom zolo uh hi. Picnic leh party a tuam tuam zong lunglut diak uh hi. Maingal uh ahihmanin mi tawh ki maingap baih uh hi. Tua ahihmanin lawm zong hau uh hi. Tuabang dan mite extrovert kici hi.

Mi khen khat leu leu bel amau kia in om nuamsa zaw uh hi. Zum thei uh ahihmanin mi tawh ki maingap hakzaw uh hi. Lawm leh gual zong hau lo uh hi. Lawmte tawh hawhna khat peuh ah zong ciah ding gen pah thithe uh hi. Hih bang mite introvert kici hi. A theihnop dingin extrovert tawh ki lehbulh lian hi.

Introvert ten mi lakah pau tuh khollo lo uh hi. Tuamanin kamgual zo lo zawdeuh uh hi. Extrovert te adingin milak a om pen khuak recharge na namkhat hi. Extrovert leh introvert pen a telcian dingin hong ngaihsun ing. Extrovert ten introvert te a theihsiam ding kitangsam hi.

Introvert khempeuh mi zahkai hi khin sam lo uh hi. Kam tawm uh a, midang kiangah sawt om lo uh ahihmanin a zum ding zong kisa kha thei mah ding hi. Va hopih leeng zong hong sau don lo lai ding uh hi. Bang hang hiam cih leh introverts kici te a khuak mailam (frontal lobe) ah activity tamzaw hi.

Tua ahihmanin midang tawh aki semkhawm thei khollo maths tuat khawng, laibu sim leh thu ngaihsut khawng nuamsa uh hi. Mipi tamna leh gamlum ngeingai sangin gamdai nuamsa zaw uh hi. Tua pen amau adingin lungsim recharge na namkhat hi. Introvert peuhmah mi zahkai leh khangual banlo dan khat a ngaihsut ding hi lo hi.

Introvert ten khangual khawlh nuam a sa lo hi kei uh. Ahizongin a khangual pawlh nop uh tuamdang deuh hi. Mi tampi ten a thupi lo ciamnuih khawng gen a nuih ziah ziah nuamsa uh hi. Introvert ten bel thutak zawdeuh ngaihsut cian a kitangsam te genkhawm nuamsa zaw uh hi.

Extrovert ten a zawtna uh a manloh man un introvert ten a hua ding dan in ngaihsun thei uh hi. Hong hua lo uh a, na zawtna hangin lungdam mah mah uh hi. Amau mental energy in cin lo ahihmanin na zawtna khempeuh hong mang lo hi. Na kianga om nuam lo hi zen zen lo hi. Amau bekin a om uh ciang a tawldam zaw hi.Tuamanin na zawtna hong man loh ciang a tawldam sak nuam phot hi cih thei siam in.

Introvert ten zong lawm deih in ngai uh hi.Mi khenkhat ten introvert te midang a ngai khollo dan in ngaihsun uh hi. Tua pen ngaihsutna kibat lohman bek hi. Genteh na in; na hopih mun sim khat tawh khuasung ah kimu in hong hopih kei leh, “ki deih tak tak ei” ci thei ding hiteh.

Ahizongin ama’ ngaihsutna ah kisak theih man hi khin khollo thei hi. Hong hopih lohna hang pen na kiho nunung pen khit uh a ciapteh tak nuamna aihkeh dahna a om nailoh man zong hi thei hi. Mi khenkhat a meltheihte tawh aki tuah ciangin nuih pelmawh ding danin ngaihsun uh hi.

Pawlkhat in nuih banah khut kilen a kiho dingin ngaihsun uh hi. Ahizongin mi pawlkhat ten nuih leh kiho kuulsa khollo uh hi. Aki ho nunung pen uh leh aki muh kik kikal uah lungdamna ding a om loh manin nui lo uh hi. Dahna ding a om loh manin zong maigum tuan sam lo uh hi. Tua ahihmanin amau mel ngeina tawh kilang lel uh hi.

Tua amau meel ngeina pen a hehdanin ngaihsut sak ding hi lo hi. Innkuan sung, pawlsung, lawm leh gual kal leh nasepna ah introvert te mi pongman lo dan in ngaihsun lo in amaute’ theihsiam zawk ding hoih hi. N.Pautunthang (Millenium Hotel, Aizawl: Mizoram)