Diamond Jubilee of Pu Ignatius Mang Do Nang (Thalmual)

Diamond Jubilee of Pu Ignatius Mang Do Nang (Thalmual)

Tuithang Parish sung Thalmual (Old) aa teng Pu Ignatius Mang Do Nang, RCM Pawlpi sungah a ki Tuisawp zawh kum (70) a cinna Diamond Jubilee pawi pi leh a zi Pi Theresa Niang Zen Dim tawh a kiteen zawh kum (50) cinna Golden Jubilee Pawi pi pen Tuithang Parish Siampipa Rev. Fr. John Lian Cin Pau thukimpihna tawh April 23, 2022 ni-in nasia takin Thalmual Khua lui ah ki bawl hi.

Jubilee Missa Biakpiakna pen Zingsang nai (6:30) in Siampi (5) in picing takin bawlsak in tua Missa sungah Nungak Siangtho (3) leh Parish sunga om thuhilh Sia teng leh tintan kah Khangno teng zong kihel hi.

Nitak lam nai (4:00) in Jubilee Mualsung thupha piakna leh pahtawina pen Jubilee Pawi a bawl te inn ah nuam takin ki bawl hi. Tua Pawipi hun sungin Pawlpi mintawh Pahtawina, lungdampih letsong piakna te ki nei-in tua bek thamlo in Khua sung pan in zong Pawl tuam tuam te in Pahtawina la sakna leh letsong piakna te nei uh hi.

Hih Jubilee Pawi a bawl Pu Ignatius Nang pen Thalmual Khua ah Pawlpi Makai kum (12) sung bang a sem ngei khat a hihna thu leh Pawlpi khantohna dingin mi tampi Pasian thu tawh a makaih pa a hih na thu te aa ki pan ama ii na hoih sepna te tungah lungdam kohna leh pahtawina pen Thalmual khua a makaih Sia Tung in hong pulaak khia hi.

Jubilee Pawi a bawl inntek pa in Pasian tung pan a ngah thupha te tungah a lungdamna thu hong pulaak khia in tua sungah ta pasal (😎 leh ta numei (1) a neih lak ah a vekpi-in a nuntak kim na thu leh a ta pasal te (4) bang (USA) gam ah va om thei a hih manin Pasian tungah a lungdamna thu leh Pawi sim aa a pai mimal kim tungah a lungdam na thu te hong pulaak khia hi.

Pawisim in a pai te in zong ama pulaak khiat thu te tung tawn in a ma upna leh a hanciam na, Pasian thupha a san na te thei a hih manun a picing leh a etteh huai nu pa te a hihna uh phawk sem sem in tha ngah thei mah mah uh hi.

Jubilee Pawi a bawl Inntek te in Siampite, Nungak Siangtho te leh Thuhhilhsia te khempeuh te tungah lungdamkoh letsong piakna nei uh hi. Nitak lam nai (6:00) in nitak an nuamtakin ki ne hi. Nitak an nek khit cingin Khangnote in Biakinn ah amaute ii tintan sunga a zat den uh lenkhopna te zom suak uh hi.

Hih Jubilee pawi a bawl Pu Ignatius Nang te innkuan aa ding thu ih ngetsak kawm in ei Pasian thu um mimal khat kim ciat in Jubilee thupha ngah in Diamond Jubilee Pawi a bawl zo te ih hih zawh nangin Pa Pasian kiangah a kisam thupha ten gen ciat ni. By- Fr. Joseph Zo Mung (RVA Tedim Chin Service)