Dimno’ Nu laikhak – 16

Dimno’ Nu laikhak – 16

Dimno’ nu aw lai tawm khat tawh hong hopih ing. Lai kong khak loh asawt ciangin ka lungnuam lo ahih manin hong hopih hi ingh. Thangpi te unau zong dam kim dingin lam en ing. Pasian in ei innkuan hong kem ahih manin lungdam hang. Pasian tung lungdam na kong hang!

Ih Nu leh ih Pa te zong hoih tek in teh maw? Ka om na-ah nupi teek, papi teek te ka muh ciangin amau hong theih loh hangin hehpih huai sa mahmah ing. Ka gen nop in gamdang mi te a gen ka hi kei a, ei lam pan a hongpai i nu leh i pa te agen nuam hi ingh. Teek khin ta uh ahih manin pau leh ham pen thei hak sa mahmah uhi. Tua manin koi mah pai thei lo uh a, inn ah thong kia bangin sun tawh zan tawh om den mawk uh hi. Gamdang nuntak ih cih ciangin ei lam bang lo-in ki hawh, ki lengna cih tam nawn lo, om nawn lo cih phial ding hi. Zingsang khua hong vak ciangin nasem ding teng nasem pai-in nitak khua mui kuan, lupkuan ah inn a ki tung kik pan hi. Dam lo ahi kei leh nasem zolo piteek, puteek, naupang teng bek in inn ngak a, nasem thei teng nasem in a ki pai gai hi. Tua hi-in sun sungteng inn ah nute’ guak, pate’ guak bek om ahi manin amau pen cim in a lungleng na hangin hun tomkal sungin a tha puak uh hong kia ziau mawk uhi. Hih bang kong gen ciangin gamdang aom piteek, puteek khem peuh aci ka hi sam kei a, atam zaw phial tua ci’ ci a kong gen na hi.

Gamdang om te bek a lungleng thei hilo in inn a om ih Nu leh ih Pa te zong a lung uh a leng loh na dingin hoih tak keem in, na khoi un maw! Thangpi te unau in zong a Pi, a Pu uh a zahtak bawl na dingin nang mahmah in ih Nu leh ih Pa na zah tak in maw! Hih thu kong gen ciangin ih Nu leh ih Pa sim mawh bawl in zah tak bawl kei teh hong ci hilo hing.

Ka om lai-in zong ka lawm te khat peuh kiang ah hawh ding ahi a, biakinn ah kikhawm in, la sin pai ding ka hih phial zongin ih Nu leh ih Pa kiang ah, ‘Pa…kei biakinn ah lasin in pai ning…, Nu…ka lawm te kiang ah va hawh vat ning ei…’ ci-a ka gen tangtang te zong na theih ding hi ven! Amau tua danin gen kei le hang inn ah hong mu kei leh ‘Na nau uh kawi lai pai hiam….Na u uh kua tawh ki khawl ahiam? ci-in lungnuam lo-in ih tun masiah hong kankan uhi. Tua hangin kei bangin inn lak kavak ciangin Nu kiang maw, Pa kiang maw khat ah kapai na ding, ka hawh nading agen tangtang hi vengh.

Dimno’ nu aw, mi hoihlo pawl khat te bangin ih Nuteek, ih Pateek te na sim mawh khak ding, don bawl lo-in na ki mangngilh bawl khak ding pen ka om loh nua-ah lung hi mawh mahmah ingh. Annek ding ciangin, ” Nu…an ne ta ni ei…Pa…ankuang hong um phei ta o leh,” ci-in sam masa tangtang in la, paina khat peuhpeuh na neih ciangin zong kei bangmah in, ”Nu..aw kei tua ah, khua khun a ih Siapa te’n va hawh vat ning…” Ahi kei leh, ”Naupang te Sang ah vakha vat ning…vapi vat ning…” ci-in gen hamtang in maw! Amau inn ah hong mu lo-in, ih paina zong a theih loh uh ciangin a lung uh nuam lo-in hong kankan uh a, inn i tun kik ma dong nong na ngak in, ih mut bang cim loh lawh liang uh ahi maw!

Tua bek tham loh in, ‘ka mo te, ka tu ka ta teng in teekta ka hih man un hong thupi sim nawn kei, bang mah in hong sim nawn kei uh…ki man na a nei nawn lo hi ta ung’ ci-in ki ngaihsun uh ahih manin lungneu in om thei mawk uhi. Ih Nu leh ih Pa te tua ci bangin a na om loh na dingin na cing in, na keem na khawi in maw! Nang bek mah hi kong it, kong ngaih, kong muan pen! Ke’n zong ka om na panin ka hih zawh zah in ih Nu leh ih Pa te a lungkim theih nadingin gam ta-in na hanciam ingh.

Ka nasep pih kalawm, kagual te-in a gen zel thu khat, ”Inn lam sum ih khak zawh kei ding leh bel hopih zong tha dah, sum khak zawh ciang bek in hong pih lel ing,” ci-uh hi. Tuazong bel mi pawl khat te adingin ahi na ciang om sa mah ing. Ahi zongin kei bang ih Nu’ te’n, ”Sum nong khak zo kei zongin kha sim in hong hopih den in maw, nong hopih loh ciangin ka lung uh nuam kei,” hong ci ahih manin nasep neih lo, zat ding sum peek khat zong ka khut sung ah aom loh hun na ngawn in sum leitawi zongin ih Nu te hopih hi vengh. Miin ‘ liang aw’ hong ci zong om in um ingh.

‘Khat vei nitak khuamui kuan innlak lawm te inn khat ah ka va hawh leh nitak an nek tawh na kituak dih dih hi. Lawm te nupa leh a tate teng in annek sabuai tung ah ki-uum in na ne a, a paam leilak ah a pa’ uh amah guak tu sak in na tuam piak uhi. Tua bangdan ka muh ciangin ka omdan hong nuam het lo-in, keizong kaciah kik pah hi. Ka kimuh kik uh ciangin ka lawm’ kiang ah, ” bang ci bangin na pa uh an tuam piak liang nai vua…tua bang liang pen kei bangin kilawm sa sam kengh…Ui lah hi lo, Zawhngeu lah hi buang sam lo hi ven….a teek ta zongin, a guai ta zongin i Nu pen ih nu mah hi-in, ih Pa pen i Pa mah hi,” ci-in kagen leh ” bang tua Puteek pi..haa’ nei nawn lo, khua mu nawn lo pi khawng tawh an neek khop ding khawng,” ci-in hong dawn san ziau hi.

Dimno’ nu, ngaihsun dih ve leh! Ha nein awn lo, khua mu nawn lo te aom ih Pi ih Pu te an tuam piak ding mah maw leh! Piteek puteek te inn ah ih khawi Ui, Zawhngeu te bangmah in leilak ah an tuampiak ding mah in a kilawm ai tam! Ih Nu leh ih Pa te-in an a neek ding uh ciangin ei om kei leng an hong nek san ngam het lo-in, ei’ tun kal ding hong na ngak lam uh thei kim tek leng hoih mah ding hi ven maw!
Kalawm in cik ciang a thei kik zen tam?

Dimno’ nu aw, ih Pa te kiang ah, na pai na ding mun khat peuh, na hawh na ding inn khat peuh ahi zong innlak na vak ding ciangin na gen hamtang in maw! Tua hi leh inn ah ih om kei zongin amau a lung uh na nuam ding uh a, khat peuh hong hawh leh zong ‘ tua tak pai hi ven zekai pian mah in teh…ahih kei leh sumbuk pai pak hi…hong tung kuan ta in teh’ ci-in zong na gen thei pah ding uh hiven.

Ih Nu te’n,

Ih pai na ding mun zong thei nuam mah in teh! Ahi zongin ih theihsak ding lam en zaw kha ding hi. An lim tuilim zong duh mah in teh! Ahi zongin atu ata teng tawh ankuang uum khop ding lung gulh zaw kha ding hi. Ih thei zawk na tampi zong om kha thei mah in teh! Ahi zongin i dot bawl ding ut sese kha ding uh hi. Puan hoih niik hoih zong deih mah un teh! Ahi zongin itna ih lak ding lunggulh masa zaw kha ding hi.

Hong muang tawntung,
Dimno’ Pa

December 5, 2012