Gaza a uk Hamas te’n amakai thakding uh teelthak

Gaza a uk Hamas te’n amakai thakding uh teelthak

Fed. 14, 2017: Gaza uk Hamas movement ten kiteelna a guk/sim (secret election) in nei uh a, a makai thak dingun 2011 kum in Hamaste thonginn a thongkia mi 20te khah khiatna dingin a kilaihpih (prisoner swap), kum 20 val sung Israel thonginn a thongkia Yahya Sinwar kiteelcing thak hi ci-in Palestinian enclave sunga Hamas group ten pulak uh hi. Yahya Sinwar pen Hamas thau tawi pawl “Hamas military wing” kici phuankhiate lakah kihel hi. Sinwar makai thak dingin a kiteelcing mah bangin amah pen Hamaste’ decision-maker kici sungah pan mun poimawh mahmah a let banah executive leadership len in, Israel tawh kisai Hamaste’ policy vai poimawh tengah thuneihna len ding hi.

Hamas movement-te makaipipa (chief) Khaled Meshaal a taimang (exiled) khit nungin makai thak ding a beisa kum 10 sung kician mel loin om a, tu-in Gaza pansan Sinwar pen Hamas movement makaipipa ding suak hi. Gaza pansan political analyst Hani Habeeb in hih kiteelna ah Sinwar in gualzawhna a ngah manin Hamas ten Israel thu a man lohna/nial ngamna (defiance) message khak a, Palestine mite sunga pawl dang (fiction) leh Hamaste’ lang Palestinian President Mahmoud Abbas’ Fatah faction kici ten Palestine-Israel kilem kikna ding a hanciamna uh nakpi takin nawngkaisak ding hi ci hi.

Israel in 1980s in Sinwar in Israel a langpang man leh a lehdo manin a nuntak sung thongkia dingin li vei (four life terms) na sehsak ngei uh a, Israel leh Palestine mite kizopna neite kan/zong khia (tracking) in a that manin kum 23 sung thong sungah na khum hi. 2006 in Gaza gam-a galkapte (fighters) Israel-Gaza gamgi panin lut in Gilad Shalit ah Israel galkapte man in thongah khum uh hi. Israel in a galkap matna tuakte a kikhahkhiatna dingin Israel thong sunga Palestine thongkia mi 1,047te 2011 in a khah khiatna uh-ah thongkiate kilaihtuahna ah Sinwar kihel hi.

#Behlapna: 2014 in Sinwar in Palestinian unity government kici Fatah group tawh kihona neihna a gup hangin hih kihona lawhsam hi. Hih Hamaste political chief dingin kiteelna tuhte lakah Hamaste’ deputy chief len mi nih Ismail Haniyeh leh Moussa Abu Marzouk in zong tuh uh hi. 2012 kiteelna hun pekin Sinwar pen Ismail Haniyeh zalaih dingpa hi na kici khin zo hi. Sinwar in Hamas political chief bek len lo dinga, Hamas military wing min adingin zong a kampaupa ding ahih manin hun tawmvei bang la dinga, vaihawmna let hong siam leh Israelte Hamas in a dona hong nasia zaw dingin lamethuai hi.

Photo: Vei lam-a pa pen Hamas mai Ismail Haniyeh hi a, ama zalaih dinga kiteelcing thak Sinwar pen ziat lam a pa ahi hi. Source: News Agencies/ Thang Khan Lian