Germany, Potsdam City sungaom Christmas Market ah apuakkhamthei van kimu

Germany, Potsdam City sungaom Christmas Market ah apuakkhamthei van kimu

Germany gamsung aom Potsdam City sung Christmas Market khatah Police te’n Friday ni in apuakkhamthei Explosive van mukhia uh cih AFP pan kiza hi. Abeisa kum Christmas hunsung inzong Germany gamsung aom Christmas Market sungah buaina pianggawp ngei a, tuabang in apiankik zelding ki patau mahmah hi.

Tutung akimu apuakkhamthei Explosive vanpen Central Potsdam City sung aom Christmas Market gei aom Pharmacy khatpan in aki mukhia cihi. Potsdam City pen Berlin City paninzong aki lamlalualo, munhoih khuanopci mahmah “picturesque city” ci’n aki ciamtehkhat hi a, Prussia Kings te omngeina khuapi khatzong ahihi.

German Police te genkhiatna ah zatuizuakna ah nasem ahi Pharmacist khatin saisung ah Wire khautawh akizom Canister khat amuh ciangin patau in Alarm hongzasak cihi.

Germany, Brandenburg State panin Police te’nzong apuakkhamthei Explosive Device pen Pharmacy sungpan in kimukhia takpi hi ci’n Twitter tungtawn in genkhia uhhi.

Tua apuakkhamthei Explosive Device sungah siktukilh “Nails” honkhat leh Powder pawlkhatzong kihel a, apuakkhamlo ahih keileh apuakkham nailozong hitheiding hi ci’n Brandenburg interior minister Karl-Heinz Schroeter in genkhia hi.

Hihvai tawh kisai in kumpi thunei te’n hoihtak in akancian, asitcian laitak uh kici a, Investigators te’n athu ala akician in hoihtak genkhiatna omnailo cihi.

Hih apuakkhamthei vanhoihlo akimuh ciangin Bomb Disposal Units te’n Christmas Market leh City Center sungteng hoihtak in siansuah uh a, tua apuakkhamthei vanhoihlo zong nitaklam 6pm hunpawl in apuakkhamlo dingin Defused bawlkhin uh cihi.

Tua Christmas Market ah avaihawm makaikhat ahi Organiser Peter Klemm in Broadcaster NTV te tungah agenkhiatna ah hihbangin apuakkhamthei Explosive Device muhkhiatpen baihhetlo hi, kipatau in kilauthawng mahmah hi ci’n genkhia hi.

Abeisakum December khasung in Central Berlin aom Christmas Market sungah buaina lianpi apiankhitzawh Jihadist Attack aom kikdingmah kipautau in, Security pen hoihtak in akikoihden, High Alert in aomden ahihi.

Nungkum buaina pen Tunisian asylum seeker Anis Amri akici khatin Truck mawtawpi khat suhsak, Hijack bawl in, ahawlpa Polish Driver pen thatlum masa hi. Tuakhit ciangin tua Truck mawtawpi tawh Christmas Market sungteng nawkgawp a, mi 11 mah ataihlup banah adangzong mi tampitak in liamlawhgawp uhhi.

Tuapa pen Christmas Market sungteng mipi ommuang kimlai anawkgawp khitciangin taisim suakthei himahleh tuazawh ni 4 khitciangin Italian Police te’n Milan City sungah thautawh na kaplumthei uhhi.

Germany gamsung ah tukum abeisa July khasung inzong kum 26 aphakhin Palestinian asylum seeker khatin temta tawh Hamburg City sung aom Supermarket sungkhat ah alutkhit ciangin mi 1 dawtlum in, adangzong mi 6 bangin liamlawhgawp uhhi. Tuakhit ciangin khuasungvak amukha Passers-by te’n namanthei bilbel uhhi.

More: Germany Christmas Market khat mawtawpi in phulphei, mi 12 si, 48 liam

October khasung inzong kum 19 aphakhin Syrian gammi Yamen akici khatin apuakkhamthei Powerful Explosive van honkhattawh Bomb sukham in buaina piangsakding in kilimthei mahmah a, ahi zongin German Police te’n ahunlap in mankhiathei bilbel uhhi. Tua migilo te gamtatna khempeuh pen IS migilo te’n ka mizat uhhi ci’n pulakkhia pahpah uhhi. Sawltak #zomidaily