FPTP leh PR kumpi etkakna ~ Lang Khan Khai

FPTP leh PR kumpi etkakna ~ Lang Khan Khai

1. FPTP – First Rast The Post:

Kawlgam India leh USA ah tulaitak akizang kumpi Ki-ukna hi a, Winner Takes All (WTA – Azo party in avekin ukna la) cih thu bulphuh ahi hi. 2010 kawlgam kiteelna ah USDP in atampen ngahin avekpi luah hi. State leh region nagawn ah Chief Minister pen party MP ngahna sangin Kawlgam President deihpen USDP party MP ngah khat kilaipiak tazen hi. 2008 Constitution hoihlohna leh puahhuaina pen hithute zong kihel hi. Party tampi kidemnin ahatpen party in 50% val angah leh kumpi semin azalian amau sung bek kipia hi. Zopau hileh, “Vompi Sahawm” acihte a hi hi.

2. PR – Proportional Representation:

FPTP ngeina ah azo party bek in mun khempeuh len a, MP atawmzaw angah sungah apil asiam om taleh bangmah sep ngahlo hi. AD 1800 hun ciangin England Economist John Stuwart Mill in mi 100 ah 60% vote bek thupisim a,  40% vote pen bangmahlo asuah ngeina lo hi ci-in ngaihsunin PR-Proportional Representation (MP ngahna zuia nasep leh mun ngahna,hawmna) cih thuhoih phawkkhia hi.

PR kumpi ah Party vote ngahzah zuiin kumpi ah panmun leh nasep ngahna hi-a, party khempeuh aneu alian in panmun leh nasep ngah kimin angahna tawh kizuiin supna omlo hi. Ahoihlohna bel Germany zong hih PR ngeina hangin Hitler in MP leh panmun nasep ngah a, atawp ciangin ama siamna hangin kumpi nangawn ngah a, lei tung galpi piangin Jews mi million 6 kithat hi.

PR ngeina pen 1857 kumin Denmark gam in zang hi. Switzerland – 1891 , Belgium – 1899 leh Finland in 1906 kumin zang hi. Tulaitak leitung ah PR azang gam 90 val om a, Australia, Argentina, Brazil, Finland, Germany, Hongkong, Hungary, Turkey, Indonesia, Israel, Italy, Japan, Mexico, Nepal, Norway, New Zealand, Russia, Sweden, Taiwan, S.Korea leh USA state pawl khat ah zang uhi.

Kawlgamah PR zat theihna dingin Minam Innpi Palai Daw Khim Win Kyi (Nulai) in thusunna a nei a, MP 160 in thukimpih ahih manin Gambup innpi ah khupna om ding hi.PR system pen ahoih hangin Kawlgam tawh kituak nailo hi aci zong om hi.  Ahi zongin party neu khat nangawn in mun ngah theiin nasep leh panmun ngah thei ding ahih manin thusau khuallote in deih mahmah hi.

Hih PR system pen NLD leh UNA pawl in deihlo a, USDP leh Brotherhood pawl in deih hi.  Hih PR system akizat zenzen leh Zomite in zong party 2 leh 3 phuanin MP 1 leh 2 ngah ding hanciam zo leng mun leh nasep ingah thei ding hi. Iki lem kei zongin himun ah hanciam lehang aphungpi ah ikituah veve ding hi. Sia Lang Khan Khai (Zomi Times)