Breaking News: Elon Musk in Twitter pen $44 billion tawh leiding

Breaking news: Twitter Board in Elon Musk tung Twitter app pen $44 billion tawh zuak ding thukimna nei

Twitter board in Leitungah mihau minthang pen khat ahi Billionaire Tesla CEO Pu Elon Musk tung Twitter app pen $44 billion tawh zuak ding thukimna nei ta ci uh hi. Abeisa hun in Pu Elon Musk in social media minthang khat ahi Twitter app lei nading sum $46.5 Billion kicing in ka nei ta, ka ready ta cih ataangkoh khit zawh ciang Twitter board te hong kikum uh ahi hi.

Pu Elon Musk in Twitter platform tungah 83 million followers bang nei in nisim in thu ngelh khiatna nei dan aa, Twitter pen hoih tak ka puahnuam in US gam ah Free speech aom sem sem nading ka hanciam nuam hi ci hi.

Abeisa hun in Twitter in Former President Donald Trump leh Politics lam ah amingthang pawl khat ii Twitter account te khak tan sak uh aa, tua te hon kik ding leh hon kik loh ding kitel nailo ci uh hi. Ref: CNN Thomas On Sian Mung (Thomas Mung Guite) Washington D.C April 25, 2022

US breaking news: Elon Musk in Twitter lei sawm

Leitungah mihau minthang pen khat ahi Billionaire Tesla CEO Pu Elon Musk in social media minthang khat ahi Twitter pen $46.5 Billion tawh lei in ama private company in koih sawm aa, tua ding akisam sum (fund) te zong kicing/ready ta hi ci hi. Tua bek thamlo in Twitter ii stock shares teng zong shareholders te tung pan lei ding gelna ka nei ci hi. Abeisa April 4 ni in zong Twitter shares 73.5 million (9.2 percent of firm) ka lei khin ta ci in Pu Elan Musk in genkhia hi.

Nung nipi sung in Pu Elon Musk in Twitter ka lei nuam aa, Freedom of Speech aom nang ka huh nuam ci in ataangkoh khit zawh ciang Twitter ii Board of Directors te sung kikupna om aa, Twitter pen kua khut sung tung ding cih leitung gambup in kithei nuam in kien cik tek ahi hi.

Abeisa 2020 US election hun lai in Twitter bawl pa leh former CEO Pu Jack Dorsey in Democrats lam te langlek in panpih aa Pu Donald Trump leh Republican makai tampi ii Twitter accounts te khak cip sak ahih manin US politics sung buaina tampi piang ahi hi.

Pawl khat te in Pu Elon Musk in Twitter lei thei hi leh Pu Trump in ama account ngah kik thei ding hi ci uh hi. Bang bang hi ta leh hi vai pen tulai tak leitungbup in lunglut tak in a et cik laitak ahi hi. Ref: The Epoch Times Thomas On Sian Mung (Thomas Mung Guite) Washington D.C April 21, 2022