Gambup Khawmpi Thumna (21st Century Panglong – Third Session)

Gambup Khawmpi Thumna (21st Century Panglong – Third Session)

Hong tung ding July 11-16, 2018 hun teng a (3) veina gambup khawmpi (21st Century Panglong-3rd Session) kineikik ta ding cih thunei vaisai pawl ahi UPDJC Secretariat leh President Office in tangkona neikhin uhhi. Tua ahih manin, asawtlo khawmpi (3)na kinei tatak ta ding hi. Tutung khawmpi ah kikup ding thuguipi pen abeisa khawmpi (1)na leh khawmpi (2) na banglo-in gamvai haksatna leh buaina tuamtuam huhau-in thulu (2) bek kikup ding geelna hampi kineizo bek ding hi.

Tua kikup dingte pen (1) Gamsung mite pasal leh numei liangko kikimna ding vai (Gender Equality) leh (2) Gamsung gammi tuamtuam minam citawmte’ hamphatna satanh ding vai (Ethnic Minority Rights. . Note :Hih vai pen UPDJC meeting masa kithukimsa hinapi’n akik ah UPDJC galkap palaite in sangzolo ahih manun ngaihsutphat ding kikoih/Pending) hi.

Tutung khawmpi (3)na ah amasa geelna bang hileh gamsung bitna ( Security Sector Prinnciples) leh Gamvai lamsang ( Political Sector Principles) cih thuguipi (2) nasiatak kamkupna nei ding kici kimlai vaihakna (asungthu ah NLD kumpi leh Galkapte kithutuah zawhlohna/kisialkhausutna) tawh mailam ah kikupzawk dingin tanu vaisai pawlin khensatkik uh ahihi.

Gambup thukimna (Union Accord) ngah zawh nadingin, thuguipi kikup ding amsa pek kikhensat thuguipi te in : (1) Gamvai (Political Sector Principles), (2) Sumlei sumzuakna vai (Economic Principles), (3) Gamsung bitna ding vai (Security Sector Principles), (4) Nuntak Khuasakzia vai (Social Sector Principles), (5) Leitang leh Kiim-le-Paam kepzia ding vai (Land and Evironmental Sector Principles) cihte hi.

Gambup Khawmpi Ngimna (21st Century Panglong Mungtup)

Tulaitak NLD kumpi leh mualmite ngimna bulpi ahi 2008 thukhunpi puah nading leh gambup kilemna mualsuah theih nang lampi sialna ah hih gambup khawmpi tungtawnin thukimnate tawdapin 2008 thukhunpi puah ding/gelhphakik ding cih deihna ahihi. Khawmpi (1)na leh (2)na tungtawnin, thukimna (Union Accord Points-37 kingah khin) hi.

Hih khawmpi ahunzui alem simin kibawl zel ding aa, thulupi (5) teng kikup khit thukim khit teh gambup thukimna avuicing (Union Accord) hong suak ding hi. Tua teng pen Gambup Innpi (Union Parliament) in kipsakna nei ding aa, tua kipsakna (Union Accord) teng siksanin 2008 thukhunpi puah ahi zong athak gelh ahizong maban kizomtosuak ding ahihi.

Kumpi leh Mualmi Thautawite’Kilemna Maban ( NCA & Peace Process)

President Thein Sein makaih sungin mualmi thautawi pawl (8) in gambup kilemna thukim (Nationwide Ceasefire Agreement 2010-2015) uh hi. NLD kumpi kah zawh mualmi thautawi pawl (2) ngahkik uh ahih manin, tu-in NCA sungah lut mualmi thautawi kipawlna (10) phata hi. Mualmi thautawi kipawlna ah abiik penpen teng kipawlna ahi Federal Political Negotiation And Consultative Committee (FPNCC group -7) ahihi. Tutung a (3) veina khawmpi ah FPNCC kipawlna min tawh ahih loh hangin, amau’khat ciat kipawlna min tek tawh kisam ding hi. Amau’ khensat dandan hiding hi.

NCA pen alawhcin nang hih FPNCC kipawlnate hong lutloh vua pianglo ding hi. Azenzenin, kumpi tawh FPNCC akisialkhau sutna uh anihtuak un akhiap tuak vua leh (Bargain & Compromise) NCA ah FPNCC pawlte damdamin hong lutthei tak ding uhhi. Tua bang ahih leh 2+1+1+3 Or 2+1+1+1+1+1 ( UWSA +NDAA, KIO, SSPP, TNLA+AA+MNDAA ahih keh UWSA+NDAA, KIO,SSPP, TNLA, AA, MNDAA) cih bangin pawlkhat tek kikhenin zong NCA lampi hong zuitheitak uh hi. Tua bang ahih kei leh bel FPNCC kipawlna min tawh zong hong buplut thei tak uhhi (Lamet tawm mahmah!).

NCA icih pen Kawlgam ah mualmi thautawite leh Kawl kumpi in kilemna abawlna lak ah athupi pen (Official) om pen hi. Abeisa Gen. Ne Win hun leh Gen. Khin Ngunt hunin kumpi leh pawlkhat ciat kilemna (Bilateral agreement/ Gentlemen Agreement) bek hi-in, gambup innpi (Union Parliament) cih bang zong omlo ahih man gambup innpi in kipsakna nei cih bang omlo hi.

Tutung NCA pen gambup innpi kipsakna ban ah President in sign, Parliament Speaker (2) sign leh Commaander-in-chief of Defence Services (galkap mangpipa) ahih man kimawkphiat theilo suak ahihi. Tua mah NLD kumpi leh mailam agualzo kumpi in azop tohtoh ding hong suak hi.

Myanmar gamphutkhia minam ah kihel leh 21st Century Panglong apankhia Zomite’taangin 21st Century Panglong Khawmpi akah minam Party ZCD zong tutung a (3) veina khawmpi kikahkik ding hi. Tulaitak gambup ah Registered Party (95) a omna lak ah nung abeisa 2015 gambup kiteelpi lai agual party (23) bek pha hi. Tua lak ah Chin State phualsat tualsuak party tampi lak pan Zomi bup mapanna tawh agualzo iminam party ahi Zomi Congress For Democracy bek om hi.

Hih Khawmpi ah agualzo party te bek kikahsak hi (Khawmpi honpawi ah bel party kici khempeuh makaite kisam). Tua ahih manin, khawmpi ah taangmi hihtheihna leh thusunna kineithei den ahihi. Thupulaak: Bob Tuangpi ( 0572018)